RWAKO NYAKO PACHO BANG’ KISERA

Jaduong' Abila,

Mathoth osewachore, jopingo osepingo, jolungo oselungo, jokihata osehato weche, jomilunga bende oselungo ma tamre gi nono! Saa ochopo ma koro nyaka warwak nyarwa pacho bang’ riso ma nyocha oseyudo gi wuoyi mane oyiero kende. An kaka ja libamba mane ok ogwel e nyasi mar riso atemo luwora e tiend siro mar gama ka bende inyalo yawna dhoot. Yawuoyi gi nyiri mane ochopo e nyasino bende wichkuot omako e gono otamre leronwa kaka ne giwuotho! Kata kamano ageno ni ne giwuotho maber.

Omuom ma yande owinjore wachoki koro ok ane tiende mondo ochoke mana kaka migosi Onyango Oluoch leronu ni `Kaka koro wase bedo jo kanu ,to kendo wang’eyo ni kanu e sirikal,onge tiende mondo waor pesa ne NDP nikech waonge kod NDP. Pesa ma waoro ni kanu, onge kaka wanyalo ng’eyo kaka otiyo. Omiyo kaka wase iko NDP , solro mar pesa onge tiende. Wami yawuotwa manie kanu manyien ombulu kod chunywa mondo wane ane kuma piny ochomo kodwa.´ jandiko; Mig. Onyango Oluoch, Italy.

Mig. Nyabwa bende oseoronwa oboke ka medo jiwo wach mar riwruok NDP gi Kanu mak mana omedo leroni ka dipo ni MOI outgo gi Agwambo moweyo e lwet jo-miganga to mano e kaka wan bende warumo; kendo omedo wachoni, AN GIMA ANYISI NI KA MOI OWEYO AMOLLO E LWET JO MIGANGA TO NDP BE ONGE, KORO GIMA JO LUO NYANZA OTIM EN MANA NI WADHI IR YOWERI KAGUTA MUSEVENI MONDO LUO NYANZA KORO OBED EI UGANDA NIKECH MANO TUGO MA OK WANYAL KORO KOD MUACHE. BANG' KA MANO OSETIM TO WACHAKO TULO GI PINY MAR KENYA MA WATIEKI. MA EN WUOD NYAR NAYA KANDIKO KOA E PINY ABONYO MA INDIA

Kata kamano nitie jogo ma bende neno mana ni omuom to pod nyaka wasol asola kaka Mig. Otieno Mbare ma bende achiel kuom bura mar NDP ma nyocha waseiko temo leroni Thura, Ayie ahinya kuom keto account mane aoroni e jaluo.com mondo yawa osom. Kata kamano, ok ayie kod penjo ma iketo mbele ka. Kaka jachungo, mago ema owinjo ichungi igol oko nikech bang' ka ng'ato oaesomo weche mag pingo machalo kamano, ok apar ka onyalo konyo party. Ogendini sani konyo parties maginie kod interests, omiyo in bende ageno ni nyaka ing'i ahinya interests magwa. Kuom Mano akwayi ni account ema iwene jogo ma nyalo chudo, to weche ma iketo mbele go to igol oko; ageno mano e yo ma wanyalo konyo godo NDP. Ka ihero keto duond jopingo kod akweda - to oonge kuma wagikie thura! Erokamano. Jandiko Mig. Otieno Mbare, Finland.

Nyikwa Ramogi amedo leronu ni ok aping’ wach riwruok mar NDP gi Kanu mak mana ni atemo keto jo-Piny e ler mondo kik ywak wuog bang’e nito omuom mane wachoko otiyo ang’o? Kata Odhi kanye? Kaka ywak osebedo kuom ndalo mokadho kuom solro mosebedo ka timore e tung’ pinyje koni gi kocha. Gir ariwa jakel dhawo. Kik wachal joma olo pi e nam gi agwata to kata koth machwe to e mane pok opong’o nam. Mano chalo jo-kanisa ma solo sadaka to jadolo dhigo kachode, mano koro iwachoni pesano okonyo kanisa koso okonyo jadolo e yor chode?

Wan kaka jodong’ Abila mar Jaluo dot Kom warwako riwruok mar Agwambo gi Kanu Nyowuoyo, mak mana wuondo wang’ ema ok wadwar, weche iketo mana e lela. Kuom mano wadwaro yudo ler kuom rawere moko ma nyocha obukore njawo Mig. Otieno Anyango wuod Kangeso kayiem nono, to gima otimo bende onge, yie umiwa ler kaka wachno nobedo, kare ka riwruokno en mana mar akwede to ok wanyal yie kode kata matin!

Mig. Sam Kotiende wuod Kanyango bende noorona oboke ei Abila ka komedo nyisa ni giyie gi riwruok mar Kanu gi NDP ahinya kendo gibiro tiyo kanyakla kaka jobura madwaro gero Luo Nyanza. Nomedo gona ngero moroni; Oigla geto Kabange, tiend ngeroni ng’eny; esechegi yawuoyi koro osechako manyo yor laro kombe mag lejiko kod kansil omiyo ng’wech iye tek kaluo, yawuoyi machal Asam Kotiende gini e joma nyalo ting’o Kasipul malo, omiyo riwgiuru lwedo.

Kaka sani weche mag kisera oserumo koro warwako nyarwa dala gi wuoyi ma nyocha oseyiero mondo odag godo, mich ma duong’ ma wanyalo miye en mana gweth mondo oyud kwe e ot ma gibiro dakie kanyakla. Kata obedo ni wuoyino rarondo kamano to koro mang’eny waweuru Nyikwa Ramogi, wachak wuoth kanyakla kaka joot moyiedhi nimar loch mar Kenya to koro wachiegni kawo, kik wadoguru chien joka Nyanam.

Wach mogik dhine Amollo wuod Oganda; Wuod Jaduong’ piny duto orwaki kendo oroni mos mar puoch gi pak kuom kom ma nyocha ikawo e lwet jorabuon mana e lela ka chieng’ rieny, yie iriw dhout Luo duto kod jo-Kenya mangima, maonge akwede, ich lit, kata guondo. Wageno ni hap Ruodhwa gi much Nyakoyi biro medi teko mar tich gi mijing’o mar neno ler e ndalo mabiro. Obong’o Nyakalaga mondo Olagi ndalo duto!

Medwa Pachi; WuonAbila@jaluo.com