ATIM NANG'O?

Penjo.1
An dhako man gi higa 42. Ne okenda gi ja piny moro to oweya oyudo nyako moro. An gi nyathi manyako man gi hig apar. An gi tich ma atiyo to wach mathaga en ni bang ndalo mangeny asebedo ka aonge dichuo nikech luwore gi gima ne wuon nyathina otimona. Ne okendo nyar jirani bas odhi odak mana buta kanyo. Ne oweyo konyowa kendo odhi chuth. Koro wach madwaro wacho en ma. Sani ayudo ngato moro maok tin ahinya to ohera an bende ahere. To osiepna ni ne okethore gi chiege ma dhako odhi oweyo nyithindo abich. Koro odwaro mondo okenda wadhi wagol dala kode.

Dwoko.1
Mikayi Damaris Achola, ayudo obokeni koa kuom Akelo nyar Kager kuom mano daher mar miyi dwoko ma nimba kendo kaka iwinjore. Pod in miyo matin kendo inyalo yudo ng'ato moheri kaka isewachono, kik chunyi chandre ni piny odong' kodi ooyo, chwori mane ohangi kane oyudo dhako moro machielo kendo ohero mano ok rach in weri kode. Koro in iwuon to yie imi jaodi mane oringono ler mari kaka iseyudo ng'ato madwaro kendi mondo kik oparni obiro manyi kendo ka dak obedo matek gi nyako mane okendono. Kata kamano pod en wuon nyathini omiyo loso to unyalo loso kaka jogo mane osedak kanyakla. Kaka osiepnino nokethore gi chiege e kaka in bende ne kethruok owuok e kindi gi jaodi omiyo onge rech ka useheroru. Hike miwachoni ng'eny ok nyal moni kendori kode, mak mana ka en gi higni mathoth moromo bedo kwaru korka inyalo dikori. ka oyombi gi higni apar gi wiye to mano ok monu dak. Hera man e kindu ema duong'. Penjoni omiyo aparo wach moro mane jathum moro yande oweroni, "ka wuoru okendo nyako matin mikwongone to iluonge mana ni mama, nikech ochung' kar meru". Golo dala to mano en kaka uchano uwegi, mak mana nyithindo mane min gi odhi por ema ok nyal gedo e dalani nikech in miyo matin. Omiyo jadiyanino nyaka los chenro motegno kapok ugoyo dala.

Penjo.2
Luoro mara en ni nyithindogi biro kawa kaka ng'ama nade to dhako ka oduogo to abiro timo nang'o. An gi paro mangeny to akwayi mondo ikonya e paro. Nyithindo gi dongo kendo maduong osedhi tedo to mogik nitie e form mar ariyo. Miya kony mari.
Enjoy life
Dee

Dwoko.2
Mana kaka aseleroni malo kanyo ni nyaka ulos un uwegi kaka udwaro chako dak ma wuondruok onge. Nyithindogi nyaka item loso kodgi ka pok uchako dak kanyakla gi wuon paru manyienno. Ka ineno ni gin nyithindo man gi luor kendo inyalo dak kodgi to onge rach. Ka tek to nyis jadiyanino mondo one kaka onyalo timo. Mago nyithinde. Otem loso gi miyo mane odhi por chande kuom wach maru mar kenyno, kik chieng' moro obuogre oduogi e kor dak. Gima ber onyalo biro kendo odhi ogoyo dala gi chuoreno kendo kanyo ema nyithindogi biro gede to ok e dalani. Ka nyithindogi nyiri to onge wach nimar kweche mag gedo ok omakogi.

Kuom mago duto yie ilosgi osiepnino koyie to mondo utim kaka aleronuno, kata kaponi ok aleronu tiend wechego maber to unyalo penjo ng'at machielo, anto mano e kaka anene kendo kaluwore gi chike Luo. Akawo thuoloni mar dwokoni erokamano kuom bedo gi chir mar penjo wechego, kendo ageno ni ibiro miya ler kaka chenro chalo. Kain gi penj to orna kata Nyar Kager wabiro temo dwoki kaka wanyalo! Kwe kende! Obong'o Nyakalaga olagi ndalo duto.

An mogeni,

Wuon Abila,
Mig. Ajos wuod Atiga Ny'Ochola,
Jaluo dot Kom