| |
JOKA
NG'ATO
GI
TIM-GI.
-
Jandiko: Dr. B. M. O. Odhoji.
Erokamano
kuom miya thuolo mondo an bende achutie matin e twak korka chike kod timbe
nyikwa Ajwang'.
Kinde
mathoth, wa-winjo ka ogendini moko wacho pile ni, "Jo-Luo owinjore
lok timbe-gi moko mag doho nimar timbe-go kelone-gi thirno." Wachni
osebedo ma mit k'oporo ne jok'Owiny mit tinde ndandhu mare okwako koda Jo-Luo
buora. Penjo ma wa-nyalo penjore en ni, gin timbe mage ma owinjore jo-Luo
oloki? Ka en wach tero mon, mond-liete ma kwan-gi romo nade ma tinde
jo-Luo tero? To maduong' ahinya en ni ka Jo-Luo oseloko timbe-go, timbe
mag oganda mane ma owinjore giluw?
Kuom
pacha awuon, an aneno ni jogo ma oowore pile gi wach mar ni jo-Luo olok
kit-gi kod timbegi, nenore ni ok gilony ahinya kod kaka ogendini mathoth
chuogo chike ma giritore godo kaka joka-ng'ato. Kuom adiera, ji mathoth
thoro yalo "buch omera" k'chopo e timbe jomoko.
Japuonj
moro ma nyar Waindi, ma rieke bith pino, ajuoga Gayatri Chakravorty Spivak,
wacho gi dho-liech niya: "Every
definition or description of culture comes from the cultural assumptions
of the investigator." Ngeche ni ji mathoth thoro poro timbe
ogendini ma moko kaluwore gi kaka timbegi giwegi obet. Onjwech paka taon,
ma kwedo timbe jonyuolne mana nikech jo Hibrania ma jok'Owiny okwedo timbe-go,
loko ohand thirno kayiem.
Lony kod dongruok mar oganda thoro tenore gi chike kod timbe-gi mag doho.
Kuom ranyisi, Agak tho g'odeyo ma ja-Ulaya, omoko mana motegno e timbe-gi
machon. Min piny, Olisa nyar kingi, en ludh widhi, to mano ok omono-gi
yiero Aton wuod Bleya mondo omak-negi wi jowi e od bura maduong'! Paka
wang'e tindo man ugwe e piny Japan, chamo ogonglo to thedho nyamburko ma
kelonegi ombasa. Kata mana jo-Warabu, otweyo maninga, chamo chiemb lop-gi
to gilamo Nyasach-gi. Giyie nego dhano ka dipo nono ng'ato omolo-negi
gi kisech nyawana mag jo
Amerka. To ka wadok chien matin, fuonde chike kod timbe oganda chalo nade?
Mikayi
Chakravorty, nyar Ajwang' Roti: "Culture
is a package of largely unacknowledged assumptions, loosely held by a
loosely outlined group of people, mapping negotiations between the sacred
and the profane, and the relationship between the sexes." Ma
tiende niya, kit joka-ji en atonga m'oting'o chike kod timbe ma ogendini
m'opogore opogore oyiere-ye giwegi, ma konyo-gi e yore mag pogo timbe-gi
mag liswa kod mag chamo nyadhi kanyakla gi mag geng'o chiche e kind joma
min-ne kod joma chuo.
Omiyo
ka wang'iyo matut, jodongo machon n'oketo chike-gi kaka ogayi ma gayo
timbe ma gath kod mag njore ma nyalo kelo ahonda kata midekre e kanyakla
mar winjruok kod dongruok mar oganda. Kaka Mikayi Chakravorty wacho, chike-go
thoro bedo chike mag alung wich ma tayo oganda e kinde ka kinde. Mano e
tiend, pon alawa. Ok gin chike m'ogur ka loch
ka chike apar mag janabi, Musa. Chike jopiny lokore pile ka law
ng'ongruok. Ng'ongruok loko kite kaluwore gi kit dipo ma entiere kinde ka
kinde.
Jo
Wagunda n'omonjowa gi chike kod timbe ma yukni k'osuk minyaga. Arika wuon
Ogola-gi n'omolo-nwa kod loch okoche kod timbe-gi giwegi mit gi-gwenyo-wa
ma wiwa owil kod okaka mane Ramogi opidho! Timbewa mathoth nene ging'ulo
ni mago timbe ojuok, timbe wich diny mag Odiango Abuk. Mit nene gilokowa
dhogra, chi atera! Timbe-gi mag jo Farisai, mag Nikodemo wuod jo-Yahudi,
ema nene gi-yalo ni kelo lony.
Luoth-ni k'othinj um kama nene okelo gwindruok kod gwandruok e pinje
mathoth mag jo-rotenge.
Chakravorty:
"When the tendency to think of
our own culture as dynamic and other cultures as static is expressed by a
powerful group towards less powerful groups, a political problem arises."
Ngeche maler en ni, ka jogo m'omako loch ochako liethore ni gin ema
timbegi kelo lony, ni mag Odiango wuon Abuk to gin thirno lilo, mano e
kama mawi kod amen mar thulo okoche chakore-ye.
Lony
manyien thoro yuko ji. Loch Okoche n'olokowa Odino k'Owako. Mani e adhola
mapod chandowa nyaka chil kawuono.
Kaluwore
gi kit dongruok mar oganda, nyathi ma swedre ei ot kia gima timore oko.
Lony kod dongruok mar oganda idoyo tiende gi riekni ma joka-ng'ato sumo e
tunge piny. Ngeche ni ogendni mathoth medo gero doho-gi kaluwore gi riekni
manyien ma gi-hembo oko. Mani timore e piny ka piny. To wach ma migosi
ahinya en-ni timbe ma giyudo e tunge piny owinjore kony-gi e yor jwayo
mise ma nene giseko teno chon. Ok owinjore gibol chike-gi kod timbe-gi
duto ka pany kech. Mano kelo thirno.
Ka
nene ayaki ochopo e piny ka yako dhano, jok'Owiny ne lietho ni nyikwa
Ramogi lwar ka chwarni nimar ok giter rowere-gi nyangi. E kor higa mokalo,
osiepna moro ma wuod malo, rading' m'opong' k'ogwang kworo, n'ochopona gi
wach ma wendo niya, "Wuo nya Ka-Kan, adhi pacho." To kanene
anono matin to afwenyo ni jali dhi pacho nimar otero roweche nyangi
kaka kit-gi kod doho margi obet. Omiyo nene aruye mana mapiyo ni to
tero rawera nyangi biro konye kata konyo jothurgi e migawo mane? To kapok
dhoga olwar to wuod Dibuoro
sikul oseyaro lak ma tar k'obuonjo kendo k'owacho niya, "Wuonyo
wuo' nya Ka-kan, ka-ok ochot yiwe to tara nyaro tong' okunta!"
Ngeche, ka rawera ok ong'ol nyangi to dala-gi nyalo dong' gunda. Nimar
mano e kit joka-ji ma Busonga!!
Jok'Owiny
kendo nene osieko ni, Ramogi tero mon, ni mano ema omiyo ayaki nego-gi!
Magi gin ajare lilo ma luwore gi mrich m'otho e wi jo-libamba ma jo-fuong'
wach.
Mokuongo,
chuny ter tik tik ok en terruok.
Mar
ariyo, chik ter oseduon-no e dohi-ni mathoth mag Luo.
Mar
adek, ter ok land tuo ma ratego mar ayaki. Jalo ma wacho ni ter keyo ayaki
en jalo ma yanyo min-ne. Ayany mare chalo kama: chi-liel ka chi liel ayaki
ema olalo jaode. Ayany machielo en ni, dichuo madhi tero chi-liel ongo
ayaki, chi-liel ema nikod ayaki. Ayany mar adek en ni, ka ok oter chi-liel
to chi-liel ok bi terore ma ling' ling' gi ja libamba moro amora. Ooyo
nyakwar Ajwang', ere kaka in ing'eyo ni ka chik ter onge to chi liel ok bi
terore gi ja libamba? Ang'o m'omiyo jater ema ilawo mondo ikony ngimane?
Dak ilawee konyo koda ja libamba? Ang'o
m'omiyo ijaro min-ne kama?
Jothurwa,
nyikwa Ramogi, misumba tho arieya. Kik wapedh aming' ni ogawo. Kik
walokore fududu-fuong' afwuong'o ja ng'uono ne ajare jo k'Owiny. Jogo ma
jaro timbewa, gin bende
gi-dich okinyi g'odhiambo ka giyang'o
duong' rowech-gi ma nyiri. Githicho nyithind-gi ma nyiri oko e ute
puonjruok, nyithindo ma jo higni apar, ithicho oko ni odhi oruw mach ne
jodongo ma otikriri yiech min Munda!! Loko nyithindo wasumbini kama bende
en kit lony adiera? Kar tholo
kworo ni wakedo gi ja-kabut, wager-uru ute thieth kod ute puonjruok
thurwa, wang’ad riekni kaka wanyalo yudo yiend amwonya kod mag
aruda manyalo tieko yembe maricho man thurwa. Watemuru kaka wanyalo tieko
kech gi chandruok m’opogore opogore man thurwa.
Chakravorty
nya-k'Ogero: "On the level of
these loosely held assumptions and presuppositions, change is incessant.
But, as they change, these unwitting pre-suppositions become belief
systems, organized suppositions. Rituals coalesce to match, support, and
advance beliefs and suppositions. But these presuppositions also give us
the wherewithal to change our world, to innovate and create."
Ngeche niya, chike kod timbe ma tayo oganda gin ang'uola mar ng'ongruok,
gilokore kinde ka kinde. Katakamano, yie kod adiera ma waketo e chike-gi
miyowa jing'o mar winjo tiend riekni ma welo kendo e yore ma wanyalo bugo-go
chuny mise mane-ne wase kunyo.
Joka-ng'ato
gi tim-gi. Ka gihero yogore gi maro to nyare bende giyogore godo, mano en
tim-gi. To ka gi-sieko ni nyaka waluw timbe-gi, ni magwa oyugno kelo mana
thirno, ooyo ngang', apuoyo tin to goyo rude!! Timbe-wa moko, mana kaka
timbe moko mag jo-libamba, kelo lony gi chia e rang'iny m'odak ium g'odher.
Jothurwa, chuny achiel ema irito-go
kwach. Kwach nyalo lwar kuom ng'ato gi kogno m'ochwo chieng' mit jowetege
ma chuny-gi both-both ling e apudha, mino ng'wech ka gichomo pacho! Chuny
obed mana achiel ni ondiek to nyaka wa-nyam gi tong'!!
Asudi
Chakra nyar k'Ogero: "Most
people believe, even (or perhaps particularly) when they are being
cultural relativists, that creation and innovation is their own cultural
secret, whereas others are only determined by their cultures. This habit
is unavoidable. But if we aspire to be citizens of the world, we must
fight this habit." Ngeche niya, ji mathoth (to moloyo ahinya, Okuthe Nyamrieka,
m'ong'eyo maler ni oganda k'oganda nigi timbe-gi), thoro paro ni ogandagi
kende ema nigi timbe makelo lony kod dongruok, ni ogendini moko to timbegi
otweyo e loch achiel mar thirno. Paro ma kama okwako ji mathoth nimar
jagire ja sunga. To katakamano, ka wadwaro ni wadagi gi kwe, winjruok kod
genruok e kindwa kanyakla gi jo jo-libamba, ochuno ni nyaka wawe amila mag
akwede ma kama. Mano e chuny wach.
Oru
wuod aming'a chieng' moro n'ofweny-nwa ratiro ni ja-mak ng'et, kinde
mathoth, ok e jang'iew. Amina.
Odhoji@yahoo.com
(April,
2002)
Medwa Pachi; WuonAbila@jaluo.com
©Copyright, 2002, JALUO dot
KOM |
|