09/12/2003
WECHE MOKADHO
JEXJALUO ****
;
Thura, amosi ni osawore!
An Odundo wuod Kisumo, Karateng', gweng' gi osiepi Job Omino wuod Ogola, ma ukedogo kanyakla Nyorobi e lejiko. Dalawa wuon to Nyabera, kendo wachiegni gi ka jaduong' Musa Oyola. Oyola no ka ing'e humbe, ne opuonjo Oginga wuoru Maseno, ka wuoru ne pod rawera.
Kawuono Juogi onyiedha ni nyaka andikni!
Wach maduong' en ni jaluo winjo mokorore ahinya e piny mar Kenya. We achan ni thagruok ma jaluo nigo, ponono ni ok ise neno gi wang'i:
1. Ayaki yako piny Luo ma nyithindo modong' kiye opong'o gwenge.
2. Mond liete ma chuogi ose tho bende opong'o gwenge.
3. Chuo bende modong' misumba bende opong'o gwenge.
4. Tije onge. Rawere motieko sikul mit koro thoro mana donje madho chang'a gi nyasore. Bang'e gidonjo e timbe ma ok owinjore, ma medo mana thagruok e gwenge.
5. Yore richo kendo matoka nego yawa tieko.
6. Chike wa gi timbewa ok puonj nyithindo e sikul. Nyithindo koro wuok e sikul ka onge luor kuom kido maber ma ose rito nyikwa Ramogi nyaka ne wa a Sudan.
7. Dholuo bende ok puonj nyithindo e sikul. Dhowa koro ose chako lal ne nyithindwa.
8. Onge herruok kata matin e kindwa kod oganda moko, to moloyo e kindwa kod atwara. Wan wahero ng'at ang'ata to onge kabila ma di awach ni oherowa bende.
9. Onge konyruok malong'o ma di wawachi ni wayudo kuom sirkal mar Kenya.
10. Ayany mawuok kuom oganda moko obembowa! Jaluo odhier! Jaluo ochido! Jaluo jasunga! Jaluo wiye tek! Jaluo wuotho duk! Jaluo nigi Aids!
11. Waol gi iko jotendwa ma sirkal nego! Agwingi, Mboya, Ouko, Ongili, Ambala, Oyugi. In bende yande gibayi gi lisasi to kuom hawi maber, kara ne Obong'o otayi iwe nyamburko iidho ndege.
Koro wuod Jaduong', in bende neye kaka jaluo ose miyo dalau k'Oginga luoro kod thuolo mar telo ne ogandawa kuom higni piero ang'wen gi wiye mokadho. To kata in iwuon donge ineno ni ok ose konyowa, kose? Paro mane wuoru nigo mar keto ogandawa mondo oriwre kod oganda moko, ma inbe idhi godo nyime, ne ok rach, mak mana ni kabinde moko pok ochopo e atwa ma ginyalo riwore kod jowadgi e riwruok maji rom. Riwruok kodgi ging'iye mana kaka di gikwal kuom ogandawa, kendo kaka di gisik bedo ruodhi wa, to wan pagas margi. Yande inene gi telo mar atwara mokuongo, ichako inene gi telo mar onjelo, kendo koro inene gi telo mar atwara manyien ma in ema nyocha imiyo telo.
Thagruok ma omako ogandawagi, di walosgi nade? Wadhi adhiya nyime gi thagruok wa gi kaka pile, wachak warit higni piero ang'wen kendo mondo dhoklihunda wa bende obi obed mana gi sandruok gi (ka po ni jaluo pok otho orumo ndalogo)?
An pacha en ni wago ligala mar Luo Nyanza, mondo warit odwa wawegi. To kata kamano, in kod jowa moko nyalo neno ni wadhi adhiya nyime kaka pile. Kuom kamano, mondo wane kuma chuny ng'eny joluo ochung'ie, daher mar kwayi ni ikaw thuolo mar nyiso jobura ma konstuson ni joluo dwaro timo referendum mar wuok e riwruok mar Kenya kisiasa, to wahero dhi nyime gi riwruok gi Kenya e yore mag ohala. Ka referendum owacho ni joluo mang'eny dwaro ni wasiki e riwruok ni, to obed kamano, to ka joluo mang'eny okwer ni ooyo, wadhi waritre uru kendwa, to wawuogie mos walos karwa, wawe nyunje kama ok dwarwae ni!
Parie mana jo pacho ma onge nyalo, owadg'Akinyi! Dhano thagore dala ku ma ka ineno to kori thung' idwa mana ywak.
An ma e kwayona, wuod Sakwa. Ageno dwokoni mapiyo.
Mos nyadendi ma jaber Ida kod nyote.
An moluori ahinya,
Odundo JaKarateng'
Ka in gi mari moro ma di wandik ka to
orni
Akelo nyar Kager
jaluo@jaluo.com
Daher winjo dwondi in bende,
iwinjo?
GALAMORO : Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.