AGAJA
KUYO

BARUPE

WECHE DONGRUOK

MBAKA

NONRO

JEXJALUO ****

NGECHE LUO

GI GWENG'

THUM

TEDO

LUO KITGI GI TIMBEGI

SIGENDNI LUO

THUOND WECHE

 
 
  ;

 
 
 
 
 

Nwang' e-mail ka jaluo.com

Gima omiyo Chwo chodo!

Jondiko:Wuon Abila gi Grace min Kadhola


Min Kadhola: En ang'o ma omiyo chwo chodo? Moloyo to chwo man gi mier.
Wuon Abila: Chwo e piny Luo ne gin joma nyalo nyuomo kata mon apar gi wiye, omiyo chode ne ok en gima lich enyim oganda. Kata kamano ne nitie yore mathoth mag chode; wuoyi ne nyalo ngerore gi yuore moro ma pod tin. Mano ne ok onyiso ni gi riwo pien.

Dayo moro moti ne nyalo ngero nyakware moro matin koluonge ni chuore! Kata kamano chode ne en gima itimo ling'ling'. Samoro wuon pacho tuo ma koro ok onyal loyo ne monde dich mar del; owadgi moro ma bathe ne nyalo chodore gi yuochege.

Chwo moko bende ne inyuolo mana ma wengegi tar kamano ma kata nade to nyaka gichodi. Mago niluongo ni botho. Nyar Komala amedo paroni ni jathum moro yande owero ni; "atem matin to mit ka gir akwala, atemo matin to mit ka chi atera, ayaaye! Gino mit ka kong' oseke, ayaaa....ye! Mon ma chwo romo godo oko temo kelo tuk milunga mar lombo dichuono, kendo mar medo ng'iyo.

Gima miyo chwo man gi mier chodo en nyiego ma monde oole godo e dala koro otemo manyo kuma onyalo yude kwe mar chuny. Nimar jaluo bende ne ok nyal riembo dhako eyor oyuma, omiyo dhako kane osekel e pacho to ne ok en gir tugo miriembo ariemba aoyaye!

E piny ma sani to mon ema tinde sero chwo, omiyo kata dichwo tem ni ok odwar wuotho oko to yuore moro ngere angera. Ato dichwo mane minyalo nger ma tamre!

Mogik daher mar nyisi ni chwo man gi mier chodo nikech piny ma sani mon bende tinde nyalo dhialo chwo kendo rundo andiwo, kaka ing'eyo ni bang' kong'o oyugno del biro bedo maliet. Dhier bende ing'eyo ni odonjo e piny ma kama andiwo tuomore ji ohero.

Min Kadhola: Ang'o ma miyo chwo ma osebedo joma dongo ohero mana chodo jopuonjre manyiri ma moko kuomgi gin mbese nyithindegi?
Wuon Abila: Nyiri matindo ohero chwo moseloso, nimar mbesegi pod tinde eka manyo, omiyo kama nweng'o nitie ema nyiri ohero. Kata jonyuol bende mor ka owinjo ni nyargi oyudo Ooko (Owuoko gi dho-Alego), tiende ni jaoko matiyo kapango. To ka in Abdala (ja dala) ka wuon Abila kama to onge nyako ma loso kodi.

Ranyisi ma duong' ahinya en kuom nyithi sikul ma somo e bombe ma dongo kaka Buore Kameja, Odhus, Nam Chumbi to gi ma moko ohero joma tiyo tije madongo ma nyalo golo rabuon moro mochiel gi mo ma mit (chips).

Samoro wuon nyani to odhier mana ka wuon Abila kama, ok onyal miyo nyathino pesa mar chamo rabuon juma ma ngima, mano ema omiyo jotayi koro ketho nyithi sikul.

Chwogi ong'eyo yore ma inyalo wuondgo nyiri matindo ma wiye wil mana ni oyudo Atila min jopesa. Kare onge en mana lon (loan) moro ma nyocha oolo mondo otergo nyathi e sikul. Samoro to nyocha omiye omuom mar "golden handshake" ema otemo godo tuomo andiwo".

Nyar Komala sani to koro piny odhi metrik e ndalo mane an rawera to yande kisera en gima mit miwuoro nimar wuoyi man gi nyiri mathoth ema ipuoyo kaka wuoyi ma wiye bith, sani to koro onego jodongo olok pachgi, nono to tuo biro teng'e gi jodalane pep. E seche ma tuo odonjo to dhako ema iketho nyinge ni en ema nyocha ochodo ka chuore onge.

Jodongo moko wacho ni nyiri matindo ema duongo negi remo.

Chwo tinde chodo nyiri matindo nikech giparo ni mago ema onge touche, kare onge! Nyiri bende paro ni chwo man gi mon ema ler nikech en gi chiege kende. Wuondruok ma kamano biro ketho piny.

PUONJ: Ne nyithindo ma nyiri kik woundu gi jo-boma modeyo tayi, ibiro romo gi mak olwer, touché opongo piny ritreuru. In dichwo we wuodh anjawo gi mbas nyari ni mano e miluongo ni Atoti!

In bende pim gi mari ka iyudo ni nyari ema jaduong' ma mbasni odiyo, inyalo winjo nade? Un Mine; kik icha chwori nikech lwete ni nono, ma koro iwuotho wuodh anjawo.

In dichwo, dhako, nyako, wuoyi...! tang'ne dendi Ayaki matieka omako piny duto!
"TRUST CONDOM NYALO GENG'E"

Ka in gi mari moro ma di wandik ka to orni
Akelo,Nyar Kager 
jaluo@jaluo.com
Daher winjo dwondi in bende, iwinjo?

Kata inyalo oro twak kod weche manyien ne: Mig. Ajos wuod Atiga
 WuonAbila@jaluo.com

GALAMORO : Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.

WENDO MIWA PARO

OD PAKRUOK