somo ok en giko!

Abende aungo Jakamagambo gi Wuon Abila lwedo ahinya.  Ayie gi weche magiwacho ahinya kendo ageno ni waduto kaka nyikwa Ramogi wabiro bolre mondo wapuonjre.  Riwruok e paro ema biro golowa oko.

Somo ok en giko kendo ma emomiyo ogendni ma moko tinde ose mayo joluo lain. Somo kata tiegruok en mana taya ma onego bed ni menyo ne ji yo mar ngima. Kendo kosemenyni yo to inbe onego imakie lwet jomoko inyisgie yorno. To wan onagi to ng'enywa ndaloni osekawe kaka giko kendo bang' tiegruok to koro waparo ni wase tundo chutho. Ma ema omiyo koro midhiero
oluorowa kendo wasiko wayuagre ayuaga kaluo wa ka.  Kuom ranyisi, nonro nyocha oyango ni kata obedo ni Nyanza nigi kuonde chieth ma nigi gik chieth mabeyo ma loyo kuonde moko kenya ka to nyanza pod oyombo mana e
tho mar nyithindo ma pod ok oromo higni abich. Wach mar dok piny e somo ma nyanza to tinde osenuo ma chal mana wer. E demokrasia ma onego bed ni nyanza e gundane kaluwore gi kedo mar Jaduong' mosenindo Jaramogi to wakuodoe mana wich. Wang'eyo mana demokrasia ka ichiwo puonj ne jomoko to ka koro ochopo ni wan be watimo yiero to wagone demokrasia kiful e ot ma wawit ofungu.

Ng'eny jowa ma osomo ok dwa winjo wach kaluo kata matin. Ng'enywa oketo mana kaka osewach gi jomamoko ni ka gisekowo pesa to oromo. To koro we ang'eng'gi ni kowo pesa to ber ndi kendo ukonyo jonyuol u go gi wede ndi, to kata kamano pachu ema kaluo odichgo moloyo. Ka
ji odhi kaluo to osiko mana e ndara gi mtokni gigo ka giromo gi osiepe e bache. Ugenyawa ka idhi manyo osiepni ma odhi dala ndalo skuku kata paska to kik
ithagri dhi manye korgi dawe. Okan iyude kuro ngang'!  Dhi mana Ugunja, Sidindi, Rang'ala kata chiro moro machiegni gi korgi. E bache gi ema gigoye mier. Ka ndalo adek rumo to gichwinyo mtokni gidok ka pango ni
giseneno jodala.

Ok adag ni ji oyue da, ndalo skuku gi pasaka gin ndalo yueyo kendo an bende ang'eyo mano. Gima ok onego watim en ni wawuondre ni mano e saa ma wadhiye neno jodala kata timo kony makarwa ne kaluo nikech oyangore ni ok
wabi yudo thuolo moromo. Ka ing'eyo ni idich to ipango apanga maber to idhi loyo ma dinyal kaluo ka in kendi to kata ka iriwri gi jowadu moko. Kendo ma dhi ne mon gi chuo joluo te. Wan ema wabiro golo nyanza oko, one ng'ama biro weyo mare ni biro losonwa marwa dawe.  To mogik achiwo pwoch gi pak ni nyithiwa ma nyanza ma osebet ka timo gigi nikech ok en gima yot. Jowa to ema konyo tek malich. Ka itero kata wendo moro ogero gimoro e gweng' to ni idwa mayo mjumbe kom. Gima nyaka wang'e en ni waduto wakedo ni dongo nyanza, yore ema nyalo bedo ni watiyogo mopogore. Ang'eyo ji ma chunygi
osetho e konyo piny nikech dondruok bilagi. Omiyo wan jopiny be nyaka wayaw wang'wa. Wabiro mana yudo gima wadwaro ka waketo sinani. Nyasaye ogwedh nyikwa Ramogi pep!

Adhiambo Nyar Kanyamuot.