ANG’O MARACH E KENY MA TINDE?
Paro osechanda ahinya kaluwore gi kaka weche sani osebedo e keny. Ji ma okendore tinde onge pogruok gi jowadgi ma podi. Ok ang’eyo gima timore to kata kamano anto ok amor ahinya gi yo ma oganda osekawo ni.
Jo ma mon gi chuo duto osebedo ka timo timbe ma aseneno gi to kata kamano chuo osedhi mabor moloyo e timbegi. Tinde ka idhi e magawa moro e ndalo mag giko juma kaka ngeso kata odira to gik ma ineno dwa tucho wang’i. Ibiro neno jaduong’ ma mbas babani gi nyako ma tin ma dibed mana mbas nyare ka jodich mokadho. Sano to ring’o bulre to gweno chielre e magawa ka marach.
To samoro joge to oweyo e ot maonge chiemo to samoro owegi mana gi kwon gi aloth. Ok ni chamo kwon gi aloth rach dawe, en mana ni ka Nyasaye omiyi gimoro to in gi jogi, aneno ni ber ka iparo e jogi gi be to ok mana jo moko nono ma sama lweti odong’ nono to ringi.
Ok awacho ni dhi budho gi osiepe rach dawe. Rach donjo mana e pesa mang’eny ma itiyogo kwonde gi to gi asara ma giweyogo chuo. Rach mar ariyo en ni ere gima omiyo ng’ato onego wound nyathi ma mbas nyathine owuon to kata en owuon ong’eyo maber ni ma gima ok onyal hero ni mondo ng’ato otim ne nythine? Ang’eyo ni ji mang’eny nyalo wacho ni jodongo gi ok mak nyithindo manyiri gi gi thuon to kata kamano en gima oyangore malong’o ni jodongo gi rocho ga pach nyithindwa gi gi pesa kendo nyithindo gi nikech pok gibedo mariek ahinya paro ga ni ma ranyisi mar hera. Gima gikia en ni jogi odich mana gi dendgi nikech mon to gingo e udi kendo moko ni kata gi mon moloyo achiel.
Chon ne iwachoga ni nyithindo gin mag oganda mangima.
Sani to nenore mana ni ji pachgi oselokre ndi kendo ng’ato ka ng’ato odich mana gi gik momako ode. Lith ndi to nikech gi two mar ayaki ma tinde okwako piny ni to tich koro tekye moloyo. Moko kwom jogo ma oseketo genogi  kuom joutgi ma kara ne nigi wange mang’eny osebuok mana ka laktar bwogogi gi wach mar ni gin gi two. Dimbruok e yore mag chodruok ok yot ne dhano to kata kamano da watemo ahinya to ahinya jogo ma ose nyombo kata gi mosenyuom nikech ka ifwong’ri to ok ngimani kende ema inyalo njawo da, injawo nyaka mar jaodi no. En gima lit ndi ni ng’ano ma osebet ka odimbore ndalo duto nyalo yudo midhiero mar tuo kaka ayaki to gi nyeye ma moko mana nikech ng’atno mane oyiero ni jaherane ma odwa dakgo ndalone duto e piny ema okelone e ot kendo omiye mana e otandane mar keny.
Waparie uru wachni matut nyikwa Ramogi. Kaok kamano to Nyasaye ogwedh u.
Adhiambo Nya Kanyamuot.