Ero riwae e paro gi oganda

PWOCH GI PAK NE OJANDE!

Mokwongo an bende akwedo ahinya wach mar jogo mantie e piny owacho tiyo gi mwandu jopiny e timo kampen ne buch siasa. Ma tim mibadhi ahinya kendo ageno ni jogo mantie gi duol kaka migawo mar yiero e pacho ka biro
kawonegi hatua mowinjore. Orach ahinya to ok mana nikech opogore gi kaka chik wacho to bende nikech omiyo buch siasa ma piny owacho oriwo lwedo kwalo ng’wech ne buche mamoko e laro kombe e yiero. Ma en nikech e pinywa ka pod yombo mar ng’ato luwore ahinya gi chuth mar ofuke.

Mar ariyo an bende ariwora gi jogo ma ywago kama thuolo mar telo e pachoka ochiko. E kombe abich ma nyocha ilaro e yiero matin manyocha ni, duto ne nitie wat jalo manyocha omako komno ka masira mar podho ndege no ne pok oyudowa. Laro kom telo to en ratiro mar ng’ato ka ng’ato to kata kamano en gima ong’ere maler ni ka jalno manyocha ni e komno watni kendo
oungi lwedo to yot ahinya mondo iloch maloyo ka ichako piny kendi. Kendo oseyudore ni nitie ji moko ma sani osechako paro ni telo inyuologo ng’ato. Ma ok adier makende dawe. Telo kata po nono onyuoligo to mana matin nono, ng’enyne ipuonjruok apuonja. Emomiyo samoro ng’ato nyalo kawo kar watne moro to ok oti maber kaka watne no ne tiyo kata otiyo maber maloyo
kata watneno. Ma ema omiyo nyaka oganda mi ji te thuolo mar temo telo. Ok ni ka ng’ato ochung’ to ji othung’e mana gi penjo ni to into in wuod ng’a ka ng’a kata nyar ng’a ka ng’a. To ma ok onyiso bende ni ka watni moro osega telo to dak itel da, ka iromogo to dhi mana nyime. Rach en mana ka ikawo ng’eruok watni no ema koro ibarogo ji ndas ni in wat ng’ane ka
ng’ane.

Mar adek to en ni apuoyo ahinya duond buche mag Nark-Kenya to gi Kanu kuom miyo rawere thuolo mag telo e buchegi e yiero ma nyocha ni. Migosi William Kariuki ma nyocha oyier e otiko mar Nark-Kenya kar od bura ma
Nakuru Town to gi nyawadgi Wario Galgalo ma nyocha oyier kar od bura ma Moyale e otiko mar Kanu gin gi higni 27. To ok gin agina ojende nono, gin ojende mariek kende ma oromre gi tich. Nikech ok en aena wach mar miyo joma tindo thuolo dawe, nyaka gibed joma oromre gi tijno eka oluwre gi ratiro. Kendo apuoyo duond buche ariyogo kuom ungo joma mine be e kombe kaka ma North Horr to gi Laisamis ma ne oyomb gie.  Bende apuoyo dwond buche duto nyaka ma ok akwano ma miyo thuolo mar telo ojende gi mine to gi ji mamoko ma ok joyudoga thuolo. Kendo atro lemo ma kende ni mondo dwond buche ma pok ochako timo ma biro kawo puonj makende nikech sani to ratiro mar dwond bura ema biro gole oko.

Oseyudore e nonro ni pinje nyalo mana dongre ka oganda omiyo ji duto thuolo mar loso mwandu(economic empowerment). Ma koro nyiso ni nyaka wariwre wate e paro mar dongo piny. Jodongo, chuo, mine to gi rawere te nyaka waket e telo mondo sache ma iloso chenro to ikawo pach ji te kuom jogo ma ochung’negi. To bende jomoko nyalo wacho ni jotelo jopiny ema yiero obed e
nominations kata e ombulu owuon. Kata kamano wang’eyo maler ni ka party ok oungo ng’ato lwedo to kata aye jopiny oyie kode manadi to odhi dong’, ahinya to Kaluo wa ka. Omiyo dwond buche ni gi tich maduong’ mar neno
ni gichopo singo ne joma mine to gi rawere. Kendo adwa kwero dwoch buche ma ketoga ni giriek ahinya momiyo giketo mana ji ma kama kuonde maging’eyo ni dak giyombie ni sani jopiny riek mokadho. Wang’ teko ma
chal kama onge kama biro terogie.

Mogik to en ni watiuru kanyakla kendo wachni ok onyiso ni jodongo gi chuo owe telo dawe. En mana ni gipuonjre tiyo gi jowetegi, ahinya to e siasa. Nikech wabiro bet ni watiyo tij nono ka higni moko mabiro kendo wachako yuagre ni onego wami chuo gi jodongo thuolo mar telo.  Waduto nitie rieko ma wanyalo yudo koa kuom jowetewa, emomiyo Nyasaye ne ochueyowa mopogre.
Nyasaye ogwedh nyikwa Ramogi pep!

ADHIAMBO NYAR KANYAMUOT.