kend140202

JALUO dot KOM

Od Wadu

KENDRUOK E KIND KANU GI NDP

Jaduong' Abila, Jaluo dot Kom,

Nyoro jo od bura mag NDP oyiedhore mondo kendruok e kindgi gi KANU odhi nyime kaka nyocha osechan, nyasi mar kend biro timore tarik 18.03.02. Kendruokni biro nyuolo riwruok (party) manyien miluongo ni "New Kanu" (KANU Manyien).

Mano ber mak mana ni ochal gi jakuo ma oyudo batiso konyume e pi kato bang' ndalo ariyo to ochako okwalo! Donge en mana jakuo machon chande? Tiende ni owuok e pi kaka jakuo ma ng'ich to ka pigno osetwo to oduogo mana e loye machon chande. Puonj kuom nyombo wacho maler ni nyaka wuoyi yier dala ma odhi kende kik okend nyar jajuok, jakuo, janek, jabilo, jamibadhi, k.m.m... Sani koro ochopo kama nyarwa ma nyocha wadendo oyudo kend gi wuoyi ma jo-dalagi obam, koro mano doko tim!

Jakom burano (wuon dala) biro bedo ja-Kanu, jagoro mong'irore (mikach dala) biro bedo ja-NDP, mano wach ma warito ahinya kaka eno bedi! Miend kisera (National Delegate Conference) biro bedo e siwandha man e boma ma buore ka meja (Nairobi). Wechegi nochopo kaluwore gi dwar mane jo-gam 17 (commitee) osewinjore gi jo-NDP gi KANU kanyakla

Wach kendno ok mor jodong' Aich (OLD GUARDS) kata matin. Okuche bende wachno wang'o igi ahinya kendo gise siemo wang' Agwambo ni obiro romo gi mak olwer. Kendo gikwayoni mondo owe bedo ja od bura mar Langa'ata, nika odagi to gibiro chude olando mak wiye nowil godo, giwachoni mondo odhi thurgi Kisumo; Kare Lang'ata en piny Okuyu koso mar Masai? Wachni timore nikech Amollo pingo wach mar jogo ma mayo jopiny kuom kawo omuom ma galamoro e ute mag dak man Kibera.

Nyikwa Ramogi aweyou gi mago, kendo waromuru e nyasi mar kendruok e boma ma Nyorobi, osetweyo patis gi okanda bende arido nimar such agoko awinjo ka osechakore, ochuri bende aneno ka osebagi gi andiwo motimo kachieng'. Yawuot Luo man buore waromuru chieng'ono; Paddy Ahenda, Aduma Okil, Ayako, Nyauchi, Ayoki, Sam Kotiende, Onyango K'Oyoo, Adoyo Adoyo, k.m.m. kik wiu wil gi wuon Abila abiro kan nauru andiwo ten moro bende ayud ka oikna nikech ang'eyoni ji biro yuoro mathoth.

Meda paro kuom wachno; WuonAbila@jaluo.com