DALMAS OTIENO KUODO WI JOLUO

Jandiko; Mig. Ajos wuod Atiga

Seche ochopo ma koro nyaka watang’ kaka joluo kendo kaka nyikwa Omogi g’Awando Nyokal. Wach moro osemuomo wang’ kuom ndalo mokadho, jalo mane osebedo e od bura maduong’ (MP) Dalmas Otieno Anyango osebukore gi wang’ matek ni nyaka oriw mana okuche lwedo. Nyocha odhi owendo Ker Moi gi jodong aich moko ma kech olunyo, nyocha omedo twak gi ker Moi konyise ni jo-Nyanza duto oyie gi Uhuru mondo okaw kom mar Ker e yiero mabiro; apenji wuod Kangeso mano to wach ma owuok kanye? Ere jo-Nyanza mane oyie gi wachno? koso ka idhi awanya to dak ichom wuon pacho tir, we wuondori gi duond jopiny. Chom wach tir. Donge aparoni Moi yande oseriembi e dalano, ato idok sari nang’o? Wewa mos.

Kanyocha oyudo Otieno Anyango owuok dala Moi kochomo Rongo, ne gi yudo rwak mar orijre gi kite mane idiro gi lwedo Achuna Koyugi (Oyugis), ngw’ech mane oringore ne ok yot, koro mano nyiso maler ni wach mane gidhi omo dala Moi ok orwaki ei Luo mangima.

Giko juma mokadho nyocha lweny ogore e boma ma Homa Bay e kind jogo moyie gi pach Otieno Anyango e siasa mar akwede kod jogo ma riwo Agwambo lwedo. Akwayou joka Nyanam ni kik walok pachwa kuom paro mofuwo ma Otieno Anyango dwa kelo ei Luo eseche ma koro Moi bende osemer gi siasa. Kare ka tek to mondo wami kata mana Kibaki ombulu to ok wuod Otike (Uhuru). Koso wami wuod Nyandusi (Nyachae)? Kik uluor Amolo Tinga pod muomo gode, kendo en ema Moi oluore kuom oganda duto mantie e kanyakla mar RIWRUOK MAR LIUDU (Rainbow Alliance). Moi oseneno ka wuod Nyalego ok buog buogre, omiyo kiondko osegoyo wuod Odongo. Kinda e ng’wech!

Obokeni ok andiko mar kelo sigu e kind joluo to mana mar lero tiend weche madhi nyime kaluo, jogo ma chwako Otieno Anyango biro oye ndere to jogo machwako Amolo Tinga biro puoyo lajre. Gima duong’ en adieri kik wagalre to imuko odwa, od wadu ok iringi.

Chokruok ma galamoro notimore Kapkatet, kendo yawuot Luo ma dongo noyuoro budho, nyaka mwache ma riwo riwruok mar LIUDU bende nochopo kar rombgi; jogo mane ochopo gin; Ochieng Mbeo, Oburu Odinga, Kipkelia Kones, Simeon Nyachae, Saitoti, Khaniri, Osundwa, Sankori, Nyauchi Felix, Ochilo Ayacko kod joma moko, kendo Amolo tinga nomedo leroni ka Mig. Njenga Karume biro e chokruok ma Kasarani II to en bende obiro gwelo osiepege ariyo (Nyachae gi Kones). Mano gima biro bedo malit ne jogo machwako yiero mar Uhuru ahinya.

Kaka aneno ngw’ejni dhi Ker Moi oseneno ni nyaka oti gi rieko eka onyalo loyo yieroni, omiyo biro chune ni nyaka otem loso gi Agwambo kendo tiyo kode kanyakla. Mak mana Agwambo nyaka tang’ nikech jaduong’ni wiye ombachni onyalo heri kawuono to kiny to okiayi. Kaka ung’eyoni loch ok yud mos nyaka lweny gore, omiyo kik wadog chien ngang’.

Ker Moi dwaroni wuode (Gideon) ema mondo oti gi Uhuru e loch ma biro, ok bi bedo mayot kaka oparono, jo-Kenya ok gin le modak e bungu! Sani ji osetang’ kendo Moi nyaka lok pache. Kuom wach mar loko chike Kenya manyocha Mig. Ghai osepuodho nenore ni yiero nyalo bedo e bwo chike manyien, mak mana ni Moi to odagi kendo oumo iye piny ni chike manyien ok nyal tiyo e Kenya. Gin chike ma jorachere modak Ulaya ema nyalo tiyogo. Wanto kata kamano gin ema wadwarogi.

Tulo mane owuok Homa Bay omiyo wawito wuoyi ma ratipo, mig. Kennedy Odhiambo, ere gima omiyo nyaka wachwer remo e tuk siasa, donge wanyalo loso wechegi gi kwe? Nyikwa Ramogi medwa pachu kuom wachni; bende uyie ni Uhuru nyaka water kaka Mig. Otieno Anyango wachoni? Koso Agwambo ema watero? Mago to gi mamoko med somo kodwa!

Jandiko; Adoyo Adoyo,

Amor wuod Atiga ka asomo wuodhi ma dala e kinde manok manyocha in kodwa kaeni. Guok to ochung' kodwa ataro to mak mana kaka nene anyisi ka wan migwena e bao kenyatta estate kacha ni wachung' kar tiendwa, mano ema ringo. Adwa medo ne Luo man dala ka kod Luo man oko ni Agwambo ose yudo lwedo mang'eny moa kata kuom joma ne ok dware,kendo kata kuom ogendni mamoko, sama igo lweny to nitie matindo tindo mabe nitie e diere kanyo, inyalo loyi e ma moko to gikone ni to nigik kama idwa dhie. Lweny ma Agwambo goyo ok lwenj Agwambo kende, en lwenj oganda to en lwenj piny mangima bende.

An agone sarut kata ok oyude e seche gi to atwa ma wagoyo to wagoyo, lweny eka ochakore to pod obiro gore ndalo mathoth nyime kanyo, to bende en ng'we kedi ma iringo to bang'e ibolo kedi ne ng'ato machielo bende oringe. Adwa kwayo jowa man oko kod dhok maboyo ni owewa waywe, to ka gin gimopogore to gibi gitem wanane kaka gigoye kae towapimonegi onwa moromo kodgi. Joma wuoyo ka ni oko kendo wacho weche maketho maok losi deung'wononwae yawa.

Wuod Atiga aweyi gi mago wabiro medo twak e ndalo mabiro go, to kata
kamano gore to dhi, lweny marwa wate.

Adoyo-Adoyo-Alendu, School, kobura Kano

Medwa paro; WuonAbila@jaluo.com