04/05/2006
WECHE MOKADHO
JEXJALUO ****
;
Jopur ma wuok e gwenge ma Nyanza sani osekwa mondo opur pamba e ondamo ma malo ahinya. Mani luwore kod chenro ma piny owacho koro osechako mar pogo kodhi mag pamba nono maonge otonglo moro amora ma ichulo. Magi nye olu kod jakom mar Bondo County Council mig. Albert Onyango. Bende nyomedo ni e kinde mabiro nengo mar pamba biro idho malo kaluwore kod masin mar loso pamba ma sani piny owacho osechiero. Bende nyolero ni kothe gi yudore e apisi mar D.C ma e gwengego.
MIWANI
Jopur madirom alufu abich,nyocha otimo nga'nyo maratipo ka gikwedogo okang' ma piny owacho chano mar uso kambi mar rego niang' ma Miwani Sugar Company. Jopurgieki ma wuok e gwenge ma Nandi kod Miwani ne osiro okang' mane olu kod jaod bura ma e gwengego Mig.Ayieko Olweny ni ka piny owacho ok ni kod ikruok mar chiero kambino to mondo odwokne jopur puothegi mane ogere kambinoero.
HOMA BAY
Migawo mar chiayo kata Livestock ministry e bade ma Ndhiwa, sani isekwedo paro mayande jopith ni godo ni tuo mar athung'a guen
kata bird flu osemuoch e gwengego eko. Jal ma ochung' e lo migawono Mig.Wilson Kemga sani oselero ayanga ni tho mar winy e kar rito le kata game park ma e gweng'no ok otenore kod tuo mar athung'a guen kata matin. Maendi luwore kod okang' manye oganda ma egwengego nyokawo mar chopo e apis D.O ma e gwengego mondo omi olernigi tie tho mar winy e kar rito le ma Ruma .
SIAYA
Josiasa ma e gwenge ma siaya nyokwa kod jadolo Ken Wachinga mondo omi githegre kod tayo chenro mag sikunde mag piny owacho. Maendi luwore kod ng'anyo manye otim kod jopuonjure mae sikul ma Boro secondary school e gwenge ma Alego. Jopuonjre gi nyoriko oseriemb kendo olor sikundno nyaka e kinde ma ok ong'ere.
KISUMU
Obila ma Kisumo nyomuocho kod magina kendo onego achich moko ariyo manye iparoni chano monjo kar ohala ma bende dendoreni Yatin Supermarket. Wechegi nyo sir kod obila Albert Waweru.
KARATENG
Jonjore otieno ma nyoro nyo omonjo kendo kwalo mwandu ma otiap e gweng' Karateng, e dala ma Chilaimbo. Njore makamae en mana bang'
jumbe ariyo kayande osemonj dala moro ma bende ondamo machwok ka owuok e pacho ma nyo imonjoni. Kata kamano obila sani osepedho menyo e ondamo ma malo. To nyaka sechegi pok omak 'ngato ka otenore kod njore nieri.
RACHUONYO
Jal moro ma ja higni piero auchiel nyoro omak kod keth mar timo tim anjawo kod rawera ma tich-tich ma jahiga abiriyo e gweng' ma Kamine ei Kokech sublocation Rachuonyo district. Jalni nyo oseter e od a'ngech kendo ibiro tere e nyim doho e kinde machwok ma biro.
AWENDO
Jadolo moro mar din ma bende dendore ni New Apostolic nyoriembo jolemo kod ligangla e kar od lamono kaluwore kod yiero manye ok osiro ni itimo e yo ma kare. Kata kamano obila nye omolo e kar lamono kendo makogo mit okane e apis ruodh gueng'no ka pod nonro dhi nyime.
SIAYA
Migawo mar tiegruok e gwenge ma Siaya e lo Mig. Joash Nyariri sani osechiwo yuak ne riwruok ma bende idendoni Teachers Service Commission mondo omi omed jopuonj e gwenge ma siaya. Ka bende owacho ni Siaya ni kod nok mag jopuonj elufu achiel mia ariyo. Mani luwore kod medruok mag jopuonjre e bwo chenro mar piny owacho mabende ong'ere kaka Free Primary Education.
HOMA BAY
Jowuoth kod joohala ma wuok e gwenge ma Homa Bay kadhiyo Kisumo sani ni kod midhiero mapek miwuoro kaluwore kod koth maratipo ma osechwe e gwengego kendo okelo chuodho e wa'ng apaya maduo'ng madhi e boma ma kisumo. Wachore ni loche ma otiap sani ogo gare e wa'ng apaya ma Kadel/Adiedo nyaka e sechegi.
Ja fwamb wechegi en Eliud Audi.
Joluo.com
Ka in gi mari moro ma di wandik ka to
orni
Akelo nyar Kager, kata wuon Abila, kata
Awino Rayier
jaluo@jaluo.com wuonAbila@jaluo.com awinorayier@hotmail.com
Daher winjo dwondi in bende,
iwinjo?
Inyalo oro twak kod weche manyien ne: Mig. Ajos wuod Atiga
WuonAbila@jaluo.com
GALAMORO : Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.