JALUO dot KOM

DHAKO MOLOKORE ATHONGO

Jagoro; Ajos wuod Atiga Ny’Ochola

Jaluo Dot Kom.

Ayogo Nyikwa Ramogi Ajwang’ duto gi mos ma kende, kendo mogundho, en morna maduong’ ahinya ni ungima kamoro amora ma untie, kata kamano masiche opong’o piny. Kichiewo gokinyi to ni; mbom omuoch Nairobi, kendo ochako omuoch Tanganyika, ato moro bende owuoyo Amerka, Osama Onyango wuod Laden bende siemo jogo ma temo suoto umgi ni dwa nege, kiling’ matin to ni wuod ng’ane ma nyocha okendo nyar joka ng’ane ema magoro okawo loka cha. Kibudho matin to nduru osieko ni Apondi Nyar Oremo ma nyakwar Ogita ka Nyauma gi Amadi nyar Madwalo ema lowo otero Muksero, kamano pok orumo to ni Nyar Kokise; Anna Achieng’ ‚Shosho’ machako minwa nyar gi nera ema oleng’o lewe Buore Kapango, matin nono to ni Otieno wuod Ogal (Okombe Marika ja Nyahera ei Kasipul Mumbo ema olal miru), kare pinyni rumo!

Koro kawuono wach mane opoya ewang’ onyango ka aromo gi Jodong’ Kiseru man Ulaya; to ayudo ni Nyar Kasipul Mumbo moro olokore athongo; otuoni chuore ok nyal tiekone rich del (nindruok) mit nyani chwe luongo nyako wadgi moro mit gichako tukgi giwegi wachni tama kata pimo; to nimar en gima omak dhoga kendo ok en kit ngima jaluo omiyo nyaka agole mana e lela. Wachni chalo kama: Nyakoni yande oyudo dak maber, dichuo bende oyudo ng’at man’gi chiya ma nyangafu. Ato ka gir kirage Nyakoni wachoni nyako wadgi ema nyalo lone rich del. Kane nyako wadgi chande osebiro to tuk ong’ielo ng’ielo chakore mit gi chwoyo mapira (moro maketgi duong’ dichuo) e sitima, kato okelo origo e duong’ nyar Mumbo, Kaaye to nyani bukore ni koro oywagi mitne owuon nikech mapira tetne e duong’ne! Nyawadgi chande bende korka oruko ni en bende ondeko ka dichuo, mano doko tim!!!

Nyikwa Omogi kuom hawi marach Ora mane oyudo odhi e  wuoth moro matin ombowore apoya nono, mit oyudo ka wendo okarore kuom jadiyane ma nyar Mumbo, tho! Nohum nono! momako mana tike kowacho: “nito mae kethruok piny koso?” Gikanyo ono nokwayo weruok e kinde gi nyakono nimar e kitwa joluo en gombo ka dhako okarore kuom nyawadgi kendo tugo gi duong’ne e yor fuwo kamano. Penj ma koro apenjo nyamerani; “en riyo ma nade ma dhako wadu ema nyalo loyoni ma chuori ok nyal timoni? Ka dipo ni dichuo ok nyal loyoni rich del to dak ne ichoko bura? Jodong’ Abila oikore mar wuotho e tunge piny koni gi kocha mondo omi kik anjawo gi wichkuot mak nyithindwa; yawuoyi gi ynimine kanyakla”.

Kwayo ne yawuotwa ma osekendo gi mago ma pok okendo; kik iwe nyako lokre athongo ni in bende ilokori gi yawuoyi wetegi ni ema inindo godo; mano to tim mane? Ei Luo pok waneno dichuo ma chodo dichuo wadgi kata dhako ma chodo nyawadgi. Un chuo rit mondu kendo lonegiuru rich del, un mon heruru chuo gi chunyu duto, kik ilok dhako wadu dichuo ni imiye duong’ni otiye gi mapira kendo iluonge ni jadiyani! Mano sakrilego ma ok nyal hos hosre, kata imadh manyasi to itimo nono kayiem. Chuo bende olokore ni okawo duong’ne origo e dag owuoch nyawadgi kendo owuorore kaka en gi jadiyane ma jaber! Kata Joyaudi (Israel) nokuong’o joma timbegi chalo kama, Sodom nokethore nikech anjawo machal kama. Jodolo moko bende tinde obukore ni ok gi kendi to nyithind wegi gi nyiwegi matindo  mochiwore mondo otine Nyasaye e kanisa ema giloko mondegi; mano to koro gombo ma itimo nade?

 Kain achiel kuom joma amulo wechegi malo kanyogo to joggi marichoni kendo ikwer jachien gi timbene duto mondo iyud ler mar lony kuom minwa ADIKINYI NYAR NAM, NYASACH PODHO, NYAKALAGA OGONYA BIRO MEDI MIJING’O MAR YUDO LER KENDO MAR PUODHORI KUOM GAK MA ISEYUDO E YOR CHODE GI TIMBE MAG ANJAWO. MUCH NYAKOYI MANE OKONYO OYANGO, MOSI WUON AUMA GI ONGIRI MONDO OYAW WANG’U MAR NENO MARICHO DUTO MA I

USETIMO EI KIA MARU!

OKWEE…! Joka Nyanam!

* JAGORO, AJOS WUOD ATIGA, JALUO dot KOM

ORNWA PACHI KUOM WACHNI: WuonAbila@jaluo.com