Chwora yande odhi dala limbe e dwe mar aboro mokadhoni. Wach mane oduogo godo maduong' en ni tuo mar Ayaki (HIV/AIDS) nego jo thurwa mathoth ahinya. Chwora ne osomo Kwoyo Primary School, ei Kisumo, Karateng'. Onyisa ni kuom ji piero adek gi abiriyo (37) manene gitimo godo CPE 1970, ji auchiel (6) kende ema oyudo ni pod ngima, ji modong' ose tho. Mano nyiso ni mokadho 80% kuomgi ose tho. Kendo ng'eny gi Ayaki ema onego. 

Jothurwa wachni en wach malit miwuoro. Malich moloyo to koro ni nyithind Luo odong' kiye ei gweng' kata ei boma, onge konyruok.
An awuon mawuoyo kodu ni, owadwa maluwo bang'a tuo ni onego higni ariyo mokadho. Chiege oduogo oluwo bang'e higa mokadho. Nyathigi matin manene ginyuolo ka gituore tuo ni to koro nyo otho nyoro chak dwe mar aboro ka. Mano to bende onwang'o ka nyamera matin, maluwo bang' owadwa ni bende yande eka jo Nyakach oiko chak higa ni, to mana ne tuo ni. Owadwa oweyo nyithindo ariyo mapod ngima to nyamera bende oweyo nyithindo adek kiye.

Ang'eyo ni jomoko kuomu ose neno masira ma kata marwa ni ber berie. Agoyo nu mos ahinya kuom masiche u go bende. Ywak na koro to mana ni watem uru ahinya kaka oganda mondo walos yore manyalo konyo nyithindo madong' kiye gi mondo kik githo kech. To nikech adieri yath moro madi wawach ni oyudore ma di wakony godo jo thurwa sani to onge. Kisumo ku yande wachakoe od kiye "Orphanage".  Ka odhi maber to waparo mar chako moko kuonde mamoko. Ka nitieye ngat ma diher konyoe, kata diher chako moro gweng' gi to nyalo ndikona.

Akelo,Nyar Kager
jaluo@jaluo.com
Daher winjo dwondi in bende, iwinjo?

Ma en Leah ma koro to en nyathina ma ase chako loso wechege mondo akele
ira. Leah jonyuol ne ma hiye yande otho oweye higni ariyo mokadho.