BENDE WAPUONJORE WECHE MABEYO E KINDWA?

WUON ABILA

An kod kuyo kod buok ahinya ei chunya kod gik ma koro asomo kata awinjo katimore ekindwa wan Joluo ma somo kata keto weche ma isomo ei piny mangimaei Mbui ni mar Jaluo dot com. Gima ne Akelo Nyar Kager kod Jaode joparo mar yawo kaka Joluo nyalo yudo pogruok e kindwa kaka ngato nyalo konyo kata ngado riekone wadgi kata medo paro eyo makare engimane. En wich kuot nikech Mbuini isomo kod ji duto obed nyathi kata ngat ma ngongo. Ka iyawe ma ichako some to ibiro neno kaka weche oketie ma ochanore. Yawa mathoth to koro oketo mana paro margi e Wach Raila Odinga koro maeri ema samoro amora ma idonjo e Jaluo dot com to ema ineno.

Piny Owacho ok ose bedo mamor kod wechegi. Yande aneno ka Nyar Kager ne Puonjo ji kaka inyalo tedo Nyoyo,Olayo, Dengu, Rabuon,Ruwo Nyuka Kal kata mar Bando, Tedo alot Osuga, Dek, Boo, Bulo Ringo, Tedo Kuon, Nego kendo Kengo Gweno, kod moko maok akuano. Magi gin weche mabeyo ekindwa nikech wan kod yawa mangeny maok ongeyo timo magi. Kik waluor kata waling ka wadhi marach kata maber kod timbewa.En anjawo koro kod gik ma ji timo ekind oganda. Ngato iyudo ka puoyo kata chayo gima ngato timo to ngatni to ok ongeyogo maber kata yangogo malongo. Ber mondo iwuo kuom ngato ka ingeye maber chuth kod ngimane koa e tin ne nyaka ingeri kode ka ose bedo ngat ma ngongo. En anjawo keto nying ngato ne piny mangima mondo osom ka ingeyo maber ni ionge kod (evidence) gimoro e lueti machuaki. Wangeyo maler ni wan kod jogo ma jomaundo ekindwa yawa moko wuondore kaka jok mabeyo to ok wanyal timogi gimoro mak mana ka odonjore kod Nyingi to ikawone ondamo madwarore. Inyalo wuoyo kode mos kata inyalo wuoyo kode kod (through) ngat ma ongiyo godo ma osiepne toka otamore to inyalo dhi kode nyime kaka neno Okil Kamaloka mari kata Kod Ogul Mama to ok en gima ber ka ibukori indiko nying ngato e Mbuini kata moro amora ei Piny mangima ka ionge kod ratiro kuom ngat ma iwuoyo kata ndiko kuomeno Luo kitgi kod Timbegi, manyiso ni inyalo kwero ngato gimoro kod ngero. Joluo ne Getore eliete ka ngato otho Jodongo ne geto mbese gi ka gi nyisogi timbegi maricho ma anyuola odagi.Ka ngato ne nyap maok pur to kar liel emane inyise kaka kech nege nikech ok opur. Ne ok luong nying ngato to timbene maricho to ne inyise enyim jopiny ne ngeyo duto. Ok en mor mar weche siasa e seche duto.

Josiasa yie uru uwachnua weche moko maok mar SIASA.

Jok ma Chuo, nyiswa uru kata kaka ne Ichiko Aluru, Ichiko Biye, Kaka ne Inyuomo Nyako,kata kaka nyithindo ne puonjore Pedho Lee. Kaka ne Ikwayo Dhok kata Diek kata Rombe,Puonjwa uru kaka ne igero Udi kata Umo udi kata goyo Dero, Puro kata kod Dhok. Koso en ni Wadar Chuth wabiro ka pango oko koni Ulaya kata America kata India kata Australia kata China kata Japan ok wabi dok dala? Wapuonjre uru eyore duto kik wabed kod achaya ekindwa.Awuoyo kaka Wuod Luo kendo madwaro mondo ji obedie achiel kod hera ekindwa. Ok awuoyo kuom ngato kata ndiko nying ngato toanyalo medo bedo mamor kawa herore kendo waluorore ekindwa wan wawegi. Nyasach Omogi Awando Otelnu Uduto.

Jandikoen
Odhiambo Omolo Jakamagambo (KoderoBara)