Osimbo mar Honorary Doctorate ne Mama Asnethe Bole Odaga

Uwinjo,

Jothurwa ma Jo Kenya duto mantie e dala tiegruok mar Nairobi University, kata Kenyatta University, kata Maseno University, kata Moi University, kata dala tiegruok mora mora manyalore; apenjou kama: Donge dutimo matek mondo umii Mama Asnethe Bole Odaga Osimbo mar Doctorate degree in Literature?

Mano e kwayo na machuok kendo matin mana adundo kamano. Ma ema omiyo achako ayua Kom Nyaluo e Dot Kom ka, e duol mantie e pap oko kae ni.

Mama Asneth Bole odaga osegoyo buge mathoth, osepuonjo JoKenya duto tee chakre tie Nam Lolwe, nyaka e thur mar Nairobi, ma weche ne osechwe nyaka mwalo Mombasa, kendo buge ne pod puonjo Jo Kenya duto matie kenya gi mantie oko ka pango.

Moko nyocha ating'o apuonjo godo Dho Luo oko kuma wathembe kawasumoe koni matin tin.

To donge ung'eyo ni dhok chalo dala ni, pacho?

Ka ionge dhou to ionge dala ni, ionge pacho.

Koro kata iwacho dho odiero mobidhore maloyo Queen Elisabeth to pod chalre gi nono. Ng'e dhou, wache, ndike, tii kode e paro, kendo rit uru kitu gi timbeu kata sama ubayo oko e pinje maboyo boyo go.

Kik iged ka jomoko to dalau to ikia kuma nitie, ka wang' ochopo sama ji oseaa e budho e duol koro ji dhi nindo to koreka idhi lao nindo, kanye? Ka ng'a? Gi jogi? Be timore? Iting'ori gi jogi ni idhi lao nindo ka Dho Ngere Omin Elisabeth kendo iluongori ni profuasa? Mano ifua yo.

Mama Asnethe Bole Odaga osendiko mathoth, nyocha ondiko nyaka diksonari mar ariyo - abidha-nonro manyiso kendo lero tiend wach maloko Dholuo gi Dho Ngere koni gi kocha. Ber ahinya kendo asomo godo Dholuo kendo atiyo godo e puonjo dho Ngere be.

Wach no be winjore ni koso morni in Ja Kenya ma ogedo ka Dala Ngere ma Wuod Elisabeth, ka Joka Kingi? Be winjore ni?

Omiyo jotendwa ma Jo Kenya duto mantie e dala tiegruok mopogore opogore yie uru ubed piny upara ne kaka unyalo miyo Mama Asnethe Bole Odaga Osimbo mar Doctorate Degree in Literature. Mano e kwayo na kaka japuonjre ma osepuonjore e tiend Mama ni kendo koro puonjo gi rieko ma Mama ni osendiko e buge mopogore opogore. Tinde ang'ieo gi mana chiegni duto.

Ng'ama nyalo to olokne jomoko wach ni gi dhok mathoth mopogore opogore go, nyaka mar Ngere.

To kotamore ni ok unyal miyo Mama Asnethe Bole Odaga Osimbo ma Doctorate to kare koro wawuoth uru oko wamanyne Osimbo no giyore ma moko. To ageno ni ma ok biyuare.

Ang'o momiyo Jo Kenya pok oparo wachni? Koso warito mondo olute ombulu? Koso delegates nyaka ndhanye lwetgi?

Ooyo ma kik uter e duol mar siasa.

Ma kik yuaruok bede. Ok en Osimbo mar od bura, ooyo.

Erokamano Dr. Asnethe Bole Odaga kuom mathoth ma isetimo ne Jo Kenya duto. Buge ni omiyo pod wamong'o dholuo, ok omonowa puonjo dho ngere be.

An mogenou Jo Kenya duto - Nyakwar Okanda Nya Wili ma Nyar Kanyada, Wach dhogi, cham dhogi, par dhogi... kik iwit dhogi

Mbucha en - tekta01 At hotmail dOt coM