JEXJALUO ****
Chieng' tarik 27/28 dwe mar apar g'ariyo dhano nyocha mor ka neno kaka NARC bwogo KANU kendo oweyo Moi ka tetni nyaka kawuono, sani tinde kiromo kode to ochalo ng'at manyocha oyudo retrenchment nimar gino nyocha ogoye nyang'eng'o. Wuod Otike ma yande buonjo abuonja kogeto kom maduong' sani oling' ka gima otho! Jalup ker e loch thuon gweno; Moluor Musalia Mudavadi nyocha oyudo gwech ma mar punda berberie noyombe kaaye to jo-Kanu owachoni mondo ojole gi kom mar bedo jaod Bura modhial (mbunge maalum), mano nodagi nikech wich kuot mane oyudo, kane Amolo tinga kwere ni oayi kuom jalang'o to ok owinji, ng'ech neno mana gi wang'e.
Mago to gi ma moko, dhano mor kaluo nyaka dayo moti, kata jogo mane ok ogoyo ombulu to koro oyudo mbaka, iwinjo mana ni od wadu....! Amolo omiyo NARC oyweyo kombe duto man e Nyanza, nyaka jo-Kuria wang'ni oluto ne NARC, makmana joka Girango (Abagusii ema wuod Nyandusi owuondo moluto ombulu ne FORD PEOPLE duto te.
Kata kamano asebedo ka alal e kor yamo kik uparni nyocha aywak nikech olo KANU, ooyo! Mor ema nyocha owiya ma duonda odinore, KUMI KUMI bende nyocha odwa dino wang'a nimar nyocha en nyasi ma ng'ato ka ng'ato nyaka goye sigalagala. To bang' mano weche koro rich kaluo; yawuotwa moko kaka Omino, Kajwang', Owidi, gi ma moko mane ok opog lemo e loch Kibaki koro ywak ni ochiemnegi ataro. Amolo Tinga to pod yoro ochiegni gowo lokacha.
Mikayi Ngilu mane oyier kaka minista mar Ler (Health) nowachoni mondo kik twe jogo mapok ochulo gope e ute thieth to koro osechango. Nimar mano miyo gi bedo gi chuny ma chandore kendo ginyalo yudo touché moko kendo. Ute thieth moko osebedo ka kawo otese mag lowo (title deed) mondo obed kaka ranyisi ni gibiro chulo omuom endalo ma biro. Wach mikayino nomiyo jotuo olokore joneko e od thieth man Migori (St. Joseph's Ombo Hospital) ne gichako gi yako chiemo e od tedo (jikon), jodwal kuon noyudo apat ma wengegi omil simonde simonde korka jogo odonjore gi mogago mane olosne jotuo ma moko.
Wachno nochuo chieng' ma oluong' ogulmama mondo okel kwe kanyo, jatelo maduong' mar osiptandno, Mig. Luke Omwandho, nowachoni omuom ma pok ochul nyalo romo ksh 1.5 million, koro kata kamano loch to ero jo-NARC oseyudo pesa to nikanye, jo-KANU nyocha osetoko chung' duto te. Sikunde bende giwacho ni koro ok chul somo mar praimari (primary), aya nyithindo korka obiro kar rombgi to kuonde somo to oonge! Jopuonj bende nok, mano wach mitimo nade?
Kata kamano anto ayie gi loch manyien man Kenya sani mak mana ni nyaka wakonygi loko anjawo mane jo-Kanu oweyo e piny, in gi an ma koro oseneno ler yie imi NARC rieko kaka ginyalo rito piny Kenya, gin gi wegi ok ginyal tiyo piny. Parie dala ma ginda kidonje donge udi chwer, korgi omukore rode opongo kor chiel, dere ogore piny puothe onindo buya jolibamba ema modo yiende mag loro rang'ach! Omiyo temuru wakonygi. To wanyalo mana koynogi ka gin bende giyie winjo wach.
Akwayo jogo ma nyocha oloyo e yiero mokadho ni kik gibed gi sunga nimar pon alawa kawuono en mari kiny en mara, jo-Kanu to sani biro yudo puonj kendo neno kaka piny chalo!
Mos mar higa Manyien ne nyikwa Ramogi duto!
Ajos wuod Atiga,
Wuon Abila, Jaluo dot Kom
Ka in gi mari moro ma di wandik ka to orni
Akelo,Nyar Kager
jaluo@jaluo.com
Daher winjo
dwondi in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.