Dongruok e piny Luo

Nyikwa Luo ywak ma nyalo oro ne ogendwa duto e piny masani en ni dwarore ni mondo wayawo wan'gwa eweche matimore e piny mar Kenya masani.

Ka wapimo malon'go kuom adieri an'go ma Ker Kibaki otimo marach manyalo mia watam miye ombulo kendo mondo odok e telo? An'go ma Raila, Kalonzo, Balala, Mudavadi ose timo ne piny mar Kenya ma nyalo miyo n'gata a n'gata olut ne gi ombulu mondo gi bed jotelo mar Kenya?

Raila, en wuod luo kendo ose timo man'geny kuom yawo pap mar siasa e piny wa. To ka kuom adieri, bende ni tiere weche mag od bura ma Raila ose chako ma okadho manyalo medo joluo dongruok eweche mag thieth, somo, ohala, pi ma ler, pur kod komo, ywayo rech? An'go ma Wuodwa ma Raila ose timo?

Kalonzo, an'go ma wuod Akamba ni ose timo ne jokenya manyalo miyo yawa omiye tich mar Ker mar Kenya? Ndalo mane en minista mar somo, be ne oweyo nyithinda somo nono kaka Kibaki? Bende ne omedo jopuonj pesa? Bende ne ogero skunde manyien? Bende ne Okelo dongruok maji nyalo neno nyaka seche ma sani?

Kik wan'gi ni seche wa ose romo mar bedo gi Ker ma Jaluo. Wan'gi weche gi e yo matut kaka dwarore.

An pacha neno ni Tuju en wuod Luo maja adieri. Dwarore ni mondo waunge lwedo mondo emed kelo dongruok e piny mar Luo. To iye no bende wadwaro yawuot Luo ma ok par kod iyegi kende mondo omak nwa telo e od bura.

Omiyo akwayo nyithi Ramogi Duto mondo owuo kod ogendini duto manyalo luto ombulo mondo Omi Jaduo'g Kibaki Ombulu mondo omed tim tich maler epiny mar kenya. An mano e kwayo ma an godo.

Kik ngato yanya kata luwo na weche maok oluwo kuro ni kech weche ma angiko gi. Adieri ema andiko. Raila kata Kalonzo onge dongruok ma gini kel ne jokenya. Ka in kod paro ma opogore kod mara, ndik e mbui ma Akelo Nyar ka Ger oketo nwa ni e yo maler gi luor!

Julius Okelo