Kuom Nyombo Odinga Fidel Odhiambo

An gi adier ni ji mang'eny wigi ne ojuol kane gi winjo ni wuod Raila okendo nyar okuyu... Mano ok en gima nono kata gima opore apoya ni ji buok. Buok mar ji nyiso ni adieri wan jokanyanam wan gi Ruadhwa ma wapako kendo en e Ruodhwa ma wageno. Ma ema omiyo gimoro amora ma mulo ngimane kata ode mulowa kendo miyowa paro.

E kind ogendni duto man gi Ruodhi (Royal family), ji mor ahinya sama onyuol nyathi to nikech nyathino ok en nyathi athiya; en Nyar Kingi (Princess) kata Wuod Kingi (Prince, a king in the making) matiende ni dongruok gi geno nitie ni kar Ruoth ok orumo. Ma ema omiyo ogendni mathoth ne ok oyie ni nyar Kingi okend gi jomoko nono kata ni wuod Kingi okend nyar wasigu nikech dipo ka Kingi onyuol oko kata dipo ka wasigu okunyo tiendgi mi oduodogi... (Lwanda Magere).

E kit tend joluo e Siasa (Luo political dynasty), joka Odinga osebedo gipek makende. Geno marwa ne en ni chien'g moro Ajuma Wuod Alogo nam okalo ayora ne nyalo telo ni Kenyawa kendo miyowa ohuru madieri. Kata kamano, lowo jajuok ne otere kapok waneno gima nene wagombono. Kuom hawi maber, Nyasaye ne osemiyoya ruath machielo mager madwa lo wuon, Raila Agwambo makoro sani watero lemb geno kuome. Ma ema omiyo ji mang'eny osebedo kaparo ni wuod Raila, Odhiambo Fidel, be nyalo bet kaikore ma ka teko Agwambo rumo to wan gi wuon osimbo moro kendo ma wachungo.

Mano ema omiyo ka nyocha wach owuok ni Fidelis Odhiambo Odinga okendo Wanjiru nyar Ng'ang'a, jomoko ne okwedo mana gi kanyo to jomoko be ne nigi paro mopogore. An gi kora to asebedo ka aparo kama: e piny masani, tinde jo wang' yo tin. Piny oselokre kendo wang'eyo ni yawuot luo kata nyi luo tinde kendo kata tedo ni ji mang'eny ma moko kuomgi ok kata jorotenge. Iwacho ni lony? Hera? Ng'ato ka ng'ato ni thuolo mar yiero yo maberne.

Aparo ni ka pok Odhiambo gi Wanjiru ohulo ayanga gima ne giparo, nyaka bedie nine ginyiso jonyuolgi. Kapo ni Jok'Odinga (to moloyo Raila gi Ida) kane oyiego to jonyuol Wanjiru be oyie, wan to koro ok diwang' watamre. Ang'eyo ni joluo mang'eny pok wigi owil gi gima ne otimore e kind Wambui gi Otieno. Kata kamano, ka wang'iyo piny maber to wayudo ni Ruodhi moko be ne kendore gi nyiri moa e gwenge moko mondo omi lweny orum ekind dhoudigo. Nyalo bet ni en yo manyien mar tieko sigu man e kindwa gi jogi. Be en ranyisi mar Kenya manyien ma wadwaro. Ka wanono matuk to be waneno ni kata Nyar Raila, Akeyo Rosemary, be ne okawre mana gi wuod Bunyore, Akasa Amos.

Dian'g wawach ang'o? Agwambo ok en Ruodh Luo kende. Osekalo ton'g kendo onyisowa ni en ja Kenya ma ok okwedo kabila moro amora. Omiyo aparo ni kade jogi wigi nyalo yawore to de onene ni ma e wuon osimbo ma wang'ni onego wamiye thuolo mar temo. Dipo ka olosonwa piny wadak gi kwe kendo gi hera kaka jokenya maonge akwede. Ni nyar ka rabuon, de wakwaye mana ni oritnwae wuodwano maber kendo obed dhako modimbore kendo maja adiera. Andhoga to wadagi.

Kwe gi hera. Kenya marwa waduto.
Jadolo Fr. Okoth Gordon wuod Asembo.