JEXJALUO ****
Kwand arithmetic to wuod Odongo olonye, onge ng'ama nyalo loye. Blair wuodgi Abeka ja Dudi to Moi oingo pache radar, wuod Bungu ja Teksas to ema koro Moi olonyo duk kor ka sembo to mudho olil, koth bende ochwe to ondiek bende ruto oko, aora bende opong'!
Opuk pek n'Otenga to Moi bende pek ne jo siasa, kochopo seche mag miriambo gi mag oyuma to wuod Odongo ema kawo namba, mbom komuoch to mago gin mana timbe mag mibadhi ma gidwaro loko godo pachji nikech kibaji osegoyogi, gidwaro yoo ma inyalo kwal godo ombulu kendo keto olethe ma bedegi boyo e loch! Moi oloko Bush gi Blair ataro.
Ato mae itimo nade! Moi odonjo e ot ma DIBO (white house) gi wuod Abes jagot kendo piny oling' thi winjo miriambo ma gi wacho! Mago duto kaka Mig. Ayugi oselero e obokene en mana yoo ma Moi dwa konyorego. Bush ohero ng'at ma nyalo nyise kaka onyalo chako lwenje e pinje jowarabu, mano to ok rach!
Moi ok ong'eyo ni piny Kenya to chalo ot ma dhoge ni nono! Osama Onyango wuod Laden kojok to muocho misinga ka moro amora e sama ohero, gima lit ni yawa ma onge keth ema tho to Moi to onduoro toke Kabarak.
Ato sani koro yiero chiegni, Rawera moro nyoro oyud ka loso ombulu mag miriambo e dalane. Ombulu go ne itero egweng' ma wuod Otike dwaroe kom od bura, Gatundu. Moi oolowa ka pier matindo ma oolo wuon, ni kata otimre nade to nyaka oting'e ating'a.
Gima adagi ni ka ochopo ni wuod Moi gi wuod Otike ema dwa kawo piny Kenya tugo godo to kare wadok e bungu mondo koro thuondi ogwere agweya. Gima duong en ni nyaka wadhi wago ombulu kanyakla, mano kende e yoo ma wanyalo thulo godo loch ang'enge ma Moi oseketo e piny Kenya.
Kata gi kwalo ombulu ma nade to thoth jood bura to gin jo NARC omiyo wan gi duol ma ong'e gima gibiro ng'ado e od bura mak NARC okadhe.
Moi osudnwa kucho owe dhingo iro kama ok obi toke!
Nyasach Kwere mondo otau ndalo duto joka Nyanam, Amolo wuod Oganda to dhano, Jaluo malo, NARC malo, LDP malo, Kibaki Malo! Kenya Malo!
Ajos JJ
Ka in gi mari moro ma di wandik ka to orni
Akelo,Nyar Kager
jaluo@jaluo.com
Daher winjo dwondi
in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.