JEXJALUO ****
Abraham wuonwa kuom Yie!
Jandiko; Mig. Ajos wuod Atiga Ny'Ochola
Mokwongo ne wan kaka oganda joka Rabudi penj maduong' ma onego wapenjre en
nito bende Abraham en wuon Oganda duto kuom Yie? Mar ariyo en nito ka en
adier, to kare nodak e piny mane?
Ok ochuno ni nyaka iyud duoko ma kare ngang'. Gima duong' ni yieni ema biro
kuoyi kuom maricho duto. Koda in ja-Pendekosti, Oporo, Apothtolieth, jak'Opere,
Adita opong', Adwen kata mane to gima duong' moloyo ni in gi Yie motegno
kuom Jachwech kendo wuon Oganda duto ma wadendo ni Obong'o Nyakalaga Ngire
Nyadenda wang'e ogothole Laktach lakteche Ogonya Nyakwath ....!
Abraham ochung kaka wuoro mar kidienje adek mag dinde ma gin: Jo-Kristo,
Jo-Yahudi kod jo-Islam kanyakla. Jo-Islam luonge ni Ibrahim. Kuom migepe adekgi
giyie kuome kaka wuoro kuom Yie. Kendo nyinge yudore e bugegi duto kaka;
Muma Maler ne jo-Kristo, Koran ne jo-Islam kod Talmud ne jo-Yahudi.
Maria ma min jawar, Yesu Kristo bende medo puoyo nying Abraham e bug Lemo
mar Magnificat e kitap Luka kod Paulo bende ondiko nyinge e buge mane ondiko
ne jo-Roma kod gwenge mane othoro wuothe ndalo mane olando wach Maler mar
Nyasaye. Omiyo ka dipo ni ne nitie wuoro kuom Yie ma Nyinge olandore kuom
dinde madongo adekgi ma onge akweda to en mana Abraham kende.
Mohammed bende pako duong'ne nikech noyie kuom Nyasaye ma jachwech e fweny
mane omiyowa kuom jatichne Abraham, Isma'il, Isaka, Yakubu..gi ma moko ma
nyingegi ondiki e kitap jo-Islam.
Mathoth osewachore Yie bende wan godo kuome, to ok duto, penj ma duoko tek
chalo kama; bende ne nitiere ng'ano miluongo ni Abraham? Duoko yot; Eeh, ne
jogo man gi Yie! Ooyo, ne jogo ma ok oyie kode. Kata ne jogo ma jofwamb weche
e kit dak joma chon Mig. Israel Finkelstein (Archeologist) ma japuonj e mbarariany
ma malo mar Tel Aviv (University) wachoni gino ogajore ma duoko mare ok yot
yudo.
Fwenyo adieri mare tek maloyo kata mar Yesu Kristo ma jawar. Nimar Yesu
to ayuolane inyalo pod inyalo fweny kuonde ma gi dakie.
Kaluwore gi ndiko wachore ni Abraham nonyuol Ur e gweng' Kaldea (Chaldees)
kendo nodak e gwenge kaka; Harran, Kanan, e dir Misri. Bang'e nodhi Misri
kendo bang'e nodhi Kanan, Hebron kod gwenge mokiewo kode. Notho Hebron kendo
kanyo e mane Sarah ma chiege bende noyike.
Kaluwore gi Yie jo-Kristo kod ndiko mar Muma Machon to wacho ni anyuola Abraham
chalo kama: Tera onyuolo Abraham, Nahor gi Haran. Haran onyuolo Lut, Haran
notho e ndalo mane Tera wuon mare pod ngima. Chakruok 11: 27-28
Abraham nonyuomo Sara to ne en migumba kuom mano nokawo jatichne Hagar nyar
Misri monyuolo godo wuoyi; Ishmael (mago oganda mogero pinje jo-Filistia),
bang higni moko ma nok Sara nomako ich kendo onyuolo Isaka (mano e oganda
joka-Jakobo kendo ema ogero piny Israel).
Kane oyudo Hagar omako ich nobedo gi sunga e chunye kendo nojaro Sara gi
chunye mano nomiyo Sara oriembe e dala Abraham. E thim kuma ne oyudo odhiye
Malaika mar Ruoth Nyasaye noloso kode kendo onyise ni obiro nyuolo wuoyi to
Nyathino nochal gi le mae thim mano ema omiyo onge kwe e kind Israel gi Filistia
nyaka chil kawuono.
Kuom mano chakruok mar wuoth Abraham kaka wuoro kuom Yie moriwo anyuola adekgi
kanyakla nochakore Babylonia ma sani iluongo ni Iraq gweng' Moluor Jamadar
Akambraki Saddam Hussein.
Mano bende e gweng midendo ni Mesopotamia kama yande Mig. Neburkardinesar
ochame lum gi dhoge bang' tamruok winj wach Nyasaye, kendo ogandane norwak
e od ang'ech mano lich to ok rom gi ma koro sani otimore e pinyno higani,
2003 ma koro Saddam ochame ngwej aputh njiri ka wuod bungu (Bush) ogole gi
ng'we airititi...!
Kaka yande aseleronu e ndiko moko mokadho kuom Chakruok Luo wan waduto e
higni machon ne wadak Babylonia.
Kata kamano kar nyuol Abraham to pod chando jorieko nyaka kawuono. Piny Babylonia
e kama ne Ruoth Hammurabi okuongo bedoe ruoth higa mar 8th Century BC (motelo
ne nyuolo Ruodhwa Yesu Kristo)
Jo-Assyria nokkawo pinyno gi thuon e higa mar 1st Century BC.
Kaluwore gi chike jo-Luo, Abraham en anyuola mar joka-Shem (oganda jorachere).
Joluo to yudore e kanyakla mar joka Rabudi.
Ur nitie e gwenge ma milambo mar piny Babylonia (Iraq) dir aora Euphrates
gi Tigris mokiewo gi AN NASIRYAH kama ochomo ndara maduong' madhi Basra. Kuom
mago duto Yieni ema biro miyo iyud resruok kendo ibed gi adiera kuom wach
mar Abraham kaka wuoro kuom Yie.
Nyasach Kwere mondo otau ndalo duto kendo omedu Yie motegno kuom. Medwa
pachi kuom wachno nondwa en; WuonAbila@jaluo.com
Ka in gi mari moro ma di wandik ka to orni
Akelo,Nyar
Kager
jaluo@jaluo.com
Daher winjo dwondi in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.