PUONJRUOK TIMBEWA KAKA ANYUOLA MAR JOLUO.

WUON ABILA

Gima duong ma ngato angata ma Jaluo nyaka nge malongo ni JALUO NIKOD KITE KOD TIMBENE MA MIYO ILUONGE NI JALUO. Piny owacho medo jiwo anyuola duto mondo otem dhi mos kod wachni. Kik wawuondre ni wasomo kendo walemo koro timbewa nyaka wawe chuth ma en miriambo. Wadak kuonde ma opogore opogore to bedo kod Luoro timbewa nyaka wami mijingo. Watem uru puonjo nyithindo ma wanyuolo timbe mabeyo mabiro miyo gibed kod ngima ma ber ekind oganda moko kata ekind gi giwegi. Joluo ne odak kod kwe ahinya engima gi kane ochakore chon. Joluo ne oherore kendo ne gikonyore ka chandruok owuok ekindgi. Jaluo ne ok nyal neno kawatne denyo ni ok nyal yudo chiemo maeri ema omiyo ne nitiere gima iluongo ni Kisangi, kata yuoro wadu. Oginga Odinga ne onyiso Kenyatta wachni ma Kenyatta ne oneno kaen gima ber kaeto en Kenyatta ne ochake ni HARAMBEE. Harambee ne en Kisangi, kata Kony Wadu kata Yuor wadu mondo en bende obed godo. Wachni ne ochakore chon gilala ekindwa wan Joluo nikech kane ngato dhi goyo dala ne ka owuok ei dala wuon mare ne ok ochak odog onindi ei dalgi koro ne nyaka konye kod jogweng gi duto kod tije mopogore opogore duto ne ingolo yien, ibeto Lum mar Umo kendo igero ot maninde chieng nonogono ka jok ma Mine muono kendo kelo chiemo kod tedo ne jok ma oyuoro tich duto. Timbewa ma beyogi ema koro yawa moko ose kawo kendo gichayowa godo. Joluo ne gin jogo ma oluoro chike gi kata mag Nanga maeri egima omiyo Joluo ok thor bedo jokuoge kata timo timbe mag maundo mag wang teko ma miyo achaya bedo ekindwa.
Jothurwa, kik wawe kitwa mabeyo to watem uru bedo e achiel mondo wakonyre kanyakla.

Kar buthwani mar Jaluodotcom kaeri yande en kar puonj moyangore maler chuth kod weche mondiki mana kod dholuo maler to nyaka ne olokre kar piemruok kod ndiko dho Ngere koro ndhadho mare ne orumo koro en mana kar Siasa kod ayany. Dho Ngere wangeyo duto kendo wanyalo wache kendo ndike maber chuth to ka ogik weche mag korka mach to ber mondo wa ndikgi kod dhowa.

Aneno Weche ariyo ma Anyuola moro openjo Ajos Wuod Atiga kaka irito dak edala kendo aneno ka oduoke maber chuth. Watem uru konyore eyo makare.Kata isom ma ibed kod ranginy duto manie pinyni idhi to weche joluo kata kit joluo ok lokre ka ikalogi to in iwuon ema ineno makne e ngimani. Nitiere moko ma nyaka lokre nikech kaka piny medo bedo kod pogruok to kod kaluwore kod kama wadakie. Kata idhi mana kanye onge kama oyienie ni nyaka ikual kata itim oyuma kod ngima mari kaigoyo dhako ma onengo iluongni mari kata jaduong ma onengo iluong ni Jaduongni. Awuoyo kaka wuod Luo ma ohero timbewa kaka Joluo eyore duto kik ikaw ni in ema iwuoyo kuomi. Mabeyo kaw iti godo to maricho we kik iti godo to in bende med puonjo anyuola man buti weche mabeyo.
Nyasach Omogi Awando Otenu Uduto Ei Piny Mangima
Jandikoen
Odhiambo Omolo Jakamagambo (Kodero Bara)