09/15/2003
WECHE MOKADHO
JEXJALUO ****
/p>
;
Jothurwa, asebedo ka aluwo weche siasa ma Kenya mos kendo ka atero chunya matut mondo omi anee ni to yamo makudhoni oa kanye to orie kanye to oterowa kanye... Asebedo ka atemo yaro yi paro gi weche mopogore opogore mondo anee gima ber kata gima rach manyalo wuok e migawo ka migawo to asebedo ka aneno ka nitie ber to nitie rach be. Tiende ni pod nyocha aneno ka nitie yoo. Odiny to nitie rot ma inyalo kalie ma mi wachop lokacha.
Kata kamano nyikwa Ramogi, odiechieng' makawuononi aneno ka abuok. Awinjo ka wiya ojuol kendo aneno ka wiya ok tii. Atemo paro matek ahinya to ok aneno otuchi moro ma wanyalo riree ma wakadhi. Aneno mana gombo... aneno ka ong'uengo oumo piny... Migosi Chrispine Odhiambo Mbai onindo e bade... De ni inyalo gwe kae to de agweyo kendo de awero wer mar lweny majuolo wi joluo teee. "...nyon uru loo, loo jajuok...".
Gima otimoreni to gi kaka yamo osebedo ka kudho omiyo aparo sigand Kenya to gi loch mar ohuru mane wayudo. Joluo, giriekogi ma Nyakalaga osemiyogi ne otemo duto manyalore. Jaramogi Oginga Odinga ne obol kucha. Migosi Argwings K'Odhek ne onegi, Mig. Tom Mboya ne onindo e bade. To gi mamoko. Joluo ne odong' ka okuyo kendo ka koyo chamo. Kata kamano pod ne wan gi geno. Omiyo Nyasachwa ne ok oweyowa to pod ne owuotho kodwa kwom yie mane wan go.
Koro yande waparo ni wang'ni to wanachopi e "piny" mane osingi ni kwerewa. To kara podi. Wuoth pod bor... Ogendni mag dhoudi mamoko oluoro tend Ja Luo. Jogi wuondowa gi dhogi to chunygi bor kodwa kendo onge adieri ma gin go kuom gimoro amora ma oriwowa kodgi. Sani koro ogendni duto kuedo wach mar Minista Maduong' man gi teko. Mano en mana nikech kuom paro matin ma gin go, giparo mana ni komni idwa los mana ni Migosi Raila Amolo K'Oginga kende. Giparo ni mano biro keto "Joluo" e telo. Omiyo uwinjo duto ma iwacho ei Kenya. Sigana nwore...
Gikora aneno ka wadhi marach kendo awinjo ka chunya obuok. Lisasi muoch kuom yawuotwa kendo tho oduogo dwa tieko yawuot Luo duto motegno. Wanatim ang'o? Pinywa, (Piny Joluo) odhier. Kendo odhier adier. Wasebet ka owitwa e koyo kendo wich owil kodwa. Omiyo onge kaka wanyalo wacho ni wan koro wadwa chung' kiwan to nikech waonge nyalo. To ma, diang' mi wabed wasumb jomoko ei pinywa??? Koso ere kuma konywa diwuogie?
Paro moro be thaga e wiya ka: dipo nono ka wan jo Luo waparo ni WARIKNI (watang') to kara WARIKNI (wadhi piyo) to sawa pok ochopo???
Joka Nya Nam, wan e akerekeke (akik yoo): kor achwich koso kor acham koso kar tiendwa? Kenya terowa kanye??? Obong'o Nyakalaga otau e ataroni nyaka chieng' wachop lokacha.
An Mig. Jadolo Fr. Gordon Okoth, wuod Asembo piny maber. (gordon78@hotmail.com)
Ka in gi mari moro ma di wandik ka to
orni
Akelo nyar Kager
jaluo@jaluo.com
Daher winjo dwondi in bende,
iwinjo?
Inyalo oro twak kod weche manyien ne: Mig. Ajos wuod Atiga
WuonAbila@jaluo.com
GALAMORO : Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.