08/01/2003
WECHE MOKADHO
JEXJALUO ****
;
Twak e kind Min Kadhola gi Wuon Abila
Komo Nyuol e yor Nyaluo (ndalo machon)
Min Kadhola: E kinde machon ne wayudo ni joot (dhako kod dichwo) ne kalo kar higni ang'wen eka giyud nyathi moro bang' nyathigi matin. Mani ne timore to bende iyudo nine gin mana gi kar nindo achiel kaka wan joma kawuono.
Wuon Abila: Kwerewa machon ne onge gi kilinik (od thieth) mane gidhiye e yor komo nyuol, kata kamano ne nitie nyamrewa mane temo ng'iyo kit dak mar joma mine e gweng'. Ne githoro bedo mine moti mong'eyo kaka inyalo kom nyuol to gi ndalo mane dhako nyalo gamoe nyathi ka dipo oriwore gi chwore.
Nyamrerwa netemo puonjo mine kaka gi nyalo komo nyuol. Nyathi niluwo bang'e ka osekwero thuno mondo kik olar thuno gi jalupne. Mano miyo onyoso jaluw bang'e. Gino netimore nimar nyithindo ne dhodho thuno, nyaka miyo duon ma koro nyathi nyalo chamo kuon eka ninyalo par kaka iluwo bang'e.
Sani to imiyo nyithindo chak gi mipira koro miyo yot mondo ogam nyathi machielo. Yehde mitiyo godo kuom komo nyuol bende miyo del bedo gi lokruok eseche ma ok owinjore. Chwo bende sani poro dhako mak opimo nito dhako nitie e okang' machalo nade.
Chon dhako man gi nyathi matin ne ok riw pien gi chwore nyaka chop nyathino bed madit minyalo yarne piene yore. Chwo noluoro riwo pien gi manyuru. Sani to miyo wuok osiptal to ng'ango giriwo ariwa gi dichwo. Bang' dwe achiel to tuk otieno ochakore maler!
Kit chiemo masani bende miyo del bedo gi gombo.
Min Kadhola: Aloso kuom jogo mane ok jodoho.Ne gitimo nang'o? Koso wan tieng' ma kawuono rembwa ringo matek matamre gi nono, nimar iyudo ni kuom joma ok ti kod yore mag komo nyuol, higa ka higa gin kod nyathi manyien.
Wuon Abila: Eeh...! Min Kadhola mana kaka idimbeno remo ringo matek, nyamrerwa bende tinde onge gin mana e ute thieth.
Deye mane miyo mond yawuotgi puonj bende tinde otho orumo, to kata ka gin tie to moko kia yore kaka ginyalo puonjo mond yawuotgi. Kipenje to ni dhi penj laktar an akia! Samoro to nyiego ema omake gi chi wuode nitiende omiyo wuoda ok konya!
Chwo machon ne thoro bedo e dala, sani to ng'eny chwo tiyo kapango, omiyo kobiro to nyaka otem poro nyadendineno, ka nyarwegi dwa tamore to ni tinde iyudo dichwo machielo koso, kinyise ni orwak mapira to ni iparoni atuo koso in ema isewuotho marach oko? Gikanyo lweny ochakore, omiyo mine timo gigo e I achune gin samoro ok gihero. Dichwo to ka osemiyo dhako ich to odok kapango, miyo odong' gi chandruok mar rito nyathi matin to moro bende oting'o e ich.
Ka ok kamano to mine ema ohero tuk otieno ma kata dichwo nyise ni nyar wegi watem komo nyuol to ni ngang' an ema muoch kaya ok in. Koso tinde hera rumo. Yie ilosna denda, to mano e kaka omako ich. Omiyo iseyo chwo to mon bende oseyo.
Min Kadhola: Mar ariyo bende en kare mondo miyo tamre ting'o nyakware maka nyako, ni orito nyaka chieng' oting' nyakware maka wuoyi. Awinjo ka iwacho ni ka oting'o nyakwaro maka nyako to obiro dino ne wuoyi yudo nyathi kod jaode ka ochopo kinde ma okendo. Bende ma en adier?
Wuon Abila: Nyikepe ne ok rwaki e dala nyaka nyakwaro maka wuoyi nyuol. Nimar ne giparo ni nyakewo nyalo kawo gweth mar dala to nyakwaro maka wuoyi ema biro dong' e dala.
Penjno miyo aparo gima yande otimore thurwa Kasipul kane oyudo nera obiro dak dalawa bang' tho dana monyuolo minwa, jogweng' nodagi ni or ok nyal dak ka nyamin nimar nyamin pok oyudo nyithindo, obiro kawo gweth mar dala, kendo nyamin nyalo chweyo mak onyuol.
Okewo iluongo ni Agaka rembe kech, dayo ne ok nyal ting'o nyakware maka nyako nimar iwacho ni biro miyo onyosre, kata mana nyakware maka wuoyi ne ok onyal ting'o e tiende ariwa, mano ne kwero, kata nyuka ne ok onyal kage.
E piny ma sani to kwechego koro rumo, ok apar ni nitie gimoro malich ahinya ma mono miyo ting'o nyakware maka nyako kata maka wuoyi. Wachni achako aporo gi moro mane otimorena kapod an rawera higa mar piero abiriyo gi wiye; nyamera yande onyuol e simba mit oweyo gi nyathi, nyathini minwa ne ok nyal kata ting'e an emane abedo kaka min kendo wuon nyathini.
Napiro kuom thuolo ma romo higni ariyo nyaka nochopo kama nyathini ne magoro otero, ne en lit mokikore gi mor nimar sikul bende e thuolono ne ok anyal dhiye to aweyo nyathi pacho. Masira kindaki, min nyathini nobiro bang'e kane nyathi osetieko higa gi dire e lowo.
Min Kadhola: En ang'o ma miyo jomoko tamo nyakwaro maka nyako ni ok nind e od dagi ma min min gi ni nyaka nyakwaro maka wuoyi kuong nind e od dagi?
Wuon Abila: Kwer malong'o to onge, en mana kaka asewacho malo kanyono. Nyathi migogo ok onego yud gweth mar dala ka nyathi wuoyi pok oyudo.
Atimo mos kuom wacho kamano ang'eyo ni ji biro wachoni wagol akwede e chike Luo an owuon ne ok aketo chikegi. Gin mag kwerewa machon.
Min Kadhola: Ka dichwo oneno ni ber mondo obed jo-udi ariyo, ber mondo onyis jaode ni odwaro kendo koso opoye apoya gi wendo neno? To ka po nono ni opoye,to jaode otim nang'o, kaka ing'eyo gima opoyi jachid chuny manyalo miyo itim gima ne ok onego itim.
Wuon Abila: Medo dhako ne en pach dichwo gi anyuola, moko ne timore kaluwore gi kido ma mikaye osenyiso kayuoche gi wuon pargi, moko bende ne timore ka winjruok onge maber e kind dichwo gi jaode (mikaye).
Samoro ne gi nyalo bedo piny to giloso, samoro bende dichwo ne poyo chiege gi wendo (Rero kata Nyachira). Nyiego to ne nyalo betie to ne ok mon dichwo medo dhako machielo.
Chon jodong'o ne nyalo biro gi nyiri mane giyudo ka thum kendo ka gichopo e pacho to mikaye rwakogi kaka wend chwore. Mano nenyiso luor mane oluoro godo chwore. Kochopo ni koro nyiri dwa nindo to nyaka olosnegi kar nindo maber. Chieng'no dichwo riwo ariwa pien gi nyiri ma welogo. Ka gisedo to miyo bende yudo mana pokne.
Medwa Paro: WuonAbila@jaluo.com
Ka in gi mari moro ma di wandik ka to
orni
Akelo nyar Kager
jaluo@jaluo.com
Daher winjo dwondi in bende,
iwinjo?
Inyalo oro twak kod weche manyien ne: Mig. Ajos wuod Atiga
WuonAbila@jaluo.com
GALAMORO : Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.