JALUO dot KOM

JOLUO RITO KETH NYAKENO

Jandiko Mig. Ajos wuod Atiga

  Ayogou nyikwa Ramogi Ajwang’ kamoro amora ma untie, weche omuomowa kaka wachi onge, joluo rito keth nyakeno! Nyocha eka atemo lungonu kae kuom wach Nyasi mar kisera to jopingo nowachoni mago joma ok ohero dongruok mar jopiny, ato sani to koro ere? Barupe donjonwa kae okinyi gotieno kuom wach mar kawo loch mar Kenya bang’ Ker MOI.

  Lang’ Amolo Tinga ywak ni Moi olokonegi ng’eye? Ooyo, ok en kamano jaduong’no goyo mipich wich, to lang’ Amolo goyo mipich tielo omiyo gigwenyore matin. Anto ok ane rach kata matin. Donge nasewachoni manumu wuodo motwa? Donge nawachoni ni Manga oromogi Magare e dier Nam? Donge nawachoni nyasi mar kisera e kind nyako gi wuoyi ma jamibadhi  nitiere wuondruok? Ato sani to koro ere jorabuon ema sani thum wero yawa sani ywago opiu malando to wuod Odongo oling’ ka matuo!

  Donge nawuoyo kuom Nyabondo moher ema oyieyo ng’ado? Bende ne uwinjo? Ooyo, thothji nowachoni mago thoth weche! Wang’ni to koro ochopo e wang’e! Dok chien chako NDP machielo bende koro tek, dhi nyime gi jomibadhi bende koro oridore, ato wana tim nang’o? Duoko yot; beduru kar tiendu yieruru ng’atono moromo telo; obed Amolo, Ochuodho, Orengo, Ochilo, Aringo kod ma moko, kotamore to miuru Ajos wuod Atiga loch mondo otau, mak mana ni anto akia diro kite ka lweny owuok Kamukunji, omiyo abiro mana bedo janeno kaka yawa ringo ng’we yamo.

  Mig. Oluoch nooronwa oboke kowuok dala mar Italia nomedo wachoni kare wadhialuru AJIM wuod Agenya Ratego koso wadhial Ochuodho wuod Kagan? Mago duto gin paro mag ji. Ombulu ema biro yiero jotelo. Kata kamano beduru ka ung’eyoni jokuoye ombulu bende nitiere, mak mana ni adieri to ok tow osiko nyaka chieng’.

  Joluo kik parni mano e giko mar nwango loch Kenya kaka yande mosenindo Jaramogi owacho, kata tek ma nade to Jorabuon to kik dog e loch, sani koro wuod Otike ema ipako. Jaluo rembe kech ng’ama oyie kodwa ei Kenya to onge. Koro wanatim nang’o. Gima ber bedo gi “Majimbo kato wagero Nyanza mondo obed ranyisi ne dhoudi ma moko”. Moloyo rito piny mak ruu!

Gima duong’ ma daher wacho en ni Moi koro sani wuondo Okuche ni wuodgi ema imiyo telo iparoni jolang’o to lojno gibiro weyo mayot! Okuche to sani koro mor kaka giseyudo loch mano bende anyisou ni gin mana ajwa ema Ker Moi goyo. Adieri ng’eyo tek.

  Wach mogik dhi ne Raila Amolo Odinga, Jaduong’ wakwayi ni ketwa e ler mondo omi wang’e kuma wach ochomo nimar wan e mudho wakia ni nowuondu mana gi kombe kaka minista kod masara ma dongo dongo to jopiny odong’ e mudho. Yie inyiswa kuma yamo ochomo. Koso wadok Misiri? Duoko kayot owadgi Akinyi.

 MEDWA PACHI; WuonAbila@jaluo.com

© 2002, JALUO dot KOM