JALUO dot KOM

RIWRUOK E TEKO

Jaduong’ Abila,

Riwruok e kind NDP gi KANU en gima nyasi kendo joluo duto pako wachno e piny ma ngima, waduto ma wasomo mbuyi mar jaluo dot kom wasebedo ka wasomo weche duto ma ji osewacho kochakore kar kend margi nyaka koro ochopo kama warito neno nya mar olemb riwruok, mana kaka mig. Silas Onyango medo leronu mwalo kanyo;

Wuon Abila,
                    An kod ilo kuom somo oboke kod weche mathoth mantie e Jaluo-do-kom. An kod sunga e chunya ahinya. Mar ariyo, en wach riwruok mar duonde mag Kanu kod NDP. Mang’eny ose wachi kuom riwruokni. Gima Joramogi onego ong'e malong'o kod paro matut en KWE mantiere e piny Joka nyanam esechgi. Nyaka Mig. Raila chak chiedho kod Ker Moi, oganda Joka nyanam ni kod kue. Koko mayandi lich Kisumu orumo. Ang'o maber maloyo kwe ka nitiere e gweng'? Waweuru paro mana ni riwruok onego okelnwa TELO mar piny, to wapar kaka di wati kod riwruokni mondo wager godo pinywa. Kuom goyo ombulu mabiro, ng'ato ka ng'ato ong'eyo kuma chunye nitiere, ombulu en siri. Yowuowi biro gwere e pap, omiyo ng'at ma ihero ema iteno tiende. Gima daher paro ni Joka Nyanam ni Owadgi Akinyi to temo. Pinywa olokore moloyo kakane oyudo kane ochako wuotho kod Ker. Wan bende mawan oko, wadhiuru dala mondo wanee kod wang'wa moloyo somo baraupe mondiki kende- water Pesa wager dala. Wuon Abila amor kuom wuoyo kod jowa e duond Jaluo dot kom
Ean
Silas Nyabwala Onyango (s_onyango@hotmail.com)
England

E thuolo ma koro paro duto ng’iyo mana nito loch ochomo kanye, odhi Nam koso odhi tok Kodera? Koso jo Got ema kawe? Ng’at ma biro kawe to ok lich en mana kwe ema wadwaro kaka Mig. Silas Onyango oseleronu malo kanyo. Amolo Tinga bende nyocha oselero ni obiro tiyo ne jopiny e kom moro amora ma enoyudo e loch manyien. Kik wane ni yawuotwa man oko kaka Orengo gi Ochuodho timo marach ooyo! gin bende gimanyo piny kama gimako bende wabiro yudoe konyruok. Kik loch manyien lok tokgi ne jodong’ Luo ma nyocha nitiere e KANU machon kaka; Dalmas Otieno wuod Kangeso, Ndolo Ayah kod ma moko ma nyocha ok oyudo kombe e yiero mane otimore Kasarani dwe mokadho. Riwruok e teko joka Nyanam, kik ich lit pog ogandawa.

NINDO OD WUOYI

Mopogore gi weche mag riwruok, Mig. Omollo Olala  leronwa kaka oneno wach mar NINDO OD WUOYI pache ok opogore gi ma nyocha wasendiko koro unyalo somo pache owuon kuom wachno. Mak mana ni anto pod adagi gi wach moroni wuoro nyalo nindo e od wuode, ok onyis lony mar kitwa gi timbewa. Kik walokre mwache nikech lony mar jodak, kata jowagunda mane okelo dongruok manyien.

Donge wanyalo ng'iyo chike kaluwore kod ndalo matinde wadakie. Jogo madong' ka otegno gin jogo manyalo lokre kod kinde (evolve with time) nikech wadakie e piny ma survival en mana for the fittest. Ere kaka wanyalo rito chike wa, ma ok wayudo ka weche tek matam wang'?

Abiro temo chiwo paro mara e wach mar wuoro nindo eod wuoyi. e ndalo ma chon jaluo ne odak e ot ma "O". Ne onge kor nindo kata kor tedo. Kane idonjoe e od jaluo to ne inyalo neno gik moko tetete. Od no ne ok dung' kendo kata pasia ne onge. Omiyo ne jaluo ofwenyo ni mondo kik rach moro timre kod jogo mawaluoro, wa ket chike. Maani ema omiyo jaluo ne owacho ni ok onego wuoro onind eod wuode, rach ahinya kawuode onge. Sani koro wadakie e piny ma inyalo dak e ot achiel kod ng'ato to gama opogore, nikech ji odakie gorofa, kata mana ot man kod gama maopogore kata obedo ni ok en gorofa. Omiyo an aneno ni ka tek ma otamore gi wang'e, to jaduong' nyalo lawo nindo e room mantiere e od wuode. Tek ni obed mabor makoro jogi ok nyal nen dug jowetegi.  We watem ng'iye kamaa kendo, oyiene wuoro kata miyo mondo nindo otere e od wuode gi odiochieng' nang'o? Nikech sano onge duk moro ma inyalo nee.

omollo@stud.ntnu.no
An Olala Omollo wuod Nyakach.

TERO DHAKO

Mig. Olala Omollo medo wach kuom TERO DHAKO manyocha asendikonu, wuoyini ndiko dholuo nyowuoyo mak mana ni kuonde moko to omedo gi dho FWOT-FWOT omiyo ka obayi to tem imanye olerni tiend wechego anto gitama loko nikech an dhokno ok aberie ahinya, kata kamano abiro penjo jabatha moro mondo olerna gima gin. Ero med somo wach kuom TER mwalo kanyo;

Tie ter ne ochakore ka ne joluo dar ka oyaa malo giluwo Nile mos.  Ne gi romo kod ogandni mamoko magigoyo godo lweny. omiyo nenitiere yawuowi mane tho gande.  Kane gi chopo kama ne onego gilosie kar dak to ne en ting' yawuowi mane odong' mondo mon duto oyud kar dak. Omiyo mondo ne opog tijnono, yuoro moro ne chung' e ting' dhako moro, kata mon moko mane chwo gi osekalo. Maani e kaka tero ne ochakore. Ne en mondo monde wa oyud kar dak kata bang' tho wa. Ka wang'iyo piny sani to wayudo ni ok en neccessary ndalo moko mondo dhako oter nikech the basics ma odwaro she can provide for her own self. Omiyo ter sani onego obed yiero ng'ato. To maduong' ma ogik, onego wapar ni tinde ne en mondo miyo no oyud konyruok ok ni mondo jater oyud kar kado maleny, kata an extra bam sama weche ok yot eode. This was just a by the way.

omollo@stud.ntnu.no
Omollo wuod Nyakach

Medwa Paro; WuonAbila@jaluo.com

© Copyright, 2002, Jaluo dot Kom