JALUO dot KOM

DUOKO: KENDRUOK  E KIND KANU GI NDP

  Weche motelo:

Kendo mano doko wach ma mit wacho! Kaluwore gi twak ma nyocha owuok e Abila kuom wach Kendruok e kind wuoyi ma jamibadhi kod Nyarwa ma nyocha wadendo adenda mak waluong’o gi nyinge,  Adundo Nyanam, jaber puothe tin!. Amor kuom yudo duoko ma galamoro mowuok e tunge piny koni gi kocha kuom wachno. Meduru somo wechego mwalo kanyo kaka yawuotwa omedo pachgi kuom wach kendno.

  Jaduong’ Abila, Ajos wuod Atiga  WuonAbila@jaluo.com

Motuo Wuondo Manumu ni ginim.

  Jaduong’ Abila an aleronu ni Nyuomruokni ket gi "TUK-NIMO EIPII"(Abal). KANU otuo to NDP numu koro rit unee gima biro timore.Ochuri to chamuruachama,miel bende mieluruamiela muruu piny, to kawan'g udhii nindo kogwen nekech uruyo piny to sano ema uyi dhawo gi oporo kod ndweru mapiny lich nono chal ma okwal jamni,kawan'g jii (NDP) buok enindo cha mondo giyuor to yudo ka weche omuome maok onee kaka onyalo konyo kendo ma ekata kaka nende itimo e NAWI,BILO&KORO.Yie uru wachun'g kar tiendwa motegno.Par uru osiep mane wuod Josep miluongoni YESU notimo kod YUDA, kama bende ekaka noyudo Ajuma kanende Kenya yudo loch.

Dhano duto on'geyo ber mar dak e kwee to mak mana kayangruok malong’o otimore (Transparency) e kind jogogo,winjruok madiera kaka nende ilerocha ni NDP oyudo wuowi ma janyombo maok oaa kama oriere.Oromo mondo iparni ndhogruok mano timore e kind wuod Josep kod Yuda no ne en ndiko mabiro chopo kuom dhano ! ma kawuonogi(wan).An aparoni gima sirkal do timo en mana loko bug piny(Constitution)mondo ogol thuolo mar MAJIMBOISM maa egima Tinga dogone lweny motegno bende ma eyoo ma Jarachar osetiyogo ma oneno ber, (Rapar:-USA,UK etc.). Jaduong' Abila an kamaa ekaka anene.  

Jandiko; Oriko Douglas Majwala, majwalasenior@yahoo.co.uk

Jandiko; Gordon Okoth,

Wach kendni omako dhoga nono. Ok wang'eyo gima biro timore nyime kanyo. Kata kamano, an to an gi yie ni kata obedo ni nyarwa okaw gi ng'at ma ogajore, duto nyalo lokore ka nyarwa oridore kendo ochiwore ni kido marichogo duto nyaka owe maka tek to arus rumo. Kiserani bor, osetieko higni ang'uen ka jogi serore kendo ma e higa mar abich (1997-2002) ka jo kisera dhi koni gi koni kaloso weche. Omiyo aparo ni gise loso kendo gichopo e adiera  ni kajuok to oweyo, ka kuo to oweyo, ka miriambo to oweyo, ka nek to oweyo to gi timbe mamoko mag maundu machalo kamano.

Migosi Ajos wuon Abila wacho ni: "Mano ber mak mana ni ochal gi jakuo ma oyudo batiso konyume e pi kato bang' ndalo ariyo to ochako okwalo! Donge en mana jakuo machon chande? Tiende ni owuok e pi kaka jakuo ma ng'ich to ka pigno osetwo to oduogo mana e loye machon chande. Puonj kuom nyombo wacho maler ni nyaka wuoyi yier dala ma odhi kende kik okend nyar jajuok, jakuo, janek, jabilo, jamibadhi, k.m.m..."

An gi kora to aneno ni ka ng'ato osehero nyar ng'ato kata wuod ng'ato to nyaka odimbre. Ok onyal bedo ni odhi nyime gi miriambo. Nono to ekaka kendruokno orumo gikanyo. Mar ariyo, ka wakawo ranyisi mar Jo-Kristo mar yudo batiso, wangeyo ni ng'ato nyalo bet ni ne ng'at marach chuth e gwen'g to kata kamano ka oyie gichunye duto kendo olokore, inyalo miye batiso kendo obedo achiel kuom jogo moyiedhi nikech ngimane olokore. Ok wanyal bet ka wang'iyo timbene machon. Ooyo chakre karlokruokne, nyaka wang'i mana ni to ochako ngima manyien koso (Som barup Paolo mokuongo ni jo Korintho 5:17). Mano e yudo batiso madieri. Ka ok odak kamano to ochal mana gi atudo (oyoyo) ma ikiro pi etoke to duto lak dhi elowo maok omulo ringre. Kanyo onge batiso. Ka kamano e kaka wuoyi en to arus onge ogandawa.

Omiyo an to dawach ni waket uru wang' wa kendo wane ni to weche dhi nadi. Piny pod okinyi ma ok onego wamond uru ka wang'ado bura ni wuoyini. Nyarwa ose lime, gi se loso kendo ka oyie to nyaka bed ni ne onyise gima wan kendo gima waduaro kendo wahero. Omiyo kane owacho ni oyie tieko chikego to nyaka orit mana gima ne giwinjore. Kaok kamano to nyarwa wakawo kapok obulo ng'or.

Korka wach okuche to aneno ka igi kayogi. Wan jo Luo akoni ni ok wafuwo. Inyalo wuondowa dichiel to mar ariyo to igalori ndii. Omiyo ka koro gineno ni wathir kodgi ka iw diel, omiyo koro gisiemowa. Ka lweny to wan e jo lweny omiyo kik gibuogwa. Ogandawa opong'o Kibera to ka ineno kaka gidak to iyi ema kayi. Bang'e to nengo ute orid tititi. Amolo nyaka ti atiya kaluwore gi chik mar lowo kendo en gi duol mar loso kaka jatelo mar gwen'g Langata. Ero okuchego sieme kendo puso dhogi to akoni ni kapo ka gir kiragi ni gimulo Amolo to piny orumo. Nairobi ok nyal dong' nono mak jaluo ochung'ie. Omiyo onge gima Amolo dhi omo Bondo. Oburu ni Bondo kendo ji be ng'eny manyalo chun'g Bondo. Nairobi ema waduare yawuowi mochodore oko kaka Amolo.

Mogik, daher mar luongo oganda Luo duto ni waried uru ban'g Amolo. Wachun'g kama rach. Yawuotwa opogore. Raila gi koni to Orengo gi kocha. Ma e lweny mager e kind okuyu ni jo Nyeri ni kamaler Kibaki e wuoyi to jo Murang'a ni wewachona onge wuoyi malo Matiba. Kapo ni jogi ochopo e achiel ma oriwore to wadon'g haa. Wadhi uru duto ban'g Raila Amolo mondo omi odni ogerre manyien. En ot ma otimo mbuyi mathoth kendo nyaka yueye ma muone manyien. Wabed uru gi yie ni nyarwa nyalo loko odni mabed manyien adier maji penjni ma be e ot mane wang'eyoga cha adier?

Lweny ger. Wuoth pod bor omiyo kik wanyosre uru. Be kik wawe jowasigu kaachiel gi josem donji e wachni miketh weche. Tue uru okanda jokanyanam.

An Mig. Okoth wuod Asembo.

Wuon Abila,

Jandiko Otieno K'Arunga,

Mor Matamre ginono. Milome adonjo kendo dwarore ni wawinjre ei nyakalondo mana chutho. Jowa duto kama gintiere onego obed gi Aput, kendo wayud paro kaa ka gikacha. An awuon kod jogo machiegni koda oyie ni kama koro wachopoe ni miyowa ranyisi ni weche mag piny dhi maber. Luoro onge.

Kanu Manyien en marwa kar chakruok. Ne wagure kendo pod entiere, miyo nyaka wadogi ei nonro mare. Jogo ma goyoe koko ema nyaka wasom kod angolo mar tian'g. To bende ungeyo ni ruto mar Ogwal ne pok atamo dhok modho.

Miyo mokwongo, an daher puodho kama watundoe. To en wuoth mabor kendo ma chuanyoe tielo nyalo bedoe. Geno en ni kogno ok eno ridhree. Mar ariyo, en ni diber matamre gi nono ka ekindwa kaka jo-mane owuotho koluwo aora kendo kachamo rech to dhi, dan'g winjre muti Riwo Kwot kamoro amora mawantie. Seche nok kendo dwarore ni ikruok mar ombulu ng'i girieko malan'g. Dibedi sigana ma pek kada bedi ni wanyalo bedo gi jowuot kod nyi onagi madidonji eod bura koa namchumbi nyaka tarime kendo koa malo kindwa gi dala Garan'g nyaka bwo piny.

Ka uchopo kabwana, ikreuru ni ban'g nyasi to aput ubedogo ma goyo picha mar gigo mabiro nyime. Agwambo kod jowa manikode e eod bura kachiel gi piny owacho magwa mag gwenge onego ong'e ni wan bende wan machiegni. Ting'o tat dero dwaro jo saga ma ogwendegi oriemo kendo omadho nyuka chutho. Ochopo sama kore nyaka wawe go ndeee, jowa duto onego ochungi okwangi gi tim.

Nyakwar Odero

otienokarunga@hotmail.com

  Medwa paro; WuonAbila@jaluo.com

© 2002, All Rights Reserved, JALUO dot KOM