JEXJALUO ****
Wuon Abila,
Yie igona ne Nyikwa Ramogi dhok ni weche ma koro temo tungo wiwa kawuono ni wayier Orengo kata Kibaki ok onego obedi wach matek kata matin. Kaka nyocha ose timore, nyaka wangi wach kwano mar kura mar Kenya mangima, eyo madhoudi moko dhi bolo godo ombulu. Wangeyo ni dhoudi moko pod ochich kodwa ema omiyo negidagi goyo ne Jaramogi kata Agwambo ombulu mar ker igni mokalo. Ka ginyalo hero Orengo igani, to an bende damor amora gi yawa mamoko. Ma ok nenre ni nyalo timore ema omiyo nyocha wayie ni Agwambo, Nyongo, Omino, Kajwang kod Ajim owuon ne oyud kaka ne wanyalo riwo kwano malongo kaka nyikwa Ramogi madonji gi gwenge mamoko. Ma e wuoth manyoro otero wa Nyeri. Bura ni nyocha ose rumo joma dwa dwoko wa chien chalo joma go thum nyabondo tiang. Rem manyoro obet e yiero matin kik mi wawit piny luo kendo gi chandruok mar chan, tuoche kod kia momako jaluo kawuono. Ajim wami mana ragenya odoge lakin dhowa oriwre achiel ei bunge kaka jo Narc.
Kata nende yier Ajim kaka ker, kombe ma Ajim laro mag bunge te gin piero aboro gi abich kende e piny Kenya mangima. Koro wawuondre ni odhi oyudo kombe mag bunge gi tee e bwo SDP, ma pod ok bi miye teko eod bura. Ajim pod dhi romo gi pier yath machalo gi mane wuod odongo obedo go ma omiyo nene ochako riwore gi NDP. Ratiro eni SDP ok dhi yudo samoro kata nus mar kombe piero aboro gi abich gi. Ka jaluo okaw kombe gi piero ariyo gi achiel gi duto omiyo Ajim to wabiro chalo joma ngok to nango. Ma yo ma nyocha ne wase wuothe gi NDP ma wayudo ni ok ter wa misiri. Ne wafwenyo ni nyaka waser oganda mamoko kata bedi ni wan gi lit kuom maundu ma ose timnwa ebwo tend Jaramogi ndalo mokalo. Kenya dwong to chan maka owadu ok moni nindo.
Ywak ma yawa mangeny pod nigo e yiero matin manyocha onjawore nyaka rum sani ka ok odhi mabor. Ka ok kamano to wadhi moto e badwa. Nyaka wago ne Narc gi Kibaki ombulu egwenge mag luo. Agombo ni yawa duto manyocha orem e yiero matin mar jo nark kata bed ni ne onge ratiro ojogi oter re mos, ma ok e kende. Lweny madwong kore ka biro mar loko chike(constituition) madhi timore mana ka parliament oyie. Kadi poni chike ok oloki nikech waonge number ma oromo e bunge manyien to koro walal chuth. Chako manyien ok dhi bedo mayot ji ool gi lweny. Wach lokruok ma igani jaluo ema nyoro otele. Gima dhi yango tendwa eni ombuchwa idhi ne ni ombulu achiel. Ma egima dhi miyo yawa moko luoro kendo yie luwo wach mar loko chike (constituition) madhi kelo lokruok e piny Kenya mangima. Yiero Kibaki kende ok dhi konyo. Dibed lit madwong kanyoro waketo Agwambo kaka misango koweyo ne wuod Nyeri nimondo eka omi wachop Misiri bange kendo wadhi twone kura tarik piero ariyo gi abiriyo. Diwa dhongre madwong ahinya Joluo.
Agombo bende ni joluo ongi yamo matut. Ne uru ka wan gi jotuo ariyo ma nenore ni ngima gi ok ber ma ni ema dhi mako loch ker gi jalupne. Ngoroko ondelo wanggi temo ngiyo kaka dhi thulo Agwambo oko mapiyo ka loch ose donjo. Ngama dwa ngeyo adieri to ongi kaka jogaset mar "Nation" pod ka ndiko to gitemo kaka ginyalo mondo kik giyang Agwambo. Ma e gima nyocha gitimo ne Orengo ka ne en e Mageusi omiyo nyaka wange ni pod wan e kind wasigu kapod wan gi chik (constituition) machon. Thuon Gweno ongeyo ni wuod Ratiki ok dhi yombo lakini en lweny ma ogoyo sani en mar tero wajumbe mangeny ebunge mondo chik kik dhi loki. Ma e yombo mar kura ma Thuon gweno oriyo go ni odhi yombo nikech ongeyo ni lok ruok ok dhi bedo ka onge jobunge mangeny ma oyie gi wachno kaka nyocha wadwaro. Sani nende onego obedi ni jotend joluo mako osiep gi jo Narc mag gwenge maoko ka gi konyogi loyo ombulu mondo omi singo obedi gidhi giyuor wa walok chike (constituition). Tend Agwambo, Orengo, Nyongo, Kajwang, Ojode ,Omino, Ochuodho gi yawa ma moko ose tiyo nwa matek, to wadhi wuok gi badwa ka wafwayo ka ok wariwo dhowa kaka jo Narc. Yawa ma nyocha ok oyier e narc, yie uru uwe weche. Dong manyoro ombulu owe u go kata bed mana ni ne oyombu gi adieri kata miriambo ok bed malit maloyo chandruok ma jaluo ose bedo go koro chiegni igni piero angwen. Kech nego ji, masinde opodho mane miyo ji tije, nyithindo oriye udi ok ginyal kalo penj kata dhi skul nikech omuom onge. Kura ma iga ni en mar jopiny yie uriw dhowu kanyakla uger piny mokwongo. Amen mar akambraki owadgi Achieng nga loyano wabi wago bange ka piny ose losi ma okwe.
Oritu Nyikwa Ramogi
Ean Banda Nyaware (Wuod Ahero Asayi)
Ka in gi mari moro ma di wandik ka to orni
Akelo,Nyar Kager
jaluo@jaluo.com
Daher winjo dwondi
in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.