JOTELO MA DWANYRE!

Weche moko ma timore e piny sani miyo samoro atemoga mana paro gima Nyasaye nyalo bedo ni paro gi dhano e ndalo gi. Dhano aparo ni nyalo mana bedo ni koro osetamo wang’ Nyasaye chutho. Kata kamano timbe ji ariyo moko ma jotelo kendo jodongo omako ma dhoga. Jodongo gi gin jalup Ker machon mar piny mar Afrika ma milambo, Jacob Zuma, to gi manyocha jatend migawo mar wuoth e piny mar Ghana, Richard Anane.

Jaduong’ Zuma ma chon nyocha yande iparo ni nyalo kawo kom Ker mar pinye bang’ ka Ker ma sani otieko tich ne od nga’do bura oyudo ni ne ochodo nyako moro ma nigi tuo mar ayaki. Ma to ok lich dawe. Jogo man gi kute mag ayaki bende gin mana ji kendo onego hergi mana kaka dhano mamoko. Malich en mana ni jaduong’ni ne olero maber ni ne ong’eyo maber ni nyani ne nigi kute mag ayaki to kata kamano ne ok otiyo gi rabo oyunga. Bang’e to obukore ni ne oluokore gi pi mang’ich bang’ timbego. To adier to en ni onge kaka luok gi pi mang’ich nyalo geng’o ng’ato mondo kik yud kute mag ayaki.

Jaduong’ Anane to ndalo mane otelo ne migawo mar thieth e pinye ne odhi e romo moro mar yor tich Amerka, mit oromo gi nyadendi moro kuno. Kae to ochako mana kisera. Osiepgi ne odhi nyime kata ka ne oseduogo korgi koni, mit ka oyudo nyathi ma wuoyi gi nyani. Nyocha ka koro en jatend migawo mar wuoth to oyud ni ooro ne chotne ni dola mag Amerka 100,000. Sani koro itimo ne nonro kaluwore gi ng’eny mar pesano. Kuom hawi maber, ose gweyo tawo.

Gima awuoro to en mana ni ka magi e joma dongo ma pile ka pile wawero ni ojende ni mondo oluw timgi to kara koro piny ochiko kure joka mama? Ang’eyo ni jomoko nyalo wacho ni kudni maricho nyaka bedgae, to kata kamano wang’eyo ni ok gin kendgi. Jodongo ma timre marach odhuro, ok nyal kwan gi duto dawe. Kendo lit ahinya ka jatelo timo timbe maricho nikech ji mang’iye ng’eny ndi. Jodongo ma kama nyaka lok paro nikech gimiyo duong’ gi telo nying marach. To ma ok onyiso ni jodongo duto richo dawe, nitie moko ma beyo ndi kendo tijgi ler ahinya, kaka jakom orindi ma kisumo rural.

Nyasaye ogwedh nyikwa Ramogi duto. Kwe kende!

Adhiambo nyar Kanyamuot.