Bug Loch Oolo Sasia ei okuche

Wuon Abila, kod jokanyanam,buk man gi ndhadhu ma okiew kod kamaloka ma wuod gi Obasanjo maratita ma idendo ni Ajuoga Babafemi Badejo ose olo kihondko ie joka atwarwa. .Bugni mane otajo kendo ofuoko e lela weche mon'gith kendo ma milimili e wi wuod Luo marandiga kendo ma otange migosi Raila Amolo Odinga Agwambo, nyocha oolo manyiru kuom jotelo mag dhood jakamumbi.

   Thuok weche ma bugni otin'go iporo mana kod mago ma iparo ni ne ondikie
bug loch mane ombogo oredho e luet Jaduon'g Jaramogi Oginga Odinga e kinde mane gidhuro ne jaraten'g loch nanga.Bug loch nogono mane jarachar omiyo Adonijano ilieko ni ne  okan ei dech buge ma pacho (home library) man
Kang'o ka Jaramogi.

   Kane Amolo wuod Oganda osepuodho ayanga bugni e suda mane oyuorie nyaka koda ka jorochere, Jokabim Nyajuola ne jochur ka gichodore kendo gingitore sidan'g ka giluothni ni Agwambo nyaka dir aruya ei od an'gech ndin'g ka gimuocho ni migawo mane okawo e kinde mane jolweny monobalo e kidieny mar joka otenga ne oketo piny owacho mar Wuod Odongo nyakaka ka gidwaro mondo githule oko e loch e yor agoko ne omiyo jopiny otho kaluan'gni.Aidha ma wuod kieni to kane bugni oicho ei gono to ne obubni mosieko mana ni Raila nyaka timgo misango kendo nyaka liere e tal ne wira ochayo ji kendo wiye tek.

   Oyuma nyocha omako atwara  ma gichako ledho ka giguetho kendo gigoyo
asumbi ni piny owacho margi ok bi yie buonone Agwambo ngang'  to ni nyaka
ogulmama yudhe ka diemo wan'g mondo dhi geng'ne ie agoch onyang' eka mondo gangne ketho ma nyalo miyo ng'adne bura makoch mar amuor eka mondo timne liswa.

   Kata obedo ni siboi kod mahu ne yuak ewi Agwambo kamano, chir nomake ka en kod mbi kaka thuon mi apoya nono  nochako kego lajre ne joka Bim Soi
kothiano ni oonge kod richo nikwop bugno en mana neno ma wuod Nigeria notimo kuome kasidhone osimbo kadhialego to ok en mbaka mane en ema olero e wiye owuon..Ne okwerogi rabidhi ni en ok en midusa mar bugno, to siganano otaji kendo odhieny e buk gi ng'at man tenge (third party).  Jakom Amolo nosemo andhokego ni owinjore gisom sura kod wes mar bugno duto kapok gichako milruok mar swayo wache ma onge kod oala ne jopiny..

   Okinde matuklu man pachoka koda ka oruai mar piny owacho maragaja Emos Wako ne ochogo joma ne galo ni berber ni ok yot tero Amolo e doho nikwop onge kiewo moro amora manie chik ma inyalo lieki mondo tweye godo.Jomin wachgo nomedo talonegi ni lemo mar andhokego orem, ong'ol kendo ogak putu maka gihedhore gichoro migangago e nyim od ng'ado bura to gidhi ae giwich kuot mogundho kendo mokadho kare nimar ywakgigo ok rieny maler kendo gin kod gwonyo sipwap..

   Jokanyanam kare Bim Nyajuola kare bende e Bim Soi.To kata kamano okuche nyaka ng'e ni thim olinga kendo thim iye lich. Thim oting'o nyungu oyie
soro,ochimbo jayong'o,nyang' jabuto,liech radhianja, jowi jamwomo, rawo nyadundo, teng' rarieya,muok retego,chiewo rakuthe,kwach ratila,sibuor jaruto,ondiek jawouro,opuk rakoti, omuga ragwandha,ogunde nyar ber, pino
jatugre.anam nyothoche, olit jaganga awendo rayier, okoko japala,owang' jasunga,okok rachar kod mamoko maket.

   Nyasach Podho ma wuod Ramogi Ajuan'g ma nyakwar Kenyu ma wuod Kuklubanga mondo okwonu bwanga jokadana ka umedo tudoru gi mbuch otieng' mar jaluoni nyaka wakadh ataro mwagow lokacha kaka ne osingi e bug loch.

   Jamumbo Maurice Aguko Mayora Ojako