Dolo kata timo misango tiende ang'o?

Wuon Abila,

Erokamano. To dolo e ngima masani en an'go? To an'go ma poga gi JokaPodho maka Ramogi ka dawa ne en nyar Podho? (Ombuoro, Odondo, Anyuo, Gwogo, Oduogo, Ogweno, Ngare, Ramogi, Dibuoro, Dibogo, Orony, Owich, Ondiek donge mago gin nying Luo?). Toka iloso piny Luo masani, yawuot Bwayi dewe oko nikech gin Jomwa?

Mig. Joseph Ramogi Alila

---

Dwoko: Dolo kata timo misango en golo mich ne Obong'o Nyakalaga mawuon ji duto kendo jachwech gik moko duto kaluwore gi din joka Podho to nyakwar Ramogi gi tiende ema golo timo sawo mar golo mich e Hendh'ho mar golo chiwo ne Nyasach kwere. Hendh'ho madongo e pinjewa mawadakie gin; Odino ei Nyakach, Kit Mikaye ei Seme, Got Geng'a (Got Ramogi (but Ng'iya Girls'Sch.), Simbi Nyaima, Nyamgondho (Nyandiwa e kind Karungu gi Gwasi), Got Buru Buru gi Lira (Uganda) gi Got Chilo e piny Ngarang' (Sudan ma milambo).

Gima pogo Jo-Kwabwayi gi nyikwa Podho en ma; Bwayi en Ja-Ganda mano omiyo kata kweregi tiyo gi nying' Luo to ok ginyal timo misango moro amora e hend'ho madongo maseleronu malo kanyo. Bwayi inyaluong' ni Jak'Owiny ok onyal tomo tich dolo moro amora kata golo misango e piny Luo. Mak mano mano ok onyiso ni en akwede, chik Luo ema lero kamano, Mig. Alila kik ine marach ni ok un achiel kodwa. Kata mana ei Seme bende nitie jodak to sani gidak kanyakla. Kolunje ok gin jo-Seme kata lemo ok ginyal chamo e dalano.

Penj mar ariyo: Ang'o ma ne opogo Podho gi Joka-Ramogi modong' Uganda, Zaire gi Sudan?

Dwoko penjo mar ariyo; Ramogi nochopo Uganda machiegni gi god BURU-BURU, kanyo emane jaduong' Ramogi odakie kendo emane oyike. Nitiere alama kod pi thidhia (achiya) ma ok rum. Kanyo emane jodongo duto timoe misango, kendo ng'ato ang'ata ma nyakwar Ramogi gitiende ka dwaro hap jodongo to nyaka dhi mana e godno. To kadiponi ok in nyakwar Ramogi to kik item chopo kanyo nimar inyalo yudo sand maduong' mokadho.

Yawuote apar g'ariyo e mane ochopo godo Uganda kod nyige ariyo. Kane pod gidak Lira to juogi nomako Podho kod Arua; Podho ne nigi Ragwar kod kom. Arua nomi bilo mar rit miluongo ni tong'.

Kuom hawi marach nyathi Arua nomuonyo tik Podho, kaka Podho ne en ng'at mager ahinya nochuno Arua mobaro I nyathine kendo ogolo tigo, nyathino notho, kuom ndalo moko mogwarore notimore ka hono; wuod Podho maduong' miluongo ni Okidi nokawo tong' Arua mar bilo obayo godo liech.

Arua nochuno Podho mondo oomne tong'e mar bilo, nowachone niya, "kane nyathina omuonyo tigo to nichuna mabaro iye, kendo notho, omiyo in bende nyaka iomna tong'a mar bilo". Podho noluwo bang' liech moting'o bade malo to nikech ne en'gi juogi mager kuom hawi maber noduogo tong'.

Bang' mano noluongo ogandane duto monyisogi niya, "kawuono ok wanachak wanere kendo wuod ma," kendo nomiye tong' gi kadier ng'eye, kendo nowuok gowetene abiriyo kochomo yo podho chieng' machiegni gi Rwanda but nam Edward . Nogoyo dalane kanyo kendo noluongo dalane ni PAR LUO, bang' ndalo manok nochako wuoth kochomo yor nyandwat, nochopo but nam Albert, kanyo bende nogeroe dala machielo, nopidho yiend bilo, kanyo iluongo ni WADH NDAWA nyaka kawuono.

Kuom ndalo mogwarore nogero mier mopogore opogore mogik to nobiro but Busia/Tororo mogero dala kanyo. Mogik to nodong' gi yawuoyi ariyo nimar kamoro amora ma nodhiye to oweyoe wuode mondo oriti. Okidi nodong' Jinja. Nochopo Tororo kod Olong'o gi Ramogi (ma en Ramogi matin ma nochako wuon'gi).

Olong'o nonyuomo nyar Karamonjong' miluongo ni Ateso, mano emogero anyuola mar Teso modak ekind Kenya gi Uganda.
Kanyono emane owadgi miluongo ni Mudama noyudo ka adhonde koro omako mane ok onyal yudo teko mar rito piny, nomiyo Podho yawuote mondo oriti kendo otagi. Yawuot Mudama gin: Kisodhi, Ager (tat yien), Owiny Sigoma, Ogello gi Odongo. Mago e oganda mane Podho ochopo godo Kenya.

An mogenou,
Mig. Ajos wuod Atiga Ny'Ochola
Wuon Abila, Jaluo dot Kom