JEXJALUO ****
Wambui Otieno Otimo Gombo!
nyar Kager: wuon Abila, chi Nyalugunga miluongoni Wambui
ma jaod Otieno, ma nyoro asome otas manyoro ni otimo arus gi rawera ma mbas
nyathine, bende ise winje ga ni ne ose lage bang' tho Otieno?
wuon Abila: Nyar Kager chi owadu ni otimo gombo! Mikaye ni
ne ok otieko kwech chwore, noringo odhi kariya kato sani to koro otimo kend
manyien gi rawera ma pod yom. Wambui en dayo ma kata nyikwaye sani dongo.
Gima ber nyani onego nyocha obi otiek kwech liend chwore korka omany jater.
Pod en chiwa nyaka sani. Rawerano Nyar Kager ok mbas nyathine to en mbas
Nyakware nimar nyathi nyare ema sani ja higa 26. mano nyakwar Wambui
maka nyako (nyare miluongoni Jane Otieno) mane ochak nying SM Otieno.
nyar Kager: Ka ne pok olage, ka rawerani ema ohange
bang' tho chuore, tiende ni en mana jakowiny moyawo ne yuoch Wambui mondo
koro otere moriere, kose?
wuon Abila: Mano kare mak mana nitie dhoch moko ma nyaka loki,
dhakoni nyaka dhi tiek kweche liel korka jak'Owiny otiekne kweche mag ter.
Mikayeni pok oliel kaluwore gi chik liel. Kata kamano yuoche koro sani nyalo
mana tere to ok gidag e par Otieno (Kager) gi dak mana kapango kono.
nyar Kager: Chik dwaro ni ang'o, Wambui ilago e od chwore
Nyalgunga, kose bang' tho dichuo to inyalo lago dhako kamoro amora mohero.
wuon Abila: Nyaka lage mana kama ne otime liend chuore, mano
en Nyalgunga Umira Kager Pacho ok Upper Matasia ngang'.
nyar Kager: Po nono ni Wambui ne odagi yuoche, ka ok
oneno momako wang'e, onyalo nwang'o dichuo kamoro amora?
wuon Abila: Yuoche ne omako wang'e mak mana ni en wang'e emane
tar! Kaka ing'eyo ni yawuot Kager bende yawuoyi man gi chiya kendo odimbore
Wambui ne ok nyal yie dak e pacho kono nimar pango ne pod mitne. Nyani nodhi
mo yiko rabolo e bur mane okunyo Matasia ka onyiso godo ranyisi mar liel,
mano richo nimar onge ng'at mitimo liende diriyo.
Omiyo rawerano ok jater en mana jarit dala Wambui, en mana ni sani ma koro
siasa bende ochacho Kenya Wambui manyo yo ma onyalo pogo godo joluo gi Okuche.
Kata kamano onge gima rach obiro bayo to ka ool to oduogo mana kende.
Nyar Kager donge isewinjo ngero moro ni "Awendo kiwe yiege", mano e ranyisi
mane Wambui otimo onge kata nyathi Otieno kata achiel mane odhi Nyalgunga.
Omiyo ok en gima ber kendo nyar Mwa kaka mikaye e dala.
nyar Kager: Nga' mayiero ja lak, en dhako kose jodala
gi chwore?
wuon Abila: Ja lak miyo ema yiero kato otero wach ne
yuoche gi jodongo mak mana ni jodongo nyalo dagi ka dipo ni oyiero ng'at
ma ok owinjore gi chik mar Luo. Kapok ilage to nyaka anyuola chok bura ma
giyiere kuom wachno.
nyar Kager: Ng'at molago dhako nyalo nyunje ma sik jater?
wuon Abila: Ooyo! Jalak en mana jatiek kwer to ok onyal nyunje
dhakono. Nimar ne githoro bedo jok'Owiny omiyo ne ok onyal ter e dala jomoko,
Yuor nyako emane tere ka obedo kar owadgi mane yamo otero (otho), nyithindo
mane onyuolo ne bedo e lo wuon pacho. Jater ne bedo mbas dhakono kendo jakore.
nyar Kager: Dhako ma chuore otho nyalo dhi por?
wuon Abila: Dhako ok nyal dhi por nikech chwore otho. Mak
mana ka ok odwar dak gi anyuolane.
nyar Kager: Nyithind Otieno ma nyiri, ka gidhi pacho,
to min gi onge, odhi por, kata odak kuma otere, ginyalo dak e dala wuongi
gi mingi machon?
wuon Abila: Nyiri ma minegi odhi por, nyalo dak adaka gi nyiek
min gi. Keny ema ka ochopo to ok kel jamni (dhok) e dak kel e dalano, nyaka
min tiek kwer mar liel.
nyar Kager: Bende en adier ni jater kuto mana ka piny
imore, to kendo owuok kogwen ka piny pok oyawore, sama odhie dala motereno?
Mani nikech ang'o?
wuon Abila: Jater ma kuto ok en ng'at ma timne ber kata samoro
pok oyangore ni otero yuoreno. Samoro oluoro monde kata jodala motereno.
Onge gima omiyo nyaka opondi nimar ter en chik Luo. Pondo ok en gima ber
onego oyangre e lela.
nyar Kager: Wambui ni awinjo ni wiye tek ahinya, kendo
yuoche ok obadhe. Ka otamore winjo chike luo mit osiko gi nyathini, ka otho
to iike kure? Ka po ni oike oko, ma ok dala Otieno, nitiere rach?
wuon Abila: Ka dhako odhi por kendo oyudo kend ma nyien ok
rach kata oyike kariya. Kwechege bende ok nyal tieki kaka dwarore. Koduoge
ka en kitundu to inyalo yike kaluwore gi chik ma jodongo ong'ado.
Ougo ma yuore bende noyangore odiechieng' ma nyoro kendo osiemo dir pacho
kama ibiro yike Wambui ka dipo ni oduogo Nyalgunga. Nyar Kager yuorwa ni
kuodo wiwa kata kamano ok rach dhano jakwadh chunye.
Rawera ma koro onduoro wiye ni oyudo jadiya manyienni ema koro orundore nyaka
chien nimar Wambui en ja higa 67 to min wuoyi en ja higa 53 kende.
Wachni omako dhowa e i Abila, kendo wakwedo gi duol achiel ni chiwa ok ber
ka tang'ni oko gi mbas nyakware. Jo-din bende nokwero wachno ahinya. Kata
kamano Wambui owuon to nyoro othiano ka wachoni, "apilo ma ok wachamo to
kare lungo dhowa nang'o'" Mano en ayany nimar apilono ok lungwa en mana ni
wadwaro mondo mikayini oduog otiek chike chuore.
An pacha awuon en ni rawerani okendore gi Wambui nikech dwaro mwandu mane
wuod Kager oweyo ne nyar mwa (Wambui). Koso unto uparo nade?
PUONJ: un mon chodreuru gi mbeseu, un chwo bende many mbasni.
Weuru ketho nyithi wegi ma pod dongo! Pim gi mari iwuon.
Medwa Paro kuom wachni: imel, WuonAbila@jaluo.com
Ka in gi mari moro ma di wandik ka to orni
Akelo,Nyar
Kager
jaluo@jaluo.com
Daher winjo dwondi in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.