Wach kuom Keny kod Goyo Dala

Penjo (1): Justus Owuor;
An Ojuso wuon Owuor an kod weche ariyo kende madwaro mondo jaluo elerna . Mokuongo enni wan jowuowi adek kendo wan-duto wan kod mon.Wuowi maduong' jaduong'ne pok ogodala kuom mano nyare ok-nyal nyuom ka kwargi, kata kamano jamni tone osekowo mi orwaki kowadgi gi wuon. Koro an aneno ni ok-anyal rito nyaka chieng nikech ok angeyo ni en karango' omiyo an adwadhi kajaduongna mondo anindi kendo oyeng'na, apenjo kama, nitie gima dimona timo mano?

Dwoko: Wuon Abila;
Adwoko erokamano kuom penj mipenjo mak mana ni dhochno loko tek kuom mano ok inyal dhi ka jaduong'ni ma yeng'ni ka owadu pok otieko kweche duto mag keny. Mano ichalo ng'at ma goyo okang'. Kuom mano biro chuni ni nyaka irit owadu maduong' mondo odhi ka jaduong'ne korka in bende oyawoni yore mondo onekni. Nimar duong' ok wil, omiyo nyaka irit wuowi maduong'nino.

Penjo (2): Bende long'o mondo achak gedo elowo moro manyiewo kapod an kawuonwa mialok kanyo bed dalana?

Dwoko: Onge rach gedo e lowo ming'iewo mak mana ni kaka nesewacho ni un yawuowi adek kik ikal owadu maduong' rit nyaka ogol dala korka in bende oyawoni. Lowo ming'iewo ok rach kata igoye dala. Kadipo okalo owadu maduong'ni kendo igoyo dala e lowo ming'iewono to owaduno ok donj dalani nyaka chieng'. Kamano nyalo timore to nyaka hosu gi manyasi mar pacho korka unyalon riwo lwedo.

Kuom mano wach mogik en ni kapok itimo gigo duto mipenjogo to bed piny gi jodongo kendo gilerni wechego kaka onego bedi, kik ilokri tama kato bang'e to ibiro ywak nine ok onyisi. Kik wuondi gi jolemo ni mag piny Yesu oloyo!

Mar piny itieko gi chike pinyka, mag polo itieko mana e polo. Omiyo wan kaka joluo watieko mekwa mana gi chikewa kaka kwerewa nowenwa. Chike Muma to mag joYaudi, ma kik wiyi wil ni ginyalo konyi kaka jaluo.

Ka in gi penjo to pod inyalo orona mondo alerni nonda en: Ajos wuod Atiga; WuonAbila@jaluo.com kata inyalo orone Nyar Kager; jaluo@jaluo.com .

Nyasach Kwere mondo oritu ndalo duto, Adikinyi minwa kuom Yie mondo otelnwa kendo omenynwa taya mar rito chike Kwere ndalo duto.

Wuon Abila,
Ajos wuod Atiga Ny'Ochola