Dwoko penjo Mig. Arreddo Nyang'

Owuor Nyikela en ng'a?

Penjo mokwongo: Ere kaka Nyikela/Owuor otenore gi Asembo nikech awinjo ka jomoko chiwo nonro ni gin jo-kanyikela modak asembo kata Jo-Asembo modak kanyikela(Nyanza ma milambo) Samoro asewinjo ka iwacho ni Owuor ne en jatich asembo, lerna wachni? To ka en adieri bende asembo kendore gi ka-nyikela?

Dwoko penj mokwongo: Kane Ndere Rabuor owuo Owuor nodhi dala Le kata kamano noriembe oko edalano nimar nomiyo nyar Le ich. Ei thim kuma notere nodoko jadwar kuom mano nopeyo dhok to otero dala Le kachiel achiel, omiyo ji nochako goyo ngeroni, "Owuor Nyikela ero kelo nyombo mit kotiek keny" mano ekaka notimore motieko keny e dala Le. Ogandane ema sani iluongoni joka-Nyikela modak Asembo kod milambo, mago jak'Owuor ok ginyuomre gi jok'Onyango Rabala kata sani.

Joka Omia gi Jo-Samia

Penjo mar Ariyo: Joka omia-gi ere kaka gibedo gi jo-Samia (Samia - Omia)?

Dwoko penj mar ariyo: Joka-Omia naseleronu kaka obet gin Omia, Owila, Omia, Le, Wanga, Turi kod Marama mago jok'Amolo, nyikwa Ramogi Ajwang'. Jo-Samia to wuok e anyuola joka-Kwenda. Kaka kit dakgi obedo chalo kama: Yawuoyi ariyo mane odong' kod nyako achiel ema oriwo piny kod Ojuodhi Tipo.

Aming'a piny koro nochopo kama koro Ojuodhi Tipo ketho dala Gem. Kaka noketho dala Gem ema; juogi mar bilo nomake mowite olal oko, to nokwanye gi wuod jaduong' Kwenda ma wuod Ragem mane odak Magwar but Siaya. Kuom ndalo mang'eny ji ne ok ong'eyo ni en kod mula mar bilo. Noboyo bade kod okola kama noketie bilo.

Chieng' moro achiel chi Kwenda ma min Ochieng Thomo no nene korudho mula e dho aora, modhi okwero Kwenda ni ng'at miketo edalani en ruoth wadu obiro ketho dalani. Ndalo go duto ne en kaka jakwath e dala Kwenda, to kane osefwenye to nochune mogonyo okola mane otweyo e bade moyud mula mar bilo. Kuom mano nochune modhi oomo joge kuma noweyogie Magwar.

Bang'e nong'ado aora kendo nodhi ogero dalane loka machielo ei Abaluhya, kuno nonyuolo Agolla kod Akello. Mano e kama onyuolie Prof. Ogot kod yawuoyi moko ma bende osomo ahinya ei Abaluhya. Mago e jo-Samia moyangore.

Dhoudi apar g'abiriyo mogero piny Luo gin mage?

Penjo mar adek: E kind dhoudi apar g'abiriyo moloso Luo kod joka-Jodongo ma ka igolo liswa to chamo lemo mar duong. Sani gidak kanye kata e District mage? Thuondi moko ma gisenyuolo gin jii kaka ngaa gini?

Dwoko penj kuom dhoudi moloso piny Luo: (Dhoudi mogero piny Luo gin apar g'auchiel) Ramogi nonyuolo yawuoyi apar g'angwen kod nyiri ariyo. Yawuote gin: Podho, Gwara, Otiak, Oluk, Arwa, Aluru, Onam, Amadi, Mudama (padhola), Julu (nodong god Chilo), Akwa, Okwach, Lang'o kod Obar

Nyiri gin: Ayiera kod Toro.

Ayiera nodhi katedo to kane omako ich to iye nogole kuom chuore, mine onego chuore kod pala kendo noringo moduogo onyuol dalagi. Nyathi manonyuolo nochak Ochola (tiende ni nyathi monyuol bang' tho wuon'gi).

Wuod Ramogi en Podho kendo en ema obedo kaka wuoro ema omiyo iluongowa ni joka-Podho! Nyikwa Podho emane ochopo Kenya kendo ema ogero piny Luo Nyanza kod Tanganyika.

Nyar Ramogi maduong' en ng'a?

Wasiko mana ka watemo nono yawuot Luo(Ramogi). Koro e kind dhoudi mag luo gi nyako ma bende dine bed kaka Migogo maduong ma kwongo kee ka liel obedo en ne otedo kure to nyinge en nga? Kata onywolo jii kaka ngaa gini?

Dwoko penj kuom wach nyar Ramogi maduong' en Ayiera

Joluo molokore mwache bende bedo e achiel kodwa kitimo liswa?
Kaponi olos liswa moro kata "ngado guok" bende pod joluo luongo owetegi molal ei mwache machalo kaka Muksero (Bogusero) koso wich ne osewil kodgi?

Dwoko penj kuom Joluo molokore mwache: Mig. ArreddoNyang' amor kuom penj mipenjo maka mana nyaka ing'e ni jaluo kata odak mana ei mwache to pod en mana jaluo. Kata an wuon Abila an nyakew Muksero to mano ok omona bedo jaluo. Wich pod owil kodgi ngang'. Kata sani gidwaro dwogo ei Rachuonyo district, nimar mwache man Kitutu Chache chachogi gi dhumo dho-Abagusii .

Mago to gi mamoko maok aketo malo kanyo ageno ni Mig. Arreddo omiyo wapuonjore weche mane wi ji temo kawilgo. Kwe kende nyikwa Omogi g'Awando!

An mogenou!
Mig. Ajos wuod Atiga,
Wuon Abila, Jaluo dot Kom