JALUO dot KOM

Erokamano ne nyikwa Omogi kod jondiko ma kawuono olimowa ei Abila kawuononi. Mak mana daher mar kwayo yawa nika uoro oboke to temuru nono nyukta ka pok uorogi nikech samoro weche thoth ma tamo kata Jodong Abila puodho kendo loso kier mar nyukta to gi both mar dhok. Omiyo temuru ndiko weche machiek kendo mojing' ma josomo mawa nyalo yudo tiend wach e yo ma yot kendo mondo omiwa tich ma yot mar ketogi e kor yamo.

Mos ma kende dhine, Mig. Sam Kotiende, Kansila Oyugis, kendo aoronegi kuyo gi lit mar wito Mig. Ascanas Ondiegi Oduk e dala mar Kanyango (Nyahera SDA). Mos machielo dhine jaduong' Buop Oyola wuod Adhere kuom wito migogo ma nyocha oyudo dak Kamagambo, Nyakalaga mondo omigi kar yweyo nyaka wuodhwa mar romo kodgi chopi

Arreddo Nyang' wuod Asumbi bende aorone mos mogundho kuom weche ma waseyudo kawuono med mana dhi nyime gi tich ma berno. Odoyo wuod Karungu Sori bende aduokone erokamano kuom oboke ma wayudo kowuok Norway, kinda e ng'wech. Kasujaa Onyonyi bende amedo miyo mosna ma kende kuom jiwo joluo korka siasa ma sani ochuo chieng' e piny Kenya.

Mig. Dan Ojwang' bende ayogo gi mos ma ratipo, mak mana ni ok ang'eyo gima omiyo imiyowa mana penj to duoko to onge? Bende inyalo lokonwa dhoch kuom Penj mitemo chano kanyogo? Kare koro ere gima omiyo wan ema nyaka luchwa chodi mar manyo duoko to in kaka wuon wach to ong'wel gi chien! Tuognwa pier yath korka wan bende wayware gi yoka wiye!

Abila iye ochacho kaka Koffi wuod Oloo Ominde bende ochacho gi TchaTcho, kawuono Mikayi moro bende noywana tol kawuono komedo puoyo tich mong'ith ma tiyore e Jaluo dot Kom, simuno ayudo kowuok e boma ma Geneva e piny Switzerland. Kata wuod Odongo bende puoyo tijni natemo manye kawuono e yor nyakalondo mar lwedo (mobile) to ayudo ni gidich e od Bura mwalo Australia. Ayudo mana duoko moro e kor yamo ma wachoni; "Ogothap Kalinjin thugul, Subaa...! Mami ng'ale! wachno nomora ahinya kendo abiro temo manye kendo, kare koporeson en gima ber nyowuoyo tinde wanyalo losogi Piny Owacho eyo ma nyamonge kama!

Jaduong' Abila, Jaluo dot Kom

WuonAbila@jaluo.com

NDP/KANU KELO LOKRUOK E PINY LUO

Asomo kod sironyo weche ma jothurwa owacho ekend makende ma osechando chuny ji mang’eny. Mar ariyo, akawo thuoloni makende mondo aduokne jogo mane ochako migawoni mar onagi mondo gilos malingling maggi mak nagato ma achach owinjogi.

Kaka ungeyo, higani wan kod yiero makende mapok ne otimore E Kenya kuom higni mathoth. Ma en nikech moluor mogik Ker Daniel Arap Moi osetieko migawo mare mar loch kendo dhi yuoyo oko mar telo. Jogo madhi chung duto gin jok mapok ne obedo ker. Ma miyo gibedo jok marom epiem mar ker.

Ka aloso matin ewach kendruok mar NDP kod KANU, chunya nikod ilo mokalo nikech en wach ma mitie kendo ogajore mana ka ii radio.

Ka achiwo sigana matin mar onagi e weche sisa mag akwede kod thagruok ma waseyudo, kendruogni en wach ma iye tut mokalo.

Ehiga 1992, ne wakwayo jo Rabuon mondo omiwa lwedo mondo wayomb ker Moi, to ne gidagi e wng achiel.Kane Ngire Anyang Nyon'go kod jomamoko ne odhi London loso kod Matiba mondo oduogi oriwre gi Jaramogi mondo gikaw loch kendo jalno matuo (Matiba) ne bet oseyie, George Nyanja kod lange ne olichore odhi oneno Matiba kendo owachone mathoth kaka jo Kenya rite mondo obi otelnegi.

Chiengnogo mane KSN Matiba onyono lowo mar paw ndege mar Jomo Kenyatta, ne en wach malich miwuoro. Nyanja gini ne oomo ji tung duto mar piny jo rabuon kendo paw ndege ne opong miwuoro mond onyis Matiba ne adiera piny nikode. Ma ne opogo duond riwruok mar FORD kendo siasa mar kwedo no olo.

Kata obet ni yawuot jo rabuon moko kaka Paul Kibugi Muite ne nikodwa, ombuchgi mathoth ne gimiyo wuodgi Matiba.

E higa 1997, siasa ne ochouyo ching nikech yiero maduong mane timore. En adier ni e sisa mag akwede, onge kabila kata achiel ma oseloyo onagi e kawo piny owacho gi tunge ewang achiel. Higani ne rach kod onagi ahiinya. Mokwongo, dwe 7.7, jogo maluongore ni NCEC (National Convention Executive Council) ne oluongo bura magalamoro kar yweyo mogundho (Central Park) Nairobi mondo ginyis jopiny chenro margi mar kawo telo gi dound sisa mar akwede.

To nikech ne pok ogol chik mar yudo oboke mar timo bura (permit), ogulmama ne opowore apoya nono kendo dhano ne ogo siwaya. Ji 29 ne omeki chiengno. Kuom jogi duti, ji 28 ne gin onagi ma tiende ni adek kuom ang'wen (three quarters) mar joma ne nitie e burani ne gin onagi. jogo ma osebedo kawcho no gin kodwa kanyakla; jo rabuon, ne okichore mana gichien mondo gikwal gikmoko ka weche okethore.

Malit moloyo en ni jogo mane oluongo burani (NCEC) ne ok odewo wach joma ne omaki nikech buchgi. Ngano gini ma gin jo NCEC? Ngire Kivutha Kibwana, Ajuoga Willy Mutunga, Ajuoga Gibson Kamau Kuria, Pheroz Nawrjee kod mamaoko. Jogi duto ma andikogi gin okil manyalo chungne ngato e kot. To ne ok gidewo. Nango? "Mano wach onagi. Giwuondore ni wigi tek. We gicham thuongi". Ne en Migosi James Aggrey Orengo enmene oneno ka remo pek moloyo pi mi odhi ochung ne jogi kendo kene NDP ochako loso kod thuon gweno, Migosi Ajuoga Shem Ochuodho ne okwayo ni gi chuny maler, jogo mane omaki mondo owe kendo ne piny owach otimo kamano.

E higano bende emene duond siasa mar akwede otimone onagi achiel ewi apar. Duond siasani ne nikod buchgi madundo Ufungamano mar many kaka ginyalo riwore mondo gigol thuon gweno. Bange migosi Jilo Falana kod migosi George Moseti Anyona ne owuok gi riuruok moro ni IPPG (inter parties parliamentary group). Ma ne en yo mariek mar thuongweno mondo owuond duond siasa makwedogi mondo one ni giyie lokrouk. DP kotelnegi gi Emilio Mwai Kibaki  ne othoro ngwech oa Ufungamano odhi e od bura kendo lokrouk moko ne otim. Mokwongo, ne gigolo chik mar many oboke (permit) kuom ogulmama eka ilos kod jopiny. Mar ariyo, ne gingado ni jochung ne yiero (electoral commissioners) imedo kendo riuoruok ka riuruok (parties) ne tero nying jogi.

To nikech ne ok odwar lalo thuoloni makende mar bedo gi jaiye e migawo ni, Migosi Raila Odinga ne otomo ng'wech matek ko odok e od bura mondo oyudie thuolo mar tero ngato kanyo to "ngowu" George Anyona ne owachone gi dho ngere ni "You cannot reap where you did not sow. You were not party to these deliberetions so please forget any nominee". Kata obet ni Agwambo ne temo loso kod Emilio gini mondo ochodne lemo, ne gidagi, kendo kuom jochung 22 onge onagi kata achiel.NDP kende e duond riuruok mane odong Ufungamano. Mangeny wibiro pimo mos mos. Kapok waloso e wach kendruogni, waparuru mosetimore gi mabiro timore mondo wawuoth e ler.

Jandiko Kasujaa Onyonyi

SIGANA ORWENYA JOLUO YAWA

  Jaduong’ Abila, Pod amedo mana mosou uduto ni Okwe uru. Gima awuoro en ni sigana rwenyo yawa ma joluo. Asebedo ka alimo mbui marwa nikech ne uselosonwago, koro nyaka warite. To rito "page" mar sigana otamowa.

  Daher penjo Joluo ni "Wachiko kune? Be wangeyo kuma wadhiye, to nga ma otelonwa e yoo?"

  Ndalo ma chon puonj ne imiyo rowere (wahia) e yor ngero kod sigana. Mani nyiso gima omiyo pod ipuonjo "Literarture" e kar tiegruok ma diere to gi ma ranginy ma malo (Secondary and Universities) mondo wange sigendniwa gi chikewa.

  Wan Joluo ka koro waseloso mbui ma marwa mondo wamakgodo wach to koro jochik obeto ne wach otamore.

  Ok en gima odhi kare ka "page" mar sigana bedo mana gi sigendni abich kende.

  Kwayo mara debed ni kanyalore to:

  1. watudre uru gi skunde kuma inyalo makie sigana gi ramak wach (tape recorder)kaeto bange ioronugo. Gini inyalo kete kaka piem ne skunde mag Luo mondo wayud sigendni mathoth. Piemni inyalo kete ka luwore gi higni mag nyithindo ma puonjo re e Lower Primary.

  2. Inyolo many jodongo machon gi mine machon mapod nyalo paro sigendni luo mondo oholwa rieko.

  3. Mogik wanyalo timo nonro e karkano manene mag chike luo mondo wayud sigendni ma moko.

  4. Yoo moro amora ma demi wayud ngero gi sigendni.

  Nitiere bende jii mathoth ma ohero winjo sigana. An kod paro ni bende ne jo abila dilosie kaka imyalo lok sigendnigi e dho odiero mondo mii ji mamoko oyudie wechegi? Maendi biro miya Joluo ma dhogi gi sigendnigi rwenyo duog e abila.

  Ang'eyo maler ni sigendni thoth ma onengo or e mbuyi. Koro yiero en mar Joluo. Watem rito mise mar Ramogi kwarwa, nikech angeyo maler ni dine ok ogano ne nyikwaye, dine ok wachako "page" mar sigendini luo.

  Erokamano Wuon Abila.

An Arreddo Nyang' Kibaa Ramba

  Arreddo Nyang'

  "YOU CALL ME ARREDDO NYANG, I'LL RESPOND!" Permanent Address: Box 36 Rangwe, Homabay Kenya Current Address: Box 10531-00100 GPO, Nairobi.        Phone: (254-02) 723219, 719384 http://www.angelfire.com/ar3/frednyanganga

RWENYO KUOM KITWA GI TIMBEWA

 MIG. OPIYO PETER <opiyopeter@yahoo.com>

Edhiringinyini akau thuolo mar goyo erokamano ne jodalawa ma oneno niber mondo joka nyanam obed gi kama gi nyalo ndikie epach gi maen dongruok maduong kabisa.

  Kaka kijana mapod yot, kendo temo luo gik mane kwerewa okwero abiro wuoyo kuom migosi marwa mochung kor kadier mar ngima,ekinde mosekadhogo ne asomo ei oboke

mafwambo to fuongo mar joka rabuon miluongo ni standard ei obokeni migosi muga ne ochiwo atwak korka tero joluo nyangi kendo ne ochiwo gima omiyo mano nyaka tim, ne othimbele kowacho ni pieno otingo takataka mayiyo tuo mar matiek teko mar med ruok,ne adwa penyo joka nyanam kama tuo mar matiekani manyiso ni en mana epiny luo majiok oter nyangi koso gini omako piny ngima? joluo wetena nyaka warit chikewa mane kwerewa oweyo dhoot ka dhoot nigi chikegi ang'o momiyo dang' wakop jomoko.

Kapod achiwo tuak daer mar paro ne ogandawa mar luo ni gimoro amora matimore epinyka ok buog nyakalaga omiyo chenro mare onge ngama nyalo kadho kane ochano ni matieka nyaka teri onge konyo nyaka to idhi,mak mana ni nyaka wabed motang kendo wabedie achiel kaka kwerewa netimo, epinyka onge ngama wacho adieri gimoro amora ma ng'ato owacho mano pache,to an gi luoro kadang wasel chikewa wabiro dong kawadiedo.

Ang'eyo oganda mar luo oluoro dho kendo kadho odonjo sano esama omanyo kanisa to omanyo ajuoga mabiro nyise ni owadu kata wuoro kata meru moro ema onyononi piny,kaeto ichako selo mwandu matin maingo kaok iparo ni joma ibiro weyo to biro betnade gima nyaka wangi ahinya jokanyanam eni katuo odonjo tem idhi hospital mondo opimi onyisi chal mantie moloyo tero pesa kajuoga to ingeyo maber nikonyo onge, kawatimo ma dongruok biro bedo ekind oganda mar luo,abiro tieko gikanyo to nyaka wapar wuoth marwa kawaya sudan.oriti uru nyikwa ramogi, mogolo twak en peter opiyo luomba maya edala mar

karungu sori to odak norway.

  luomba opiyo peter,                                                  sandvika-Norway.

ORI ORAMO NI NYAKA TO!

Mig. Sam Otiende, Kansila Oyugis Kasipul (Rachuonyo) samkotiende@yahoo.com

  NE OGANDA LUO DUTO KOD JOGO MATUDORE KODWA E OD MBUI AGOMBO NI MONDO APAR NE UDUTO NI SIASA MA KENYA ONIANG KENDO YAWA OSECHAKO KEDO E OKANG MA MALO.

CHUTHO KAMA WANTIERE SANI ,WAN KOD GENO MATHOTH NIMAR OGANDA MAMOKO WANGNI OYIE MAR RIWO WA LWEDO.

MOTELO, E KOM MAR GORO MADUONG MAR CHAMA MANYIEN WAN KOD YIE NI KAMOTHO BIRO JOK KOGIK NI TIELO APAR KOD ARIYO KAMA KANOGO WANG'E E BATHE TO OK NONE NG'ATO ANG'ATA MOYIE MAR RIWE LWEDO. NYAKA JOMURANGA RIWO UHURU WUOD KENYATTA LWEDO TO WUOD KER NI BENDE RIWO WUOD JADUONG LWEDO.

JUMA MOKADHO NYOCHA WUOTHO TOK KODERA KOTEMO SERO WUOD MUDAVADI TO NE OKWERE NI WUOD JADUONG EMANYAKA RIW LWEDO MANE ODOK KA OKUYO. CHO, KA WAGOYO WANGWA NAM CHUMBI,SHARIFF TAIB WUOD NASSIR NYOCHA NE OSERIWO WUOD JADUONG’ LWEDO KA ACHIEL GI JONAM CHUMBI.

KAR CHAKRUOK, NDP NI KOD LANGE 1500 KAR 4500 MAG KANU TIENDE NI EN KWAN MAR 1:3 OMIYO ONYALO YUDO KOM MORO AMORA MANE ODWAR,TO KA WACHAKO WAMEDO JOKANU MA NYANZA MA BENDE NYOCHA NIKODWA E WUOTH MAR NYANZA JUMA MOKADHO, TO KORO OTIAP. CHUTHO NI NGATNO MADWARO KOM TO NYAKA WUO MANA GI WUOD OGANDA AMOLLO KIT MIKAI E YO MAKARE EKA NOTONY OMIYO KAMOTHO KIK CHAND PACHWA.

MAR ARIYO EN NI KOM MAR GORO EMA SANI KORO LUWO JAKOM KOD TEKO MA KACHIENG IDWARO NGATNO MADI CHUNG KAKA KER KA JAKOM OK CHUNG TO KALUWORE GI RIEKO MA ING'ADO MAPIYO GINI KWANY JALO MALUWO JAKOM GI TEKO E CHENRO MAR CHAMA MANOBED AGWAMBO.

AKWAYO YAWA DUTO NI WASETEMO KEDO MONDO JOPINY ONG'AD OMBULU KENDO SANI KORO WANADUOG IRU MONDO UKONYA KEDO.

NE JOGO DUTO MANDIKO KENDO JIWO WA ADUOKO EROKAMANO.

EAN MOGENOU,

CLLR.SAM RATENG' OKOTH KOTIENDE

OYUGIS.

PENJO NE JOPINY

 Mig. Duncan Ojwang’
      
Penjo;

1. Jomage maneinyieo gi ksh 1000                                                              2. jomage mosedhir eyor somo moloyo ji te!                                          3. Ng'a nonego Ouko?                                                                                   4. loch mane mana onego Mboya?                                                             5. Ang'o omakne Jaramogi gi 'pyjama' kotemo kelo?                            6. Ng'a ochamo pesa ji mar Molases enga?                                                7. Ohuru kenyatta en wuodnga?                                                                  8. to ngama jaduong Odinga owene tich?                                                 9. nga ogojowa mana matiyonegi ma mime otingo wi chuogi okapu? 10. Loyo Kamotho toango ngamaonge kate bunge? 

duoko; dojwang@iusb.edu  

© 2002, All Rights Reserved, Jaluo dot Kom