ker221101

JALUO dot KOM

 Od Wadu

KER MOI OLOKO LOCH KENYA KA GIR TUGO; Jagoro, Jaluo dot Kom
Okweuru uduto joka nya nam, nyikwa Omogi g'Awando Nyokal, Nyikwa Podho en mor maduong' ahinya mar kawo thuolo machal kama mondo atwag kodu e odundu mar Jaluo dot Kom; weche thoth ma onego walosie makmana ni kawuono to wabiro loso ethuond weche ariyogi (1)Loch Kenya kod lokruok (2) Budho ma biro timore e Boma ma Kisumo.

1. LOCH KENYA OCHOMO KANYE; Wang' odhiambo ma kawuono redio lando, odundu mar Nation bende ondiko, gasede duto man Kenya odhianjo maduong' kuom wach loko kombe mag Wajumbe (ministas). Oyier wuod Otike minista, Jatok Kodera ma yande oyanyo wuod Odongo radar bende oyudo kom mar minista. Nyadundo moro ma yande dhoge ng'eny bende oyudo chwat matin kata kamano pod omiye kojolo moro matin kaka jarit mula kod kite mawuok e lowo. Wuod Ajuma pod omako dag mach; kata kamano omiye wuoyi moro mondo otaye kik mach wang'e! Ato thuondi ariyo bende itede agulu achiel?

Wuod Ochuonyo to pod omako kar chano weche mag omuom kod nweng'o mar Piny Owacho. Nyakwar Girango moro bende oyudo resruok kuom mako kom mar rito Omuom. Mago kod moko ma osetimore kawuono; nyisowa maler kaka loch osemero wuod Odongo kod lange, gikawo Kenya mana ka giro tugo.

Wajumbe bende tich osemero nimar gin giwegi ema ginyalo bukore to gi ng'ado bura mondo omedgi omenda ma galamoro; sani nweng'o mar mjumbe (MP) nyalo romo Kshs. 450,000 edwe achiel, kendo machiegni bende nyocha gi ng'ado bura kuom wach moro mondo omi giyud yo mar ng'iewo ute eyo mayot kuom ndalo ma pod gin e kombe. Mago duto gitimo to wigi owil gi jogo mane oyierogi e kombego. Higa manyien biro, yawuoyi koro dwa chako rudore e pap ka gilaro kombe e gwenge. Akwayo jodongo gi mine duto, kijende kod nyiri man e gwenge kuonde duto ni kik uyier jowuoro ma biro miyo kech negu to ok gidewu. Kik iyier ng'ato nikech iye duong' kata nikech ong'ere gi jatelo moro,kta nikech en japesa, kata nikech omiyi ratuon ma ibiro tiyo godo odiechieng' achiel kende to kiny to ok odewi. Yier ng'at man gi chuny mar konyo oganda e yor dongruok.

Wuod Odongo temo tiyo gi rawere moko matindo miluongo gi dho-ngere ni Young Turks mondo omi oyud thuolo mar rito piny aming'a, raweregi bende koro oselokore jomibadhi nimar mila bende koro gisechako milore e kind jodongo ma mbese wuonegi! Nyithindwa kik omuom din wang'u mit unyumwa e bugo kayiem nono; Tang'uru joka nya nam piny osemer!

 

(2) NYASI MA KISUMO; Penjo en nito bende onego wabed mamor gi nyasino? Duoko yot; Ooyo, ok onego wabed mamor kata matin nimar gik mathoth ma pok ochopo kare mondo omi wabed gi nyasi mar higni 100 nyaka chak boma ma Kisumo; kanyalo wacho moko matin kaka:

  • Kar molasses okwamo, pok otieki, Raila osesolo pesa mar chake to eregima gisetimo nyaka sani?
  • Kicomi ogore piny nikech ich lach mar acham athonago.
  • Lake Basin dong'e opodho!
  • Ofise mag muspal ma Kisumo okwamo pok oger nikech jo-kiyaka mane omuko pesa olal godo miru.
  • Ombuk Nam (ford) odino nam kaka ji lupi onge, kata yiedhi ok nyal ringo eyo mayot.
  • Pi modho maler onge e boma ma Kisumo.
  • Chope mag losruok nok, omiyo tuoche landore.
  • Sikunde mag tiegruok nok.
  • Osiptende onge yedhe moromo.
  • Kambe moa oko ting'o rech duto tero e pinje ma loka.
  • Nderni okethore.

Mago to gi ma moko ma ok anyal wacho sani nyisowa maler ni ONGE MOR MA WAN GODO KUOM NYASINO KATA MATIN! Kare gima duong' ma wabiro neno en mana jo-thum ma biro moro jopiny kende.  Jomoko biro wachoni agolo dug odwa oko to ka ot ng'we to donge nyaka lwoke? Kain kod paro moro machielo to tem otudri kodwa WuonAbila@jaluo.com warito winjo pachi nyakwar Ramogi.

NGWONO gi KWE Mar Nyakalaga!

Ajos wuod Atiga,

Jagoro, Jaluo dot Kom