NGEYO JOTEND JOLUO E PINY MANGIMA..

Piny Owacho ose yie ahinya kod weche mabeyo mathoth Onagi ose wuoyoe kinde ma ose kalo.En wich kuot ma iwuoro ka yawa ma koro waketo kaka Jotelo ok sir oganda kod weche mongith mag dongruok.

PinyOwacho ema odag timbegi maok chor dongruok nyime ei kaluo kata kadala .Wan wawegi kaka Onago ema nyaka wati matek ekindwa eka wanyalo gerore.Onagi riek chuth kendo gin kod Laktere(Doctotors), Jopuonj (Lecturers -Teachers),Ngire (Proffessors) Okil Kamaloka (Lawyers),Jogedo,Jogor Yore kata Udi kata Gajo waya mar mach maliel kuonde duto (Engineers) , Joma puonjo Jopur (Agriculturists). Ok angeyo kata en sunga kata jachien ma omiyo yawa mariekgi ok nyal riwore mondo gikel pogruok ne oganda.

Piny owacho okelo kwayo ni gi dwaro ngeyo nying Joluo man kod yuto maber kod tije mabeyo duto epiny mangima mondo oket negi kwayo makende mondo gikony anyuola mar Onagi maonge kod kaka ginyalo konyore eyudo kata tije. Ei mbuyi ni kawase ngeyo nying gi to Piny Owacho biro ndikone gi mondo gikony Onagi. Jogi duto ji ongeyogi, kod nyingegi kod pinje magiae kata owetegi kata nyiminegi ji ongeyo koro watem uru wariwre kanyakla mondo wager pinywa maen Kaluo.

Yande awuoyo ahinya kuom ogandawa ma Joluo makoro ose lokore athongo maok dwar wacho kata tiyo kod nyinge mar Jaluo. Yawagi thothgi nitiere e kuonde dak ma kapango(Towns) gin kod kido magalagala nikech kaose weyo wacho kata Dhogi to dang okony wadgi nango? Wan kod Joluo mangeny ahinya man kod tije mabeyo kendo onengo gikony yawa machandore maok nyal yudo tije toni kod tiegruok mabeyo eyore ma opogore opogore.

Jothurwa, ne uneno kaka Ajuoga Paul Odero Wuod Nyandoto kata Ajuoga Barack Abonyo ne jowuoyoe. Weche yawuoyi gi nebeyo miwuoro kendo ne onge gima giwacho ma miriambo kata achiel.In iwuon kata An kaka Jasomo mar Jaluodotcom med lando wechegi kendo nyis osiepeni ubedie achiel mondo uchak agulu moro matin mar konyo yawa maok nikod yuto maber.

Kik ngato parni mit en ema awuoyo kuome ooyo jothurwa an hera,luor kod dongruok ema awuoyoe mondo obedie kindwa wan kaka Onagi. Nyasach Omogi Awando otelnu Uduto un Onagi manie piny ngima.

Jandikoen
Odhiambo Omolo Jakamagambo( Kodero Bara)