KIRAGI MAR PINY KORO OSE MAKO AGWAMBO

WUON ABILA
Piny owacho yande ose neno ka Kiragi mar piny dhi mako Agwambo.Ne onenore ayanga tarik 1/9/07 elela ka oganda ne oyiero Wuod Nyar Alego mondo koro ochomre tir kod dwaro mar mako tich mar rito piny Kenya mangima.

Nitiere wach achiel ma anyalo kwayo anyuola duto mar Onagi ni kik wayudhre kod ilo mar achaya ne oganda mamoko ni Agwambo ne oyombo ekom mar Machunga koro telo wase kawo.Jothurwa, wadhi uru mos ahinya kod Kisera mawange achiel ma onge sem kata matin.Pod en ngwech mathiri nginyi mondo omi wakel telo e pinywa mar Onagi.Mwache oluoro wa nikech adiera marwa nikech Onagi onge kod mibadhi to ohero adiera.

Ne an e budho moro eseche mane wach ochopo America ni Agwambo ema oyombo.Ne mawuoyo mos kawa medo lando ni kik wabuogre kod sunga to ber mondo koro wanyis kituwa ni wan jogo mohero kwe maonge maundo moro amora.

Anyuola duto ma iluongo ni Onagi otem dimbore chuth kagi lando gik mabeyo mag dongruok ma loch mar Machunga biro kelo. Loch Machunga biro kelo Yore mabeyo mag ndara kata apaya ma nyamburko ringoe,Loch Machunga biro miyo oganda mar Kenya chike manyien mag rito piny,Loch machunga biro kelo yudo tiegruok maber chakre Somo mar Okinyi mar nyithindo matindi (Primary) kod mar Odiechieng mar nyithindo mose bedo jogo madongo (Secondary) kendo konyo eyor tiegruok e ranginy mamalo (University), Loch mar machunga obiro bedo loch mar Kenya mangima maok ni en mana mar Jodhoot achiel kende,Loch mar Machunga biro kelo ne ji duto Pii mar modho maler ne ji duto ei Kenya mangima,Loch mar Machunga biro konyo jopur kod weche mabeyo mag ohala e okang mamalo mamiyo yuto bedoe kuom tich matek mar puodho.Nitiere weche dongruok mangeny maok akwano to loch mar Machunga dhi kelogi ne oganda mar Kenya mangima.

En in kata an ema nyaka koro ti matek maka ber to watem uru wadonj eot (door to door) moro amora kod weche mabeyo gi.

Wahore uru ahoya mos nyaka wayud Osimbo Maduong korka wabiro chako bedo kod mor kod ilo achunywa.Wechegi awacho kaka wuod Onagi ma ose bedo ka wuoyo ahinya korka weche mag dongruok e piny Kenya mangima kendo oikore mar keto Agwambo etelo.In kaka jasomo yie imed lando wechegi ahinya ne osiepeni kuonde tije kata kamoro amora ma intiere.

Nyasach Omogi Awando Otelnu Uduto Joka Nyar Nam.
Jandikoen
Odhiambo Omolo Jakamagambo (Kodero Bara)