Pope Benedict XVI Ochwanyo chuny jo-Islam?

Jatelo mar din jo-Katholik Papa Benedkt XVI (mar apar g'auchiel) ochwanyo chuny joka-Nyikwaya (Islam). Jatelono yande oyudo golo twak e Mbarariany mar Regensburg e piny Onjiro Nyamande ma bende e kar nyuolne.

Weche mane owacho notuomo wach kuom JIHAD kod timbe mane otimore e higa mar apar g'ang'wen bang' nyuol jawar (14th Century) Manuel II Paleologus, 14th Century Byzantine Emperor kod timbe moko ma jo-Islam osebedo katimo. Kaka mag Onyango wuod Laden gi Jogo ma muocho amuocha magina raoyi nono kendo nego joma onge gi ketho.

Jateloni sani koro oseyudo nying mathoth ma jomoko koro osechake kata ni PAPAROMA (Paparazzi) kaluwore gi nyinge mar Josef Ratzinger mago to gi ma moko Jo-Islam koro okete tulo ni jagoni ema ketho kwe e kindgi gi jo-Kristo. Anto aparo ni ji kik kaw wachni matek kaka oganda jo-Islam osekawe.

Jadolo bende onego we weche mag siasa nimar en onego oket kwe e kind oganda, hera gi riwruok. Jo-Islam bende onego we keto tulo samoro amora ma kata gima ok onego moke mach to korka gi oye ndere.

Sani koro ok en wach jo-Islam gi Jo-Kristo kende sani koro en wach momako jo-pinje ma Ugwe (Asia) gi jo-Imbo (Ulaya gi Amerka). Jotend dinde onego bed piny mondo gi ket kwe moloyo chwalo mach to oganda matindo ema hinyore. Papa Benedikt onego kaw ranyisi mar jago mane okawo kare (Johanes Paulus II) kuom kelo kwe e kind oganda kik ochalgi jo-njirman (German) e loch Hitler endalo mane ginego jo-Yahudi tara gi gana.

Mogik kadipo ni Papa nyocha dhoge okier to onego okwa ng'wono moloyo tuomo bunge, kata kamano jo-Islam bende onego nyiswa gima nyocha owacho marach ma kelo ich wang' e kindgi gi jo-Kristo. Kar kelo tulo e kind Kanisni to onego gi tim tulo gi Papa owuon. Bende jo-Islam ong'eyoni dinde jo-Kristo ok gin jo-Katholik duto?

Kwe kende Jokanyanam!

Wuon Abila