Japuonj Julius Kambarage Nyerere, ma yande en ker mar Tanzania chakre giyud loch  1961 nyaka 1985, nyasaye nyoro okawo chunye e kama ne onwang'e thieth London, UK., kuom tuo mar remo. Japuonj owewa ka en kod higni 77. Piny ngima oyuago tho mar japuonj, nimar japuonj en ng'a ma ji omiyo ga luor ahinya kaka jatelo maduong' ma timbene oriere.

Nyerere bende oluor ahinya nimar en achiel kuom  jorotenge adek ei Africa mangima ma ne oweyo loch ni ng'at machielo kapod ongima mondo omi obende onuangie thuolo mar yweyo. Machielo en Sengor ma Senegal to gi Jaduong' Mandela ma South Africa. 

Kambarage wuod jo Zanaki en ng'ama yande okawo ngima mayot ndi. Kendo kata ndalo ma ne en  Ker mar piny, samoro kata ka iwuotho e ndara Daresalaam kanyo samoro ipo mana ka irado kode ka owuotho gi tiende, samoro ka oriembo ndiga.
Dala to ema ne oloso kaka Ruoth ma chon. E gweng'gi Butiama ka, machiegni gi Musoma, ne ogere dalane,gin  kiru buora madongo dongo ma oum wigi mana gi lumb buoye, to kor gi en kidi mar kamasia.

An kaka Jaluo, gima ok dariambi, ni Nyerere ne otimonuae marach kaka anyuola en ma. Yawuoyi ma nene otemo loko loch mararacha mar Moi 1982 ne oringo odhi opondo gweng'  Nyerere ka Kenya wa koro ne obiro maliet. Mano kama oting'o Ochuka, wuod Nyakach kod lange. To kar rwakogi, kata pandogi, kata ketogi e jela, to Kambarage ne ogologi gi ng'wech mit oduokogi ni Moi.To mane wuod onjelo onegogi pep chade to. Mani to ne Nyerere ohango!

A, ero koro to ndalo ochopo. Nyakalaga ong'won ne e magi bende.
 

Akelo,Nyar Kager
jaluo@jaluo.com