Tho mar meya machon ma Kisumu, Migosi Lawrence Oile nyiso weche mang'eny ahinya ma osiko wuok ga ekinde ma jaluo otho. Migosi Oile nyocha otho tarik 4, chak dwe ni. To weche mag tungo wich ochakore mana ka wach mar tho ne owuok ni i.

Mokuongo, jogweng' matekre gi ng'eny ne odhi omonjo dhako maduong' manyinge Susana, mana ma wach ochopo ni Oile otho ni i. Nene gidhi kuom dhako ni ka gitwaro mana ka kwach ni owuog oko mondo ochak ne gweng' goyo nduru. To dhakoni ne okwedo wachni ka owachoni "Ooyo, an, an gi Ruoth Yesu, owara, ok anyal ywago chuora ka ja kafiri".  Mit jogweng' winjo! Ne githulo dhani oko ka gigole e ode kor kamach kuma ne opondoe.  Ne gichune ni chik Luo nyaka okuong goyo nduru eka jomamoko ochak ywak, to ne otamore. Mit hawi maber nyieke moro omuomore gi nduru. Kata koro ng'ur gi juolo wang' pod nitie kamano to jodongo mag gweng' wacho ni ose timore.

To ndalo okadho adi ka weche moko pok owuok?  Dhano koro yande ochokore loso wach mar iko wuod Luo ni. To owadgi Oile maduong' manyinge Keffa Obadha ni bukre gi wach manyien.  Nokel wach ni wuod wuon gi miluongo ni Max Modi onyiso jodala ni chi Oile mokuongo mane giwerego ma nyinge Jostine Akinyi nyaka duogi e dala kanyo. Modi dugo ni mani ka ok nyal timre to gibiro kawo ringre Oile mit gidhi gi ike loka aora kumoro nono. Jostine Akinyi ni to adieri ne en chi Oile, kendo nyotgi g'Oile gin ariyo, wuoyi miluongo ni Eddy man Uganda, kod nyako ma nyinge Jackline. To dhani kane ose were gi Oile, ne okende kamoro nono ma chuore machieloni bende ne ose tho. Ndaloni to odak kod jater. Koro Modi dwaro ni nyaka duog Jostine pacho ma gerne ode kaka dhako maduong'  k'Oile ka,  ka pok oik Oile. Mit welo mobiro e liel di chogi ni jo Kisumo oromo gi gi weche, to kara podi. Awe piny imre tich ariyo ma nyocha, tarik 9.

Josomo koro ogolo bura Tieng're dala g'Oile, gitero bura Town Hall, Kisumo, ni dala koko ng'enyie, gidwaro yiero kamiti mar iko. Kanyo oting'o meya ma Kisumo machon, Migosi George Olilo; jalup meya machon, Migosi Lazaro Owino; Laktar Fred Naffa Owino; jatend Kanu ma Kisumo, Migosi Ogonda Osir; kansila Odungi Randa, meya ma sani Ogendo Ponge; jatend jok'Oile ma Uganda, Migosi Martin Odhiambo to gi jogweng' buora kod jo' Opira bende. Kamiti mar iko ni kendo adhong' odwa wuokie. Ni Lazaro Owino owache ni mondo Ogonda Osir obed telo mar kamiti ni! Mit jo NDP winjo, ohangore nadi ni ja Kanu otel e kamiti!! Tho!!! Weuru wach.

Yawa joka Nya' Nam yaye, to wamako piny matek kama nang'o?
Odundo wuod Sidigu.