JEXJALUO ****
POGRUOK OK BI KONYOWA
Asetemo nono oboke ma yawa oro kuom wach referendum mar joluo.
En adieri ni pinywa ok osebedo gi dongruok maber nikech telo ma ok ratiro
mar mosenindo Otike gi wuod Odongo. Jotelogo ne osin gi piny onagi. Weche
dongruok kaka sikunde, ndara, ut thieth kata yawa mane omie telo ne nok e
kinde go duto.
Gigi ema miyo yawa moko koro wuoyo e wach referendum; ka jomoko neno ni
wapog piny Jokanyanam mondo ochung kende, to yawa moko be neno ni ooyo.
Pogruok ma kama ok nyal konyowa nikech ka wadwa pogore mana nikech wechego
to koro bang’ dong’ kendwa donge dhoutwa wawegi kaka Kano, Kisumo, Alego,
Ugenya, Nyakach, Gem gi moko modong’ be biro mana dwaro ni opogre nikech Jo
dho ot achiel biro neno ni telo mantie ok ger pinygi; Kata ni gin gipuro Pamba
ma iuso pinje ma oko omiyo Piny gi onego bed gi dongruok ma oloyo dhoudi ma
moko? To Jo Kisumo donge nyalo neno ni gin ema gin e dho nam magolo rech ma
iuso e pinje ma oko?
Koro yawa jo Thurwa pogruok ma kama ka wachako to wabiro pogore nyaka kar
ang’o? Pinje riwore wan to wawuoyo e pogruok. To koso ng’ato ka tuo to imanyo
yath ma change koso ma nege? Ka telo ne ok ma kare e piny Kenya to mano ok
ofulo ni dhout Kenya opogre mondo ochak Pinje gi, mano en yath ma chango
koso manego?
Gik ma ose aa e piny Luo ka gero Kenya ng’eny. To koro wadwaro ni wawe gi
wachak achiel? Wachako gero Universities, International Air Ports, Ut thieth
madongo, Otende, gi ma moko to koso wadwa kelo lweny mar pogo gigo e kindwa
gi dhoudi moko? To koso nyocha wago mana mbaka? Wuod Atiga be en adieri ni
udwa ni watim referendum mar bedo gi pinywa wawegi?
An aneno ni nyocha wasetimo matek ma loch oloki. Koro watiuru matek gi loch
manyien, wager Piny Kenya. Yawa man od bura gi jotelo duto oti e ratiro.
Dongruok oter maromre ne dho udi duto man e tunge duto mag Piny Kenya.
Richo ma telo ma okalogo oweyo to ok nyal rumo dichiel. Gibiro rumo mos
mos. Mak mana ni jogo man e telo sani kik tim ketho ma ne jo ma oteloneg otimo!
Aweu gi matin go
Kwe kende Nyikwa dani.
Abok Nyakwar Arodi Nyochola.
Ka in gi mari moro ma di wandik ka to orni
Akelo,Nyar
Kager
jaluo@jaluo.com
Daher winjo dwondi in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.