JEXJALUO ****
Odhiambo Komolo Jamagambo.:Wuon Abila,
Ase bedo ka asomo weche mabeyo ma wuok edho yawa duto kaluwore kod yiero ma nyocha Jatelo Makoro wuon Piny Migosi Kibaki otimo kuom yiero jotelo.Ose yangore maler ni GEMA ema koro rito Kenya ma ok NARC to ma en gima piny ok nyal bedo godo mamor.Migosi Otieno Kajwang kod Migosi Gumo ok oriambo.Jopiny dwaro loch mar piny owacho maok mar Gikuyu,Embu kod Meru. kendgi. Migosi Kibaki nyaka lok paro mare.Jopiny ywak ni nitiere jokenya mapod tindo kendo nikod rieko mangeny moloyo jodongo ma moko ne ose yudo yweyo mondo ochak obedie tije madongo mag rito piny.Ok angeyo ni to bende yawa machalo Wuod Ajuma gini oling nango?Loch Okuyu duogo to ma koro jopiny ok nyal yie.Pod nitie thuolo mondo okwer Mig. Kabaki ni Kenya en piny ma duong ma otingo yawa ma opogore opogore.Joluo nyaka yud tije mabeyo mana kaka Okuche.
Ber mondo loch obedie kind oganda duto.E seche gi to Okuyu ose chako kendo.
Ere gima yawa ma joka nyanam neno ewachni?
Wuon Abila: (Puodho kendo jiwo tiend wach):
Ayie gi wach wuod Rongo kendo ok anyal kata pingo kata matin, an owuon nyocha asebuok kendo wuoyo notama ma kare onge loch manyien Kenya ngang', obed wuod Otike kata Kibaki kare gichal gi duto, jodongo nogoyo ngero ni "sembe im ipimo gi nyamin", ani loch gema oduogo bang' higni mathoth nyaka Otike ne tho! Loch ma sani ok opogore gi mokadho en mana ni ochal nyako monyuom ma pod miaha, mak tal juoge kata oido to iwacho mana ani nyar kuma nyien biro loko pache! Bang'e kachaya osedonje korka ichako wach adieri mantie.
Kibaki en wuon nyako nyaka walombe alomba korka wanyalo yudo gima wadwaro. Gima ang'eyo maler ni jo-Kenya ma sani bende tinde "UNBWOGABLE" ma ka Kibaki wiye owil ni ich lach ema ong'iyo mar gero mana jothurgi kende to ok eno cham.
Hundhwe moro bende awinjo ywak e tok dala ka wachoni: "Jo-Gema ok iokore mar loko chike manyien, nikech gineno ni Agwambo biro yudo lemo mar PRIME MINISTA kato teko wuodgi rumo. Kiraitu Murungi en jago mane osebalo gi Tinga higni mag FORD KENYA ma ok en wach manyien e wang' jopiny. Sani gimoro amora nyalo timore e loch NARC kata Kibaki nyalo weyo loch saa asaya! Wuod Samia; Moody Awuori to nobukore ni Kibaki pod nyalo mana nyunjo e loch tok yiero mar higa 2007, mano to akwere ni ok yot ngang' jaduong leche osejony onego oywe mos! Awuori paro ni pod wantie e loch gweno mana ji thoro wuoyo awuoya, ani sani nyaka ng'ato tang' ahinya e gima owacho.
Kajwang' gi Gumo nyocha otemo loso kuom ich lach mar wuod Nyeri to notur sekegi monyisgi ni math orumo kendo sani giling' ka matuo. Sani koro yawuotwa mane wayiero mondo owuog e lela okonywa goyo lweny mar kwedo Kibaki e lela.
Kuom tuo mar jaduong'ni bende chando chuny raia nimar sani ok wawinj kata duonde, adieri bende ok wang'eyo nikare tielo mowil bende nyalo loko ng'ato momo? Koso gini teru wuod Nyeri Imbo Kadimo to wakia? Wakwayone ngima mondo omed loko pache kuom loch NARC mondo omi obed gi nying' ma kare. Kik olokre wuod Odongo gi lange ma sani odok kwayo dhok e kor pap.
Wuod Odongo bende pi Awach muko ode, nimar Mig. Misoi nose wachoni onego owuog e kom mar bedo jatend KANU eka ginyalo dhi nyime maber, mano otimore ka yawuot tok KODERA ose ng'wel oweyo kombe ma dongo ma nyocha gi mako e KANU, Mig. Mudavadi, Jirongo gi Mait'si nose nyiso jogo ni loch Kanu dwaro joma tindo omiyo jodongo owuogi.
E loch NARC bende ok wadwar jodongo moyudo batiso, kaber to onego gidhi giywe mos. Kibaki kik luor oyie olos singo mane omiyo raia ndalo goyo ombulu kosingore ni obiro kelo lokruok to ok kelo guondo gi ich lit.
Wuod Rongo, Odhiambo Komolo otemo lero wachno ahinya, nyikwa Ramogi un bende miwauru paro kuom wechegi. Nyakalaga mondo otau ndalo duto, omedu ngima gi hap Adikinyi nyar Nam mondo orieny ndalo mochwere e kind nyithi joka Podho. Yawa mane odong Sudan bende wakwanegi hap kwe mondo giyud loch margi gi wegi.
Mig. Ajos wuod Atiga Ny'Ochola
Jaluo dot Kom
Ka in gi mari moro ma di wandik ka to orni
Akelo,Nyar Kager
jaluo@jaluo.com
Daher winjo
dwondi in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.