JEXJALUO ****
RIWRUOK MAR "LIHUDU", NARC OKAWO LOCH KENYA
Puoch gi pak ne jobura duto mar NARC, jo-Kenya duto e piny ngima, joluo to gi osiepe ma osebedo ka ruyo kodwa piny kuom lweny mar thulo loch ang'enge mar thuon gweno (KANU) gi lange duto tee oko. Loch Kanu osebedo Kenya chakre 1963 nyaka higani ma koro ochopo kama yawuoyi ogwethogi oko gi thuon, to ok en mana tich jo-siasa kende, wan wawegi jopiny ema wagoyo ombulu mogolo Moi oko e loch, jogo ma goyo siasa to mana jopor weche nimar ji ok nyal loso duto mit winj wachgi. Omiyo kik sunga mak yawuotwa ma koro omako wi rwath, nimar pod gi ngau. Gima duong en ni nyaka gi bed gi ng'eyo ni rahia ema oyiero gi kendo ema pod gi telone.
Atimo mos ne wuoyi moro ma ose oronwa oboke moro mar ayany ni ok ong'eyo gima owacho kendo ok otiyo gi wiye kuom weche manok mondikonwa, weche mane ondiko chalo kama:
From: EO ANANGA <e.ananga@uea.ac.uk>
To: jaluo@jaluo.com
Subject: ifuwo ka pier minu kik ichak iwuo e nying raila marach nono to wabiro timoni gima watimo ne orengo.
Chieth.
EO ANANGA
Norwich, UK
Omera kata obedo ni in e chwor chwo to kawuono to idwa puso dhogi marach to ka dipo ni ineno ni mano e kaka inyalo loso to kare ber, dhi mana nyime ibiro romo gi gima idwaro.
In to kata mana Orengono to bende ema ikia to korka ipusori gi wach ka ng'ok rafuok. Wan onge gima wasewacho marach kuom ng'ato kata dichiel, mago duto ma wasendiko gin pach jopiny omiyo in ma iriekno to kare dhi mana nyime gi ayany wabiro neno gikone.
Pier min ng'ato to iyanyo nang'o? Meru to onge gi mare? Iyanyo kata kama onyuoli, bende ing'eyo ni Abila mar jodongo kae otingo nyaka chot meru, penj ane maber dipo ka onyisi kuma kothi oaye, omiyo dhi mos kik ilokri mariwa. Wuoyi matin bedgi ritruok! Luor ok ng'iew iyude nono. Koso imadho Adoka ni Kangara? Wan ok wahero joma wigi ombachni ma nyalo kuodo wi jodongo, esechegi onego ji bedgi mor mar rwako yawuotwa to ok mar yanyo joma ikia ka iparoni idimbori.
Orengo ma koro iwuoyo kuomeno to wuoyi nyowuoyo, kendo ok dog chien en bende kata loch ma iparoni nyocha odwarono bende ok obadhe odak ma kata gino onge. Ato sani koro iwinjo ni oriyo kech nikech ok oyiere? Pon alawa kik inyier to inyieri! Sani korka lweny ger mar lwoko chilo ma nyocha jo-Kanu oweyo.
Nyikwa Ramogi iya owang' gi wach rawera ma obukore tomowa ayanyni. Un bende medwauru pachu, ka ng'ato ogolo pache kaka oneno gimoro to iyanye koso ilerone tiend wach ma owachono? An awuon to ok ane gima yilo makone ji kayiem nono kar gima wuodwa moro ema okawo loch! Mago pod mana mwache lilo, yudo ng'at ma biro miyo jaluo ombulu mondo obed Ker to onge, omiyo kik wacha yawuotwa modong' e yieroni. Pod gin nyithindwa!
Ne jogo moloyo gi mago modong' beduru gi kwe mar tiyo kanyakla, kendo loso gigo duto ma Kanu osenjawo e pinywa, kik waketh pinywa gi ich lach kayiem nono.
Ruoth mondo oritu ndalo duto; kwe gi muolo ema biro miyo wabedgi dongruok.
Medwa pachi nyikwa Omogi g'Awando Ny'Okal!
Wuon Abila,
Ajos wuod Atiga
WuonAbila@jaluo.com
Ka in gi mari moro ma di wandik ka to orni
Akelo,Nyar Kager
jaluo@jaluo.com
Daher winjo
dwondi in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.