OMUOM KATA OMENDA KIK WUOND GODO JOKENYA

Piny owacho ne oneno ka Wuod Othaya koro achako ngwech ma thiringinyi ka dwaro mondo ochak omede higni angwen mondo odhi kod yako kata kwalo Oganda mar Kenya mangima kaka ose bedo kotimo kuom higni mogwarore 1963 Nyaka Sani 2007.Som koda Otas mar lando kata keyo weche ma iluongo ni Rapim ma nyoro (The Standard) ka owach maler ni Wuod Othaya koro ose wuok elela ni piny ochako okawo kendo ka oriwore kod Jomuandu kod Jomooko ma thothgi gin mana Atwara wetene.

Yande kinde mokalo ne piny owacho ose neno wechegi chuth ni Omuom kata Omenda biro chodore miwuoro ka owuok kuom Jokuoge ma gin Atwara, Jothurwa yie uru ucham omuomgigo chuth kendo Wawuondre uru ni Wuod Othaya nyaka dogi to in iwuon kaka wuon Otiko (Kura) to ingeyo manani wan kar tiendwa Kuom Agwambo.Luong gi uru mondo gikonywa gero Kanise, Sikunde, Kuonde thieth,Tudruok kata riwruok mar Mine (Women Group), Kuonde Lwoko dhok (Cattle Dips) kod moko maok akuano.

Ne uneno kagiwacho ni Gise golo Omenda ma buora kendo gibiro tiyo kod Tonde mag njiriri man kod teko mangeny ahinya ma wuok mane e polo malo (Satelite).Ne gimedo wacho kaka gibiro tiyo kod Ruodhi (,Chiefs),Jorit piny ma oluwore kod Disi Kamisona (DO),Disi Kamisona (DC), Pisi (PC). Yawagi kod Obila miruai kata Ogul mama koro Nanga( Government) biro temo tiyo godo ahinya mondo gi chun ji ni wuod Othaya nyako dogi e telo.Ok bi bedo mayot nikech dhano man Kenya koro thothgi ongeyo somo kendo ndiko maber.Wuondruok ok jopiny dwar ngang.

Ere kaka piny inyal rit mana kod jok ma wuondo ji? Ere kaka piny inyalo rit mana kod jo dhot achiel? Ere kaka piny inyal rit kod Jokuoge maok ne chandruok mar oganda maonge godo neno? Ere kaka jopiny nyalo yiero jotelo ma gin igi ema gidich godo to dhano to chandore miwuoro.Piny Owacho pod medo penjo Oganda ni wach mar Goldenberg cha to ne ogik kanye? To wach mar Chike mag Piny(Constitution) to ne owe ni ogik kanye?, Wach mar Kuo mar Anglo Leasing cha to ne ogik nango?

Nyaka wabed Jopuonj ekindwa wawegi kawa wacho adiera ne oganda. Jopiny dwaro Yore mabeyo, Jopiny dwaro modho pii maler ma onge kute, Jopiny dwaro ute thieth mabeyo kod yawa motiegore chuth mar konyo ngimawa,Jopiny dwaro sikunde mabeyo man kod Jopuonj mangith chuth,Jopiny dwaro ritruok maber kuom jomaundo (Security and Court of Law),Jopiny dwaro hera ekind oganda duto., Jopiny dwaro goyo ohala kata puro cham mamiyogi omuom maber, Jopiny dwaro kuonde Lwoko dhok(Cattle Dips) Ok jopiny nyal yie ni iuso gi kod Omuom kata Omenda ni eka giyier jalo madwaro telone gi.Kibaki ose chamo morom odhi oyue mos thurgi..

Mogik, In kata An ema nyaka med konyo kata riwo luedo mondo lokruok obedie ei Kenya.

Nyasach Omogi Awando Otelnu Uduto E piny Mangima.
Jandikoen
Odhiambo Omolo Jakamagambo( Kodero Bara)