Penjo Kuom Chike Luo

Penjo 1. Nyaminwa maduong nene chuore otho higni adek mokadho to nimar ok olu chike piny, nene ok otere. Bende onyalo biro dak koda gi jaoda kapango?

Dwoko 1. Kaluwore gi penjoni ok aneno rach moro amora ka nyaminu biro dak kodu kapango, mak mana nikech en nyaminu maduong'ni ok onego odag e odi onyalo dak kodu to nindo to umanyone kamoro monyalo ninde. Kendo kuom tieko kweche mag chuore mane otho bende nyaka otieki nikech mano chalo gima pod en gi chola mar chuore mano omiyo pod ogak ok onyal riwo kodu tawo.

Penjo 2. An kaka chi wuowi e dala, bende anyalo nindo od min joada ka chwore pod nitie - kata ka jaduong' en ng'at ma koro oti ahinya?

Dwoko 2. Od min jaodi (Dau) inyalo ninde mana ka kwaru osetho kata ka gin joma oti moseweyo nyuol. Kata kamano inyalo ninde mak mana ni jaodi ema ok inyal riwori godo e odno. Kata kamano ok en gima ber ahinya, onego inind od nyieki moro kata e abila moro, kata kamano tinde udi igero madongo omiyo inyalo ninde bat koracham maok okiewo gi kar nindo mar min jaodi.

Penjo 3. Bende migogo nyalo nindo od min monyuole ka wuon nene ose tho?

Dwoko 3: Ooyo...! Migogo ok nyal nindo od min monyuole kata obedo ni wuon mare monyuole osetho nimar kane osedhi katedo to nomadho manyasi gi min mare manyiso mar pacho ni en dhako mosekendi kendo mano miyo ok onyal donjo e kachiend min mare kendo.

Penjo 4. Ka wuonwa nene otho higni mokadho to minwa nene ok olokni ot, to koro ot ose mukore ahinya. Ere kaka inyalo dino kuonde momuk kata gerone ot machielo?

Dwoko 4. Ka wuonu notho nyaka minu tiek kweche mag pacho kato oyudo yuore moro lokone ot koro bang' mano to inyalo losne alosa ot ka omukore, kane ok otieko kweche mag pacho to onge kaka inyalo losne ot, ka dipo ni ulokone ot to mano un ema chalo gima utieko kwer mar pacho, mano ok ber ma kata manyasi minyalo hosego onge!

Penjo 5. Bende anyalo nindo e od nyathina ma nyako ma ose kend kapango?

Dwoko 5. Ooyo...! ok inyal nindo od nyathini kata obedo ni en kapango kata en kure, mano kwero ma ok nyal hosi.

Penjo 6. Ka adhi ka nyara ma ose kend kapango, ka oket chiema e mesa, bende wanyalo chiemo kaachiel gi chuor nyara?

Dwoko 6. Ooyo...! Maro ok riw lwedo gi ore kata obedo ni nade! Inyalo ichiemo gi nyikwayi.

Pam Gogo Akello