JEXJALUO ****
Anyuola ariyo go bende otimo maber kuom jiwo wa e oboke mabade lach ni. Ok anyal dagi gik ma giwacho to nimar ng'eny gi nyalo timore to moko be adier kaka thagruok mar ji Bondo.
To daher mar jiwo gi ni gi ter anena wenge gi mit girang anena ni kwan joma goyo ombulu dirom nade Kenya ka. Machielo enni to gi rang kendo ni to e jogi magoyo ombulu, wan kaka nyikwa ramogi to waromie nade.
Tok ng'iyo mano to daher mar paro negi ni joKenya pok wigi owil ma oweyo goyo kura kaluwore kod akwede mag dhoudi. ka gise rango mago to ber mondo gichak gipenjre ni to Jim nyalo yudo kura marom nade e Kenya kae ma di Oyomb godo kata mana wuod Nyandusi kende.
Adier Jim ni gi kombe 96 kende ma olaro to bunge to oting'o kombe 210. Kuom 96 gi bende nge'ny gi gin jok ma odhi ire tok ka oselogi kata ka gise wito kombe gi eyo achiel kata machielo.
Koro an to ok adagi ni mondo omi Jim Kura nimar Jim to wuod Kenya manying' lilo to wadog uru anena chien mondo wang'i ni to bende Jim nyalo gimoro. Adier to enni teko ma SDP sani nigo ok nyal romo kata gi mane NDP nigo e higa 1997 ma pod ne wadong' ma wabedo mana ji mar adek.
Ka ing'iyo to bende waneno ni NARC nigi kombe 209 kuom 210 ma olaro kod KANU (Bura marach mar mecho kod ang'enge). Ma nyisowa ni ka gilarore maber to ok gini yud matin madirom kata gi mar SDP kapok ochako larruok.
Bende wachak wapar ni chik lero maber ni nyaka iyud katieni mogik to kura madirom 25% e provins moro ka moro madirom abich, katin.
Koro ekind buche ariyo ma yawuotwa ma idewo gi nitie, wapar anena ni to kare mane ma nyalo gimoro.
Ok alawra gi Jim kata matin, nimar an to a ja Sakwa Awendo to bende kaka nga't ma fwambo weche gi mag siasa to ang'eyo malach gik ma Jim osetimo e Kenya kae, to koro ka ji odok e adier, bende osekonyo jo Ugenya kaka ja kanyono mar Od Bura ma gweng'no? Kata ka idhi nyaka dala gi Ramunde, ji adi ma oyie ni Jim to konyo gi kaka wuodgi? to bende rieri kata mana Sega, donge mosenindo Adongo Adeya e ma ipako kaka wuoyi moromo? Kata kamano an kaka wuod Kenya to anyalo chung' ma akwan ni Kenya ka to Jim osetimo ma gi macha, Mageuzi Movement ka en mana achiel Kuomgi.
To bende merwa moti kata ana man Ugenya cha nyalo nge'yo ni Mageuzi to ang'o? Donge dipo ka openja ni to wuowi matin "Ogeusi" go to nyamburko madhiye i idho kure?
Omera Omondi wuod jo Ugenya, donge en adier ni Jim to wabedo godo e boma ma buore ka maloyo kaka obedo Ugenya? To koso donge osebedo ekinde moko ma jo Ugenya onenoe Jim kaka rageng' mar dongruok ka otamore Harambee moko?
A nge'yo maler ni Amollo bende pok okonyo jo Bondo e yo maler, miwuoro ni kaka e kinde ma nyocha opog ne lemo matin chande. To ma koro egima nyaka watem matek kaka onagi duto ma ok wadewo wang' ng'ato ni chakre Jim nyaka Amollo to kod oganda LUO duto ma biro yudo lemo e odbura mar ochiko ni, nyaka gi ne ni gikelo dongruok e kwonde duto ma gi aye to kendo e piny LUO kanyakla te.
Kama wantie to dwaro wang'e maber ni adieri mar wach to enni en Kibaki ema yudo komni kata wuod Otike joma Odong' kaka Wuod Nyandusi jo kod Jim to be ong'eyo ni ok ginyal chopo kono koro miyo en yiero wa kaka jo Ramogi ni to wayie wuod Otike kawo gini, ma ka waweyo otimore to wang'eni Lwedo Maliet dhi mulowa, kata Kibaki ema wamiye kapod wabet piny waparo kaka wadwa kawe ka hike abich ka rumo.
Odira Abade
Wuod Sakwa Awendo
Ka in gi mari moro ma di wandik ka to orni
Akelo,Nyar Kager
jaluo@jaluo.com
Daher winjo dwondi
in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.