03/27/2006
WECHE MOKADHO
JEXJALUO ****
;
NYANZA
Jolimbe mawuok e piny ulaya iparoni biro timo limbe e gwenge ma okiewo kod nam lolwe. Maendi en limbe mar temo timo nonro ne yore mag lupo kod ler mar aluora mar nam lolwe. Ka bende nonro luwoni pinje ulaya e chiro maduong' ne rech ma wuok e piny Kenya kendo golo osuru madirom gana piero auchiel kod adek higa ka higa. Katakamano luoro sani nitie ni osuruni nyalo dok piny e kinde mabiro kaluwore kod nok mar pi e dhowedhe ma nam lolwe e kindeni. Kendo rech bende doko manok ndalo ka ndalo. Jolimbegi igeno ni biro timo nonro mondo reye ma nam lolwe pod nyalo thiyo nyime bedo chiemb sungu kod yore mag kiluwa makare kata ooyo. Bende igenoni jolimbegi enochop nyaka e nam chumbi mae e gwenge ma Mombasa.
NYANZA
Odiochieng ma nyoro nye en rapar mar tuo mar kahera(T-B) e gwenge ma opogore ei luo nyanza. Ka bende nyimiyo oganda leche ma otenore kod tuoni ma nonro oselero ni kawo ngima thano mia ariyo odiochieng ka odiochieng epiny Kenya ka. Moloyo to e gwenge ma risaf. Katakamano yangore ni oganda mathoth mawuok e risaf pod ok lu okenge makare ma ochiw kod lakteche mar thiedho tuoni kendo oganda mathoth ok chop e ut thieth e kinde makare mondo omi giyud thieth. Ka bende yangore ni piny owacho oseketo yedhe mag tuoni e ut thieth kendo chiwo thieth ma onge otonglo ma ichulo. Bende nyofwenyore ni oganda luo ni kod luoro mar pim kagigaloni ngato ma oyud kod tuoni ni kod kute mag ayaki (AIDS). Katakamano laktar Sinitei, jal ma ochung ne thieth mag kahera kod ayaki ei pachoka , nyoleroni oganda mondo obed kod ngeyo ni tuo mar kahera ni kod pogruok maduong kod tuo mar ayaki. Ka kahera ne ofweny kod lakteche e higni mag (1882) ma opogore kod ayaki ma nyoyudre e higni manok mosekadho. Bende nyojiwo oganda ni kahera ni kod yathe kendo thiedhore ma rum chutho ka olu ratiro makare ma ochiw kod laktar.
KARATENG'
Jopuonjre kod nyithind sikunde man ei Maseno divison, sani osegolo puoch kod pak mogundho ni SADP kaluwore kod puonj kata SOCIAL EDUCATION ma sani ikelonigi e sikunde kod e utegi. Japuonj maduong' ma Kuoyo primary Mig Odongo Mango, nyoluwo ni puonjni osekelo lokruok maber e pach nyithindo ahinya korka tuo maduong' mar ayaki (AIDS). Nimar ekinde machon oganda ma e gwenge yande ok o'ngeyo wach tuoni, ka giluonge mana ni chira. Puonjni sani itimo e sikunde kaka Kuoyo, Chulaimbo, Maseno Mixed, Nyametsa, Mbakoromo, Agulu, Sanganyinya, Obwolo, Sunga, Marera, Esivalu, Eluhobe ka osir kod riwruok maok mar piny owacho ma dendoreni Sule Assisting Development Project (SADP) ma ogo tach e gweng' ma Karateng'.
SADP bende wuotho kuom riwruok mopogore opogore mag jomadongo ei gweng' koda kuonde ma imadhe andiwo ka gipuonjo tim makare kuom nindo e kind chuo gi mon, kendo gichiwo nono mapira ma chuo nyalo ruako (Condoms) kuom chuma ragot mondo ogeng' twoche mag nyaye kod ayaki.
KISUMU
Joloko ma e kar idho nyamburko ma e boma ma Kisumo sani oseluwo ni kaluwore kod winjruok maok ne ochopie chieng tarik piero ariyo kind munispal kod kambi mayand solo osuru ma o'ngere kaka (KAPS)ok gibigolo osuru chakre tarik piero ariyo kod aboro dweni. Bende nyegikeyo oboke ni ut fwambo weche kasiro wachni.
GWASI
Jotelo mag rito aluora mag yiende kata Forest Officers nyotimo limbe e gode ma Gwasi kendo oneno keth ma oganda ma odak e godego osekelo ni yien mayande nitiere e godego. Kaotelnegi kod Mig Ochola, nyegikwayo piny owacho mondo oket ondamo mar rito yien mae godego eko kabende gichiwo jumbe adek mondo joma odak egodego odwar yoo magidar godo e godego.
SEME
Kiondko nyomako jodala moro Kombewa manye orik oluongo orgi mondo obi olos chenro mag nyombo. Orni ma en ja tok kodera, ka no ose gago, to ochopo sa loso wach, nyosieko kod otiko mayande osenyiewo nego wuon jaode kuong'. Mit oriwo gi ma ochopo sili'ng elufu ochiko. Ma bende romre kod bech dhok ariyo e chiro ma Kombewa. Mit eka aeto olero ni en koro oonge kod gop nyombo katamatin, nimar andiwo mane onyiewo ne jaduong'ne okawo kar dhok ma dine okelo. Jaduo'ng dhoge nyomoko motame kata mana wuoyo. Min nyako to notoye mana nduru mit oganda mang'eny nyochokre ei pachono kendo gi hum ahinya kuom wach ma kama ma pok giwinjogae ei Luo.
Ja fwamb wechegi en Eliud Audi.
Joluo.com
Ka in gi mari moro ma di wandik ka to
orni
Akelo nyar Kager, kata wuon Abila, kata
Awino Rayier
jaluo@jaluo.com wuonAbila@jaluo.com awinorayier@hotmail.com
Daher winjo dwondi in bende,
iwinjo?
Inyalo oro twak kod weche manyien ne: Mig. Ajos wuod Atiga
WuonAbila@jaluo.com
GALAMORO : Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.