JALUO dot KOM

NG’AT MOFUWO CHIEMB NG’AMA RIEK

Jandiko; Jaduong’ Abila,

Nyasi pile en kama oganda chokore mondo gi yud migago molosi ne welo modhial. Kata sani nyasi maduong’ ma tamre gi nono dhi nyime sani e piny joka Kingi, Olisa Ragwel Nyargi Abeka timo nyasi mar tichne kendo bedo min piny Ingeresa kod pinje mag Kanyakla mar mula (commonwealth) kuom higni 50 nyaka ochak tichne higa mar 1952.

Kenya bende wuod Odongo chunye geto ni mondo otem jolo kom mar ker mondo omi otim nyasi mar higni 25 kaka ker mar Kenya kendo mar bedo jaod bura mong’irore kuom higni madirom piero abich gi wiye.

Kata kamano mago duto gin mana gombo mar chuny, gima rachna ni mago duto dwaro omuom mondo omi welo oyud migago ma nimba, to jopiny kech nego ma kata kuonde moko to kata pi ema ok yude nyaka kawuono. Mano to wuod Odongo omiyo wang’e kendo owachoni oserito piny Kenya kendo okelo dongruok mathoth ahinya, koro gima akia nito dongruok en:

·        kawo pesa jopiny tero e pinje ma oko,

·        koso mayo jogo ma onge gi nyalo lopegi kendo miyo jodong aich?

·        Koso mayo chi liel matin ma chuore owene nikech oong’e gi duol?

·        Miyo jo-od bura maduong’ (MPs) masara ma galamoro to jopiny iriembo e tijegi!

Mano to ok lichna nyikwa Ramogi gima adwaro wacho en ma; odiechieng’ ma nyoro ne oyudo asomo od mbuyi moro mit ayudo ka jo-Maasai bende tinde olokore joma miyo pinje ma chandore kony (IMF – World Bank) kuom mwandu ma gin godo. Rawera moro ma wuok Trans Mara odhi owuoyo gi jogweng’gi ni owinjore gi kony Amerka nikech yande giyudo chandruok kuom mbom mane joge Osama Onyango wuod Laden omuocho higa mokadho. Konyo to ber ndi mak manani to ikonyo ng’at mak dwar kony!

Jo-Maasai nyocha okonyo jo-Amerka gi dhok 15, kata kamano dhogego onge VISA mar donjo Amerka kuom mano ibiro chwadgi not Kenya kato omuom inyalo kony godo jogo ma dwaro kony, koro ere tiende miyo ja-mwandu chiemo maok odwar chamo? Ng’at mofuwo chiemb ng’ama riek, sani koro jo-Amerka biro wuondore ni gin osiepe Maasai to kare ging’eyo gima gidwaro kuomgi.

Ka nyocha mbom omuoch Nyorobi monego yawa mathoth to jo-Amerka notamore ni yawa ok nyal kony kata matin. Koro sani to jo-Maasaigi oneno ang’o ma omiyo nyaka gikony mana jo-Amerka? Mano apimo managi koth machwe e dier nam Lolwe ma kata chew dweche ariyo mak chogi to lokruok ni koro nam opong’ pukore oko to ong’e. Ng’at mofuwo chiemb ng’at mariek, ochalo dhiang’ minego kawelo odonjo e dala. Yawuoyi chuto ring’o to dhiang’ to ngimane orumo.

Ere gimane omiyo Maasai nyaka mi Amerka kony? Bende gidwaro kony mar dhok adier? Dhoge maasai gi dhok man Amerka ere man gi nengo ma malo? Kare koro dak gitergi Amerka kuno? Mano fuwo mar wuondo muofu gi kado to ichamo ringo itieko.

OGULMANA OMAYO BUOCH DHAKO!

Jandiko; Ajos wuod Atiga

Wach miwuoro otimore e od ng’ado bura man Oyugis, distrik ma Rachuonyo ka ogulmana moro ochung’ e nyim kot (court) kendo omedo lero malong’o gima omiyo omayo nyawadgi dhako. Nowachoni wuoyino yande buoch mak nind gi chiege kuom mano dhako noneno ni onge kaka onyalo dak gi dhako wadgi mak lone riyo mar del. Kare kik wase mon chuo bende samoro lokore ming’li.

Mig. George Abeka okawo mikayi Monica Achieng’ Opiyo ma yande jaod Mig. Solomon Jabuya kendo onyuolo godo nyithindo nimar Mig. Jabuya yande ok nyal loyo ne nyakoni rich del, nindruok. Mig. Abeka omedo wachone okil maloka ni kaber to onego wachni otiek piyo nimar odwaro mondo koro onyuomre gi jadiyane ma yande jaod Mig. Jabuya.

Nyadendi Achieng’ nomedo lerone jang’ad bura (judge) ni chuore machon yande buoch ema omiyo odwaro kend manyien. Kendo oseyudo nyithindo ariyo gi Mig. Abeka kuom mano oneno ni mondo gi kendre. Jang’ad Bura mong’irore Moluor Njagi nowachoni bura ibiro ng’adi dwe 02.07.02 mirima nomako Mig. Jabuya kuom winjo wachno ahinya.

Od ng’ado burano noyudo weche otime newa; Mig. Samuel Oriedo nong’ad ne ong’adne bura kuom yude gi keth mar nego chiege Mikayi Martha Achieng’ Onyango e chiro mar Kagwa. Odiechieng’no bende noyudo Mig. Odhiambo Muma bende nong’adne bura kuom negi Mig. Christopher Odula e od math ma Safari Bar e boma ma Oyugis.

JATELO SUNKULI OTIMO LIMBE E DALA MAR INDIA

Jandiko; Mig. Eliud Nyabwa,

Moluor Migosi Julius Ole Sunkuli nyocha otimo limbe manimba e dala mar piny abonyo ka.  Ndege ma otingo' jatelo ne odonjo e paw ndeke mar Indira Gadhi chieng' tarik 27-5-2002.  E paw ndeke ne oromne kod jachung' mar Kenya e piny India moluor Lazarus Amayo. Jatelo ma bende en ema ochung' ne weche mag lueny ei opis mar ker ne owuotho kod wuon mare mare.

Bang' kane odonjo, ne otimo twak kod ogai ma ochung'ne weche mag tulo e piny India migosi George Fernandes.  Bange' ne odhi nyime kod wuodhe nyaka e boma mar Bangalore kama ne otimo e twak mopogore opogore kod jolweny mag India ka ong'iyo dongruok ma India nitie godo e yore mag kedo. 

Ka omedo timo limbe mare, jatelo ei ofis mar ker ne ofuyo nyaka e boma machielo ma iluongo ni Puna kama ne oluonge kaka e wendo e sewo jotiegruok ma owuok e pinje ma oko ma somo e bomano e skund tiegruok ma iluongo ni Symbiosis.  Ka pok ochopo e kar nyasino, jatelo ne oromo kod nyithind Kenya masomo e bomano kendo otimo kodgi twak ma kende.  Ne omiyo oganda ma oa kenya thuolo mondo openj weche manyalo bedo ni chandogi e dala mar India kod Kenya. 

E wuodheno, ne otimo twak kod jatelo maduong' mar skul mar tiegruokno Moluor Majumdar.  Ne odhi nyime ka okwaye ni mondo oyaw bad kar somono e piny mar Kenya mondo kik
nyithindo bed kod  pek ahinya mar wuoth.

   Eliud Nyabwa

MEDWA PARO; WuonAbila@jaluo.com

© 2002, JALUO dot KOM