JEXJALUO ****
Raila Nyaka ng'e ni Jopiny e weg Ombulu, kendo wan ema wachandore moloyo!
Chunya ochido kuom weche ma asebedo ka asomo kendo awinjo kowuok Kaluo pacho, jodongo ma wan ema wadhialo mondo otelnwa kendo ema koro olokore tugo ka nyithindo! Lweny onge kuma biro terowae, nyithindwa ema biro chandore, jogo ma goyo koko to otero nyithindgi somo e pinje ma oko, mwandu bende gi kano oko mar Kenya. Koro an gi in ma goyo ombulu to odong' ka chandore pacho.
Akwayo Raila gi lange ma en godo ni ka giyie to mondo gidhi mos, nyathi ma pok onyuol ok ng'iewne nanga, kendo ok chak nying' nimar ok ing'eyo nito obiro bedo wuoyi kata nyako; kata obedo ni jo-sayans to tinde nyalo fwenyogi ka pod gin e ich. Mar siasa to opogore, en mana gi yor kwe ema inyalo fweny godo berne gi rachne.
Sani Amolo Tinga nochopo kama waluonge ni wuon Oganda omiyo kik okel tulo e piny Kenya nikech loch ma gi laro gi jo-Kanu. Jopiny ema yiero kendo ema irito omiyo ka waonge to Amolo nyalo mana rito jaode gi nyithinde kende, mano ok en ayany to en mana ratiro mar wach, yie ulos kod Amolo mondo omiwa kido mar luor eka wan bende wanyalo miye luor. Luor e chakruok mar rieko!
Wachni osebedo ka chando chunya ahinya nyaka koro ochopo sechegi ma dhano orona oboke nito ere gima omiyo Amolo koro tugo mana tuk rawere, mar diro kite! Amolo ok ong'eyo ni odak e od gilas, ere kaka odwaro diro kidi? Aduoko ero kamano ne Mig. Martin Oyoo kuom twak ma nimba mane ondiko gi dho-ngere, nodwa chanda somo to kata kamano nathuthni kode ma ayudo ja-libamba moro okonya some. Ani somo dhok ma wendo ni chando jodongo!
Kuom wach mar choko bura mar kelo tulo e boma ma Buore Ka-Bwana to akwedo chuth ni Ooyo! Ngang' ere kaka wuodwa ma nyangafu kama timo gima kamano? Mwache biro wuonde kato en ema odong' e tol kato sirikal akala kalo gi meru tineno kawe to idhi kane mondo oywe mos, kaok kamano to askeche morem somo biro muocho lisasi raoyi kato luomo dier wiye kato giwachoni jo-mibadho moko ema otimo gino. Amolo pod wadwaro neni kaka wuodwa ma ratipo kendo humbe lach ka Gor wuod Oganda. Ani loch osiko kik iparni en mana dalani ma in ema iyawo rangach kendo iloro sama idwaro. Kata mana Moi bende ndalone orumo odhi yweyo, kata Uhuru ema kaw loch to oonge gi duol nikech jo-NARC to ema biro bedo mang'eny e od bura maduong'. Kik ubedgi luoro; Nyuogo itoyo mana ka isekete e wi koki!
Mogik to akwayou ni wadhiuru e yiero gi luor, muolo kendo gi chuny achiel mondo wayier jogo manyalo rito piny Kenya e yo ma kare. Nyasach kwere mondo otau ndalo duto.
Ajos wuod Atiga
Wuon Abila, Jaluo dot Kom
Ka in gi mari moro ma di wandik ka to orni
Akelo,Nyar Kager
jaluo@jaluo.com
Daher winjo dwondi
in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.