WUON ABILA
KETO TIPO MAR OBAMA KOD RAILA OK NYAL MIYO OBED PRESIDENT MAR KENYA
Piny owacho odagi ahinya ni keto tipo mar Raila kod Obama ok nyal miyo oyud tich mar rito Kenya. Yande anyuola mar Onagi oromo kod Raila New Jersey epiny mar America kamoro ma iluongo ni Woodbridge ei Kar Chiemo kendo Math kod Nindo ma iluongo ni Hilton. Ne en budho mong'ith chuth to gima ne okawa kod wuoro ni Weg Piny mar America ma onengo ojol Raila  kod Omuom kod tudo Raila kod Jotelo mag America kod pinje moko ne onge budhoni  kata achiel to yawa mane oyuoro budhoni ne gin mana Joluo mabende thothgi odak  America chuth ma kata gimatimore Kenya  emagikia.

Piny Owacho Penjo anyuola mar Joluo ni en angoma omiyo ji dhi nyime to Joluo to bagni gin gidok mana chien?Raila ok nyal bedo President nikech ne oromo kod Joluo New Jersey. Maeri en miriambo chuth. Jogo ma wuotho kod Raila ket uru Raila kama oromoe  Nitiere Yawa magombo agomba mondo girom kod Raila kaka Rev, Jesse Jackson. Rev. Al Shampton, Kwesi Mfume, Yawuoyi machalo Hally Barry mane Mayor ma Washinton D,.C. Mine machalo Jaod Bill Clinton,Mine machalo Oprah Winfrey, kata mana Governor ma New Jersey kata mana Mayor ma Woodbridge kod Jotelo machalo Edward Kennedy, Raila onego oromie kata mana kod  Jolemo madongo ma bende thoth  gi gin e dinde mag joratenge kod Yawa moko maok  akuano.

Yawagi biro miyo Raila nenore ng'at ma dwaro bedo Jatelo adiera nikech piny mangima ongeyogi kendo oluorogi.Onge gima kawo tipo kod Obama biro konyo godo Raila, maeri en anjawo miwuoro. Wan kaka Jokenya man America nyalo bedonua maber kawa neno Raila ka oromo kod George Bush ei ot ma rachar (White House) to ok pandruok kode e udi ma ok oromo kod Raila. Mwache neno tugogi kendo miyo gimedo mana chayo joluo.

Piny mar anyuola mar Joluo ohero Raila ahinya to jok ma wuondore ni oteno Raila ema wuonde. Bedo President ok en tugo to Joluo pod milore ok gidwar wuoyo kod Mwache mondo okony Raila kagi wuoyo maber kuom gik mabeyo ma Raila ose timo ne piny Kenya mangima. En mana jiwo wach kaka inyal kony Raila kik ngato kaw gigi ni samoro en ema piny owacho wuoyo kuome.Yawa duto ma luwo bang Raila we uru wuondo Raila to konye uru kod ng'ado rieko eyo makare kendo Joluo duto  manie piny ngima warituru Raila kod yo moro amora.

 Mwache duto to ahinya Okuyu dwaro remb Raila ahinya nikech otamogi kuo.
Nyasach Omogi Awando Otelnu Uduto e piny mangima.

Jandikoen Odhiambo Omolo Jakamagambo(Kodero Bara)

Wach Mogik:
Kuom weche ma wuod Kamagambo olose malo kanyo uwinjo ma ng'at ma ok owinjo to ite odino kata ok odwar winjo pach joma moko. Goyo picha gi okewa ma Obama ok nyal miyo Raila yud kom mar Ker ma Kenya kata matin. En mana nyiso wich diny kata mondo jogo ma ok ong'eyo ngima man Amerka par ni Obama en Ker ma Amerka, ooyo...!

Ok en kamano, Obama to wuoyi maber kendo mariek, to ere kaka kawo tipo mare lando ne ji epiny mangima nyalo konyo yudo loch mar Kenya? Arito dwoko kuom jogo mane oloso romo mar Agwambo gi Obama. Yieuru mondo umiwa ler.

Wuod Ogambo owacho maler ni thoth jokanyo mane oromo gi Raila gin jo-Luo modak Amerka kata mana kipande ma Kenya ema gi onge godo, dala bende ok gidhi, ere kaka ginyalo miyo Agwambo ombulu mar yudo loch? Koso udwaro ni mondo oduog ochung' Amerka? Kare losneuru gweng' moro obi omaki kom mar od bura!

Jogo ma luwo bang' Raila ka giparo ni ibiro migi lemo ka loch oyudore ndalo mabiro atemo siemou ni uleko lek ma ok nyal timore! Jaluo kende ok nyal miyo Raila bed Ker yieuru mondo riwruok obedi e kindwa gi mwache ma moko to moloyo jogo man pacho kaluo ok joma osumo dak e piny Amerka ma kata ombulu gionge godo.

Ka in gi penj kuom wechegi kata ineno ni ok giberni to yie itudri koda mapiyo kaka nyalore eyor imel: WuonAbila@jaluo.com

An bende daher mana mondo Agwambo obed Ker mak mana ok Ker mar ji ariyo kata adek matimore jokanyo Guo Ang'ang'o, Ker mar Piny Kenya mangima. Od wadu ema inyalo yude resruok to ka ok kamano to kare wabayo yo koro mwachegi ema biro telonwa nyaka chieng' Joluo yie ulok pachu...!

Wuon Abila